Al-Ghashiyah

¹তোমাৰ ওচৰলৈ আচ্ছন্নকাৰী (ক্বিয়ামতৰ) সংবাদ আহিছেনে?

²সেইদিনা কিছুমান মুখমণ্ডল হ’ব অৱনত,

³কৰ্মক্লান্ত, পৰিশ্ৰান্ত,

⁴সিহঁতে প্ৰৱেশ কৰিব জ্বলন্ত জুইত;

⁵(সিহঁতক) উত্তপ্ত উতলা নিজৰাৰ পানী খাবলৈ দিয়া হ’ব;

⁶সিহঁতৰ বাবে কাঁইটবিশিষ্ট ঘাঁহৰ বাহিৰে আন কোনো খাদ্য নাথাকিব,

⁷এই খাদ্যই সিহঁতৰ পুষ্টিও সাধন নকৰিব আৰু ক্ষুধাও নিবৃত্ত নকৰিব।

⁸সেইদিনা কিছুমান মুখমণ্ডল হ’ব আনন্দোজ্জ্বল,

⁹নিজৰ কৰ্মৰ সাফল্যত পৰিতৃপ্ত,

¹⁰(তেওঁলোকে স্থান পাব) সুউচ্চ জান্নাতত,

¹¹তাত তেওঁলোকে কোনো অনৰ্থক কথা শুনিবলৈ নাপাব,

¹²তাত থাকিব প্ৰবাহমান নিজৰা,

¹³তাত থাকিব উন্নত শয্যাসমূহ,

¹⁴আৰু প্ৰস্তুত থাকিব পানপাত্ৰসমূহ,

¹⁵আৰু শাৰী শাৰীকৈ ৰখা গাৰুসমূহ,

¹⁶আৰু বিস্তৃত পাৰি থোৱা দলিচাসমূহ,

¹⁷ইহঁতে উটৰ পিনে দৃষ্টিপাত নকৰে নেকি, কেনেকৈ তাক সৃষ্টি কৰা হৈছে?

¹⁸আৰু আকাশৰ ফালে, কেনেকৈ তাক উৰ্দ্ধত স্থাপন কৰা হৈছে?

¹⁹আৰু পৰ্বতসমূহৰ ফালে, সেইবোৰ কেনেকৈ প্ৰতিষ্ঠিত কৰা হৈছে?

²⁰আৰু পৃথিৱীখনৰ ফালে, কিদৰে তাক বিস্তৃত কৰা হৈছে?

²¹এতেকে তুমি উপদেশ দিয়া, তুমিতো কেৱল এজন উপদেশদাতা,

²²তুমি সিহঁতৰ ওপৰত শক্তি প্ৰয়োগকাৰী নহয়।

²³কিন্তু কোনোবাই মুখ ঘূৰাই ল’লে অথবা কুফৰী কৰিলে,

²⁴তেন্তে আল্লাহে তাক মহাশাস্তি প্ৰদান কৰিব।

²⁵নিশ্চয় আমাৰ ওচৰতেই সিহঁতৰ প্ৰত্যাৱৰ্তন।

²⁶আৰু সিহঁতৰ হিচাপ-নিকাচ আমাৰেই দায়িত্ব।