Qaf

¹1. Qaf. So Allah i Mata-a ko paka-a antapan Niyan non. Ibut ko Qur-an a Susula-an; (ka so Mu­hammad na Sogo o Allah).

²2. Kuna, ka Miyamumusa siran sa kiyapaka-oma kiran o Miyama­ka-iktiyar a pud kiran. Na Pitharo o Miyamangongkir: A giyaya na Shai a piyakamumusa!

³3. Ino amai ka matai tano go mbaloi tano a botha, (khaoyag tano sharoman)? Giyoto na kapakandod a mawatan!

⁴4. Sabunar a katawan Ami so pukhorangun kiran o Lopa; go shi­ si-i Rukami so Daptar a sisiyapun.

⁵5. Kuna, ka piyakambokhag iran so bunar ko kiyapaka-oma niyan kiran: Na siran na matatago ko butad a di thatana.

⁶6. Ba iran da pagilailaya so Lan­git ko kaporowan niran? o anda­manaya i kiyambalaya Mi ron go so kiyapharasi Ami ron, a da-a manga lubo niyan?

⁷7. Go so Lopa a kiyayat Ami sukaniyan, go piyakabukunan Nami oto sa manga Palao, go piya katho Ami ron so pishoson a pakaranon,

⁸8. Inungka, a go Pananadum o omani Oripun a Puphangongonotan (ko Allah).

⁹9. Na piyakatoron Ami a pho-on ko kawang so ig a madakul i gona, na piyakatho Ami sa sabap rukani­yan so manga Pamomolan go so pur a Mapuphuragon;

¹⁰10. Go so manga Qormah a man­ga poporo, a adun a Onga niyan a miyakanggontogontor,

¹¹11. Pagupur ko manga Oripun (o Allah;) go ini oyag Ami oto ko Ingud a ma-atai: Lagid man oto so kaphakagumao (pho-on ko manga kobor).

¹²12. Tomiyaplis ko miya-ona an niran so pagtao Nuh, go so khiba­baling sa (Ingud a) Rassi, go so pagtao a Samood,

¹³13. Go so pagtao a Ad, go so Pir­-aon, go so manga Pagari o Lut,

¹⁴14. Go so khibabaling sa Aikah, go so pagtao o Tobba: Oman i isa kiran na piyakambokhag iyan so manga Rasul, na miyatangkud (kir­an) so siksa Akun.

¹⁵15. Ba Kami minikopai ko Kiya­ pangadun a paganai? Kuna, ka sir­an na matatago ko kashasangka ko Kaphangadun a bago.

¹⁶16. Na Sabunsabunar a Inadun Ami so Manosiya, go katawan Ami so pukhigudi sukaniyan o ginawa niyan: Go Sukami i lubi a marani ron a di so ogat ko bakurung;

¹⁷17. Gowani a puphanorat so dowa a Malaikat, si-i sa kawanan go sa diyowang khi-o ontod;

¹⁸18. Da-a Maputharo iyan a Katharo a ba da-a shisi-i rukaniyan, a tomotonggo a makadadarpa.

¹⁹19. Na mitalingoma o sakratol maot so bunar. Giyoto man so Suka na puphalagoyan Ka sukaniyan!

²⁰20. Na iyopun so Sanggakala: Giyoto man so Alongan a diyandi.

²¹21. Na makaoma so oman i isa a ginawa: A adun a pud iyan a pun­dundugon go saksi.

²²22. (Tharo-on non a:) Sabunsabu­nar a miyatago Ka ko kalilipati sangkai, na piyokas Ami Ruka so mirurunding Ruka, na so Kailaing­ ka sa Alongan nai na malambut!

²³23. Na Tharo-on o (Malaikat a) pud iyan: A giyaya so Kadadarpa­-angko.

²⁴24. (Tharo-on o Allah:) Phoshan­ga niyo a dowa ko Naraka Jahan­nam so omani Miyongkir , a somiyangka,

²⁵25. Phagurun ko mapiya, a Mu­mamalawani, a pukhadowadowa­-an,

²⁶26. A so miyangumba-al sa rim­bang o Allah a pusimbaan a sala­kao: Na poshanga niyo sukaniyan ko siksa a sangat.

²⁷27. Tharo-on o (Shaitan a) pud iyan: Kadnan nami! Da akun dada­ga sukaniyan, na ogaid na miyatago ko kadadag a mawatan.

²⁸28. Tharo-on (o Allah): Adi kano gi-i phapawala ko Hadapan Ko: Ka Sabunar a mini-ona Ko rukano so Kapaka-iktiyar.

²⁹29. Di khasambiyan so Katharo ko Hadapan Ko, go di Akun shalimbotan so manga Oripun (Ko).

³⁰30. Si-i ko Alongan a Tharo-on Ami ko Jahannam: Baka miyapu­no? Na Tharo-on niyan: Ba adun a khiyoman?

³¹31. Na i pakarani so Sorga ko Miyamananggila, a di mawatan:

³²32. Giyaya so idi diyandi rukano, a ruk o omani Puphananangoran (ko Allah) a masiyapun,

³³33. A so ma-alukun ko Masaling­gagao, a Migagaib, go miyaka-oma rakhus o Poso a thotolabos:

³⁴34. Pamanolud kano ron sa ka­pipiya ginawa. Giyaya so Alongan a kakal!

³⁵35. Khakowa iran so nganin a kabaya iran ro-o; go adun a shisi-i Rukami a lawanon.

³⁶36. Na madakul a bininasa Ami ko miya-ona-an niran a pagtao, a siran i mala a di siran i gu-us, go miyanubnub iran so manga lngud! Na ba adun a kiya-a pasan (niran)?

³⁷37. Mata-an! A adun a matatago ro-o man a titho a undao ko tao a ana sabot iyan, ma-ana tiyandang iyan so kapamamakinug, a sukani­yan na tomototo-o.

³⁸38. Na Sabunsabunar a Inadun Ami so manga Langit go so Lopa go so nganin a lut a dowa nan si-i ko num a Alongan, na da Kami raota a dokao.

³⁹39. Na Phantangingka so di iran Tharo-on, go Puthasbikun Ka so Podi o Kadnan Ka, ko di pun ka­ pakasubang o Alongan, go so di niyampun kasudup,

⁴⁰40. Go si-i ko kagagawi-i, na Puthasbik Ka Rukaniyan, go so manga oriyan o Sojiod.

⁴¹41. Na Pamamakinugangka so Alongan a mananawag so phanana­wag ko darpa a marani,-

⁴²42. Si-i ko Alongan a manug iran so lalis a rakhus o bunar: Giyoto man so Alongan a kapakambowat (ko kobor).

⁴³43. Mata-an! A Sukami na Suka­mi i Puphangoyag go Puphangima­tai; go si-i Rukami so khabolosan,-

⁴⁴44. Si-i ko Alongan a manga bubungkag kiran, so Lopa, a gi-i siran makanggaga-an (lomiyo ko manga kobor): Giyoto man i kapu­limod a malbod Rukami.

⁴⁵45. Sukami i lubi a Mata-o ko gi­ i ran Tharo-on; na kuna a ba Ka kiran pakaphama-asa. Na Pakita­dumingka so Qur-an ko tao a ika­ aluk iyan so pangangaluk Akun!