Al-Waqi'ah

¹Igihe umuhero w’isi wabaye;

²Ukuba kwawo, nta n’umwe ashobora kuguhakana;

³Uzota abansi b’Imana Allah mu muriro, uduze abatoni bayo mu Bwami bw’ijuru.

⁴Igihe isi yagigimye nya kugigima;

⁵Imisozi na yo ikavungagurika nya kuvungagurika;

⁶Igacika intumo itumurwa n’umuyaga mu kirere;

⁷Maze na mwe ibiremwa mukagaburwa mu migwi itatu;

⁸Umugwi w’abantu b’iburyo. Ese icokwereka icubahiro cabo n’indishi bagenewe!

⁹Umugwi w’abantu b’ibubamfu. Ese icokwereka amagorwa bagowe n’ibihano bibarindiriye!

¹⁰Hamwe rero n’umugwi w’abahurumbira gukora ivyiza kw’isi, bazotanga abandi mu vyubahiro vyo mu buzima bw’inyuma yo gupfa;

¹¹Aba rero, ni bo bazoba batonye hambavu y’Imana Allah;

¹²Ikazobinjiza mu Bwami bw’ijuru bwuzuye inema.

¹³Hazokwinjira muri Bwo, umugwi munini w’abantu bo mu binjana vya mbere mu barungikiwe Intumwa Muhamadi (nyakugira amahoro n’impuhwe z’Imana Allah) hamwe n’abandi bantu bo kuva ku gihe ca Adamu;

¹⁴Hamwe rero n’umugwi w’abantu bake mu bakurikiye mu nyuma gushika ku musi w’iherezo[1];

¹⁵Bazoba bicaye ku bitanda bisharijwe n’inzahabu;

¹⁶Bavyegamiyeko, bicaye barabana;

¹⁷Bazoba bakikujwe n’imisore myiza, ikurakuranwa mu kubazimana, iri mu runganwe rumwe, idasaza, itigera ipfa;

¹⁸Ibahereza ibinyobwa mu bikombe n’amabirika, maze bahabwe n’akarahuri k’inzoga zenzwe mu mazi y’imbizi itemba mu Bwami bw’ijuru;

¹⁹Ntibazosoma nya karahuri ngo bameneke umutwe, eka ntibazonaborerwa ngo umutwe uyayuke, batangure kudedemba bavuga ayamuhe;

²⁰Ibahereza n’ivyamwa bo bonyene bihitiyemwo;

²¹Hamwe n’inyama z’inyoni bo bonyene bipfuza;

²²Bazoba bafiseyo n’abakenyezi bo mu Bwami bw’ijuru barangwa n’ubwiza bw’akataraboneka (Hururayini);

²³Ku bwiza bwa nya bakenyezi, wogira ngo ni lulu[2] zikiri aho zaremewe, zitarakorwako n’iminwe y’abantu;

²⁴Iyo ni yo mpembo yabo ku vyo bari barakoze kw’isi.

²⁵Muri nya Bwami, ntibazokwumva amajambo y’ikinyoma canke ay’imburakimazi;

²⁶Kiretse gusa ijambo riroranye ryeza umutima, n’iryo kuramukanya amahoro.

²⁷Abantu b’iburyo. Ese icokwereka icubahiro cabo n’indishi bagenewe!

²⁸Bazoba bari ahantu hari igiti ca Sidri kitagira amahwa;

²⁹N’ibitoki vy’imihanyu igerekeranye;

³⁰Bari mu gatutu kamaho, katigera karenga;

³¹Hari n’amazi atemba, atigera akama;

³²N’ivyamwa vy’ubwoko bwinshi vy’urutavanako;

³³Bitigera bihundura, ata n’ikibabuza kuvyamura borohewe;

³⁴Bazoba bicaye ku bisaswa bishashe neza ku bitanda.

³⁵Mu vy’ukuri Twebwe Allah, Tuzoha abagore bo mu Bwami bw’ijuru indemo nshasha itandukanye kure cane n’iyo n’ukuntu bari bararemwe kw’isi;

³⁶Maze Tubagire amasugi;

³⁷Yikundwakaza ku bagabo bayo, akaba no mu runganwe rumwe;

³⁸Tukazobaremera bushasha abantu b’iburyo;

³⁹Ari na bo bagize umugwi w’abantu benshi b’imbere y’irungikwa ry’Intumwa Muhamadi (nyakugira amahoro n’impuhwe z’Imana Allah);

⁴⁰Hamwe rero n’umugwi w’abantu benshi bakurikiye mu nyuma gushika ku musi w’iherezo.

