Al-Qiyamah

¹Mede Owusͻreε Da no di nse.

²Mesan de (gyidieni) kraa a ᴐbᴐ ne ho soboᴐ (wͻ bͻne bi a wayε ho anaa papa bi a wanyε ho) di nse.

³Enti onipa dwen sε, Yε’moaboa ne nnompe ano (nnyane no mmu no atεn)?

⁴Daabi, Yεwͻ tumi sε ne nsa teaa ano no (mpo) Yεyε no pεpεεpε.

⁵Nanso onipa pε sε ͻkͻso yε bͻne kͻ n’anim.

⁶Obisa (dedi fεw) sε: “Ɛberε bεn ne Owu-sͻreε Da no?”

⁷Sε aniwa so te nyinam,

⁸Na bosome yε tumm (anaasε bosome hwere ne nhyerԑnee),

⁹Na yεka Awia ne Bosome bom a,

¹⁰Saa Da no onipa bεka sε: ”Dwane kͻbea wͻ hen?”

¹¹Daabi, dwane kͻbea biara nni hͻ.

¹²Saa Da no, wo Wura Nyankopͻn hͻ nko ara ne Ahomegye bea.

¹³Saa Da no, yεbεbͻ onipa adwuma a, odi too n’anim ne deε εkaa akyire (a obuu n’ani guu soᴐ) ho amaneε.

¹⁴Aane, onipa no ara nim ne ho.

¹⁵Ɔpa kyεw mpo a, (ne kyεw pa no ho mma mfasoͻ biara).

¹⁶(Nkͻmhyεni), εnnanedane wo kεterεma mpere Adiyisεm no ho (sε wo werε bɛfiri nti).

¹⁷Nokorε sε, Yεn na (Qur’aan no) anoboa, εnesε (yεbεkyerε wo) n’akenkan no da Yεn soͻ.

¹⁸Enti sε Yεrekenkan (kyerε wo a), di akenkan no akyi:

¹⁹Afei ne kyerεkyerεmu no nso Yεso na εda (sε Yεkyerεkyerε mu kyerε woͻ).

²⁰Daabi, Nanso mopε seesei wiase (asetena) yi,

²¹Na moabu moani agu Daakye deε no so.

²²Saa Da no ebinom anim bεhyerεn,

²³Ahwε wͻn Wura Nyankopͻn.

²⁴Saa Da no ebinom nso anim bɛmuna kusuu.

²⁵(Saa nkorͻfoͻ no) adwen sε mmusuo kεseε bi reba wͻn so.

²⁶Aane, Sε (nkwa no) duru (owufoͻ no) mene mu a,

²⁷Wͻka sε: “Hwan na ͻbεgye no”.

²⁸(Owufoͻ no) bɛhunu sε, nokorε, ͻne (wiase) redi mpaapaemu.

²⁹Na (owufoͻ no ho refa no) ma anantu ne anantu kᴐka bom.

³⁰Saa Da no wo Wura Nyankopͻn hͻ na yεka kͻ.

³¹Enti (boniayεni no) annye (Qur’aan) anni, εna wanfrε Nyame nso.

³²Na mmom ɔbuu no atorͻsεm danee n’akyi demaae,

³³Afei ͻde ahomasoͻ kunkon kͻͻ n’abusuafoͻ hͻ.

³⁴Due nka wo. Enti Due!

³⁵Due nka wo bio, Enti Due!

³⁶Enti onipa dwen sε yεbεgyae no kwa?

³⁷Na ͻnyε nkwa-boaa a, efiri ahobae a, ehwie anaa epue ba no mu?

³⁸Ansa na ͻreyɛε mogya-toa, εna (Nyankopͻn) bͻͻ (no) yεε (no) pεpεεpε?

³⁹Ɛna Ͻyεε no mmienu, ͻbarima ne ͻbaa.

⁴⁰Enti (Nyankopͻn a, ͻnam anwanwa kwan a yɛakyerε yi so bͻͻ onipa no), Onni tumi sε Ɔbɛnyane owufoͻ aba nkwa mu (bio)?