Al-Muddaththir

¹Yaa foom a pil gũm-gũme!

²Yik n bugsi.

³La f Soabã bɩ f waoog-A.

⁴La f futã bɩ f yɩlge.

⁵La rʋbsã bɩ f zãage.

⁶La f ra wa tãasd b Soɑbã, tɩ fo tʋʋm sõms n yɑɑ wʋsg ye.

⁷La f Soabã bɩ f maan sugri.

⁸La b sã n wa fʋʋs Baorgã.

⁹Ad rẽndã, baraarã yaa keelem raare.

¹⁰Kɩfr-dãmbã zugu, pa naana ye.

¹¹Bas-M ne ned ning M sẽn naan-a Yembr tãa, (ɑ pɑ rog ne bɑ fʋɩ).

¹²La M kõ-a arzεk sẽn yalme.

¹³Koamb sẽn zĩ ne-a.

¹⁴La M yadg a yĩnga, yadgr tεkẽ.

¹⁵Rẽ poorẽ t'a maand yã-beed tɩ M paase.

¹⁶Pa woto ye! Ad yẽnda ra yɩɩme ne Tõnd aayayã (tagmas-rãmbã) n yaa koko-kεgeng soaba.

¹⁷M na n modg-a lame ne rʋʋgre (sẽn yɑɑ nɑngo).

¹⁸Ad yẽnda tagsame n mamse.

¹⁹Wẽnd na sãam-a! Yẽ mamsa wãn-wãna?

²⁰Rẽ poorẽ, Wẽnd na sãam-a.

²¹Rẽ poorẽ t'a gese.

²²Rẽ poorẽ a gãnema a nengã n weooge.

²³Rẽ poorẽ a gũda a kuidg n waoog a menga.

²⁴N yeele: "ad wã pa yɩ ralla tɩɩm sẽn yaa kʋdem tɩɩm".

²⁵Ad yãoã pa yɩ ralla bõn-naands goama".

²⁶M na n yõgen-a-la Sakar Bugum.

²⁷La bõe n wilg foom Sakar sẽn ya-a soaba?

²⁸A pa kellde, a pa basd me ye.

²⁹A yõogda yĩns n sobg-a.

³⁰Bee a zugu, ( malεgs) piig la a wae.

³¹La Tõnd pa maan Bugmã gũudbã rẽndame tɩ yaa malεgse, la Tõnd pa yãk b sõorã me rẽnda bugsg ne neb nins sẽn kɩfl-bã, tɩ neb nins b sẽn kõ-b rãmb gafã na bãng n wãage, la neb nins b sẽn kõ-b sɩdã na paas sɩd kũuni, la neb nins b sẽn kõ-b rãmb gafã lɑ sɩd-kõtbã ra wa maan sik ye. La neb nins bãag sẽn be b rãmb sũyẽ wã la kɩfr-dãmbã na yeele: "yaa bõe la Wẽnd rat ne yel-bũnd kãngã!" Yaa woto bala, Wẽnd menemesda A sẽn tʋll-a soab la A kãndgd A sẽn rat-a soaba. Lɑ pa mi fo Soabã tãpã sã n pa Yẽnda, la (Sakar Bugmã) pa yɩ rẽndame tɩ yaa tẽegr ne bõn-naandsã.

³²Pa woto ye! M wẽen ne kiuugã.

³³La M wẽen ne yʋng t'a sã n wa gõd a kuidga.

³⁴La ne yibeoogo, t'a sã n wa vẽege.

³⁵Ad yẽnda (Sakar) yaa yel-bεdã a yembre.

³⁶N yaa bugsg ne ninsaalbã.

³⁷Tɩ ned ning sẽn rat-a yãmb pʋgẽ, t'a maan neer ma a maan wẽnga.

³⁸Yõor fãa gãnegame ne a sẽn tʋm bũmb ninga.

³⁹Rall rɩtg zãma wã neba.

⁴⁰Bãmb bee Arzãn pʋgẽ n sogsd taaba.

⁴¹Nin-wẽnsã yelle.

⁴²Bõe n kẽes yãmb Sakar Bugmã pʋgẽ?

⁴³B yetame: "tõnd ra pa yɩ n yaa pʋʋsdb ye.

⁴⁴Tõnd leb n pa yɩ n da rɩlgd nin-bãan-ned ye.

⁴⁵Tõnd leb n yɩɩme n ra lagem neb nins sẽn da gomd gom-yaalsã.

⁴⁶Tõnd leb n yɩɩme n yagsd Samã yaoob raare,

⁴⁷Hal tɩ vẽenegã (kũumã) wa n wa tõnd nengẽ"

⁴⁸Rẽnd pa nafd bãmba sugsdbã sugsgã ye.

⁴⁹La yaa bõe n tar bãmb tɩ b gõt b zãn-kuids n yit tẽegrã.

⁵⁰Yaa wala bãmb yaa we-bõans sẽn yaeese.

⁵¹N zoet bõnyẽeg yɑeesg yĩnga.

⁵²Pa woto ye! Ned fãa sẽn yi bãmb pʋgẽ ratame tɩ b kõ-a gaf sẽn lagsde. (n wilgd-ɑ t'ɑ Mʋhɑmmɑd yɑɑ tẽn-tʋʋmã)

⁵³Pa woto ye! Ad b pa yaeesd Laahrã ye.

⁵⁴Pa woto ye! Ad a (Alkʋrãanã) yaa tẽegre.

⁵⁵Rẽnd ned ning sẽn tʋll-a bɩ a tẽeg-a.

⁵⁶La pa tõogde, rallame tɩ Wẽnd sã n tʋlla, Yẽ n sõmb ne zoεεga, Yẽ n leb n yaa Yaafg Soaba.