⁴¹Umugwi w’abantu b’ibubamfu. Ese icokwereka amagorwa bagowe n’ibihano bibarindiriye!

⁴²Bazoba bari mu bihano vy’umwokero w’umuriro wa Jahannamu bahezagurika, bahemburwa n’amazi yasebuye akaryimara, acagagura amara;

⁴³Bari mu gatutu k’umwotsi wa Jahannamu;

⁴⁴Si ahantu harangwa n’akayaga wokwipfuza gushikira; si n’ahantu hubashwe wokwipfuza kuraba ibihabera;

⁴⁵Mu vy’ukuri n’imbere y’aho bakiri kw’isi, bararyoherwa n’ibizira mu bihendamaso vyayo, bakirengagiza ukuri bazaniwe n’Intumwa z’Imana Allah;

⁴⁶Baranatsimbatara kw’igarariza n’ibangikanyamana, batiyumvira kwigaya;

⁴⁷Bahora bavuga mu guhakana izurwa ry’ibiremwa, bati: “Mbega burya, nitwapfa tugacika ivu n’amagufa yaboze mu kuzimu, tuzoheza dusubizwe ubuzima tuzuke koko!

⁴⁸Burya, tuzozuka twebwe hamwe n’abavyeyi bacu bapfuye kera bagacika ivu!”.

⁴⁹Ntumwa y’Imana! Bakurire inkoni ku gishitsi, maze ubishure uti: “Mu vy’ukuri, abapfuye kera hamwe n’abazopfa mu nyuma muri Bene Adamu;

⁵⁰Ni ukuri bose bazozuka, maze begeranirizwe hamwe ku musi nyezina w’izuka”.

⁵¹Hanyuma rero ga bantu bahuvye inzira y’ukuri, bagahakana bivuye inyuma isezerano ry’Imana Allah;

⁵²Ni ukuri, muzorya ku giti Zaqquumu kiri mu nyenga y’umuriro;

⁵³Maze ku kwicwa n’inzara, muzokiryako ku kwuzuza inda;

⁵⁴Muheze mushozeko n’amazi yasebuye akaryimara;

⁵⁵Muzoyanywa kenshi atabavuna akanyota, nka kurya kw’ingamiya inywa ntihere inyota ku burwayi;

⁵⁶Ivyo bihano bateguriwe rero, ni yo nduhuro yabo ku musi w’iharurirwa n’impera.

⁵⁷Bantu! Twebwe Allah, Twabaremye ata co mwari muri, Tubarema mu busa. Ubwo none, ntimwokwemera ko Dushoboye no kubazura inyuma yo gupfa!

⁵⁸Mbega ntimuraba ngo mubone intanga musesera mu gitereko c’abagore banyu;

⁵⁹Ni mwebwe muheza mukaziremamwo umuntu, canke ni Twebwe Turema!

⁶⁰Twebwe Allah, umwe wese muri mwebwe, Twaramugeneye isango ryiwe ryo gupfa, ntitwonanirwa rero;

⁶¹Kubarema ukundi ku musi w’izuka, maze Tukabarema ukuntu mutazi;

⁶²Ni ukuri, mwaramenye ko Imana Allah Yabaremye iremwa rya mbere ata co mwari muri. Ubwo none, ntimwokwibuka ko Ishoboye no kubarema bushasha!

⁶³Mbega murabona ivyo muteragira mu kurima!

⁶⁴Ni mwebwe mubinagisha bikagondora biva mu kuzimu, canke ni Twebwe Tubinagisha bikamera!

⁶⁵Iyo Dushaka rero, Twari kugira ivyo mwateragiye bigacika ubusize, maze mugasigara mwipfumbereje, mukumirwa muravye ivyashikiye ibiterwa vyanyu;

⁶⁶Mukavuga muti: “Mu vy’ukuri, turaguye mu gahombo katagira izina;

⁶⁷Ahubwo mbere turabuze n’icotubeshaho!”.

⁶⁸Mbega, ntimuraba ngo mubone amazi munywa kugira mubeho!

⁶⁹Ni mwebwe muyamanura mu bicu maze hakagwa imvura kw’isi, canke ni Twebwe Allah Dutuma imvura igwa ku mpuhwe zacu!

⁷⁰Iyo Dushaka rero, Twari kuyagira amazi y’icunyunyu ku buryo mudashobora kuyakoresha mu kunywa no mu kuvomera ibiterwa vyanyu. Ubwo none, ntimwoshimira Imana Allah ku nema yo kuronswa amazi y’akanovera!

⁷¹Mbega ntimuraba ngo mubone umucanwa mucana!

⁷²Ni mwebwe mwaremye igiti cawo, canke ni Twebwe Allah Twakiremye!

⁷³Twebwe Allah, Twabagiriye umucanwa kugira ubabere inkebuzo ibibutsa umuriro wa Jahannamu, no kugira ubere kirumara abari ku rugendo.

⁷⁴Muvugishwamana! Ninahaza izina ry’Imana yawe Rurema Allah ku mazina yayo no ku matazirano yayo, Nyenicubahirogisumbavyose.

⁷⁵Jewe Allah, Ndarahiye ku bituro inyenyeri zirengerako mu kirere!

⁷⁶Iyo rero mu vy’ukuri, ni indahiro koko iyo mumenya uburemere bwayo buhambaye;

⁷⁷Mu vy’ukuri, iyi Qor’ani yahishuriwe Muhamadi (nyakugira amahoro n’impuhwe z’Imana Allah), ni Qor’ani yubashwe, irimwo ubumenyi n’ivyiza vyinshi;

⁷⁸Yanditswe mu Gitabu gicungerewe n’abamalayika ku Mana Allah, ahatabonwa n’ibiremwa;

⁷⁹Nta n’uwugikorako, kiretse abamalayika bubashwe bejejwe ivyaha. Eka mbere nta n’uwugikorako mu biremwa, kiretse abejejwe ibangikanyamana n'ibihumanya bituma umuntu yiyuhagira agatunganya n’isuku ryo gusenga.

⁸⁰Iyi Qor’ani, yamanuwe ivuye ku Mana Rurema Allah Yaremye ibiremwa vyose.

⁸¹Mbega none ga babangikanyamana, ni iyi Qor’ani muhakana mwivuye inyuma!

⁸²Maze mukagira ishimwa ry’inema z’Imana Allah, rikaba uguhakana mwivuye inyuma!

⁸³Mbega burya igihe umuntu yoba ari ku mpfiro, umutima ugeze mu muhogo agira acikane;

⁸⁴Na mwe mukaba ari ho mwibereye muraba ukuntu asambagirika, mwoshobora gutuma adacikana! Muranguha.

⁸⁵Kandi rero muri ico gihe, Twebwe Allah Tubicishije ku bamalayika, Tuba Turi hafi yiwe cane kurusha uko mumwegereye, ariko rero mwebwe ntimubabona.

⁸⁶Mbega nimwaba mutazoharurirwa ngo muhemberwe ivyo mwakoze;

⁸⁷Murashobora gusubiza mu mubiri w’uwapfuye, inkomoko y’ubuzima “Roho” maze akaba muzima nimwaba muri imvugakuri! Muranguha.

⁸⁸Uwapfuye rero, iyo ari uwo mu bantu bahurumbira gukora ivyiza, batonye ku Mana Allah;

⁸⁹Igihe co gucikana, aba ari mu mpuhwe z’Imana Allah hamwe n’umunezero nta ngere; akazohabwa n’Ubwami bw’ijuru bwuzuye inema.

⁹⁰Iyo uwupfuye, ari uwo mu bantu b’iburyo naho;

⁹¹Mu gihe co gucikana abwirwa ati: “Urakagira iteka n’itekane kuba uri mu bantu b’iburyo”.

⁹²Iyo uwupfuye, ari mu bahakana bivuye inyuma izurwa ry’ibiremwa, bahuvye inzira y’ukuri;

⁹³Azokwakirwa mu muriro wa Jahannamu, aheze azimanwe amazi yasebuye akaryimara;

⁹⁴Maze yinjizwe mu muriro ururumba, aheze awote.

⁹⁵Ntumwa y’Imana! Ibi Tukwiganiye, ni kwo kuri koko kudahinyuzwa.

⁹⁶Muvugishwamana! Ninahaza izina ry’Imana yawe Rurema Allah ku mazina yayo no ku matazirano yayo, Nyenicubahirogisumbavyose.