Al-Qalam

¹Nuun,[1] M wẽen ne kaal-moogo, la bũmb ning b sẽn gʋlsdã.

²Fo pa yɩ ne f Soabã neema wã n yaa gãeeng ye.

³La fo tara keoor sẽn pa wãagde.

⁴La foo, fo bee zʋgd sẽn zɩs zugu.

⁵Lɑ fo na yã, la bãmb me na yã.

⁶Yãmb sʋkã b sẽn zarb-a soab t'ɑ yɑɑ gãeengɑ.

⁷Bãng tɩ fo Soabã, Yẽ n yɩɩd minim ne ned ning sẽn menem-a n bas A sorã, Yẽ n leb n yɩɩd minim ne kãndgdbã.

⁸Bɩ f ra tũ yagsdbã ye.

⁹B maana nonglem tɩ fo bars tɩ b me barse.

¹⁰La f ra tũ wẽen toog soab fãa sẽn yaa nin-yaalg ye.

¹¹N yaa zangda, n yaa kẽn-toog soab ne tẽnkãnem.

¹²N yaa sõma gɩdg-toog soaba, n yaa maan-n-zʋʋgd n yaa tʋʋm-beed soaba.

¹³N yaa tõata, rẽ poorẽ n yaa yel-beed soaba.

¹⁴Tɩ bɑlɑ ɑ yɩɩme n ya ligd la koamb soab yĩnga.

¹⁵B sã n karemd a zug Tõnd aayayã a yetame ɑd yɑɑ: "pĩnd rãmb yẽsgo".

¹⁶D na n ning-a-la bãnd a yão-raongã zugu.

¹⁷Tõnd zarba bãmb wala D sẽn zarb pʋʋgã rãmbã, wakat ning b sẽn wa n wẽen tɩ b na kẽeb-a be-vẽegre.

¹⁸La b pa yeel tɩ "Wẽnd sã n sak" ye.

¹⁹Tɩ gilgd gilg a zug sẽn yi fo Soabã nengẽ tɩ bãmb yaa sẽn gõe.

²⁰T'a yik yibeoogã n legb wala yʋʋn-lik.

²¹Tɩ b vẽeg beoog n bool taaba.

²²"Tɩ y sãd-y yã n tʋg yãmb pʋʋgẽ wã tɩ y sã n yaa kẽebdba".

²³Tɩ b yi tɩ bãmb yaa sẽn walamd taaba:

²⁴"Ned kõn kẽ rũndã yãmb nengẽ sẽn ya ninbãan-ned ye".

²⁵Tɩ b sãd pĩndã, n gãd tɩ bãmb yaa tõogdba.

²⁶La wakat ning b sẽn wa n yã-a wã b yeelame: "tõnd tudga zĩiga.

²⁷Pa woto ye! Tõnd yaa b sẽn mong-b rãmba.

²⁸Tɩ sẽn yɩɩd-a ne bʋʋmã yeele: "m da pa yeel yãmba! Yãmb sã n da yɩlg Wẽnde! (pɑ yɩtẽ woto ye)

²⁹Tɩ b yeele:"yɩlgr be ne tõnd Soabã, tõnd da yɩɩme n yaa wẽgdba".

³⁰Tɩ b togl taab n sãbsd taaba.

³¹N yeele: "yaa tõnd wɩɩbdo! Tõnd da yɩɩme n yaa kεdgdba".

³²Sãnd-sãnd tõnd Soabã na tedg ne tõnd sõma sẽn yɩɩd-a, ad tõnd maanda yamleoog n tʋg d Soaba nengẽ.

³³Namsgã me yaa woto bala, la ad Laahr naongã n yɩɩde, tɩ bãmb sã n da miime.

³⁴Ad wẽn-zoetbã tarame b Soabã nengẽ, neema Arzãn-rãmba.

³⁵Rẽ yĩnga tõnd na maan sẽn sak n tũ-bã wala nin-wẽmsã ?

³⁶Yaa bõe n tar yãmb tɩ y bʋʋd woto?

³⁷Bɩ yãmb tara gafo? T'a pʋgẽ la yãmb karemda?

³⁸Tɩ be ne yãmb ɑ pʋgẽ, yãmb sẽn tũusdi.

³⁹Bɩ yãmb tara pʋlems Tõnd zug sẽn ka tεkɑ, n tɩ tãag Rũni yikr raare? Tɩ be rẽ pʋgẽ n yetẽ Ad be ne yãmba, bũmb ning yãmb sẽn tũus n dɑt-ɑ.

⁴⁰Sok-ba: yaa bãmb nin-bʋg n na n reeg a zugẽ ne rẽ?

⁴¹Bɩ bãmb tara lagem-n-taase; bɩ b wa ne b lagem-n-taasã tɩ b sã n yaa sɩd rãmba.

⁴²Raar ning B sẽn na n pidg kargɑ, la b boond bãmb n tʋgd Suguudu tɩ bãmb pa tõe ye.

⁴³Tɩ b nin yaa sẽn nodge, tɩ yaoolg bui-ba. La sɩd la hakɩɩka, b ra yɩɩme n boond-b n tʋgd Suguudã tɩ b ra yaa laafɩ rãmba.

⁴⁴Bɩ f bas Maam ne ned ning sẽn yagsd-a gom-kãensã, D na n paam-b lame zĩig ning b sẽn pa mi.

⁴⁵La M yaoond-b lame, ad Mam rabrã kegmame.

⁴⁶Bɩ fo sokd-b-la keoore, tɩ bãmb be samd pʋgẽ tɩ zɩsg b zugu.

⁴⁷Bɩ bãmb tara sẽn solge, tɩ bãmb gʋlsdẽ.

⁴⁸Bɩ f maan sugr ne f Soabã Bʋʋdã, la f ra wa yɩ wala zĩunfã soab ye; wakat ning a sẽn wa n bool ɑ Soɑbã tɩ yẽnda yaa sũ-toog soaba.

⁴⁹La sã n da pa neema sẽn paam-a, neema sẽn yi a Soabã nengẽ, b rag n na lobg-a weo-raoogẽ t'a yaa b sẽn sãgbs-a soaba.

⁵⁰T'a Soabã tũus-a n ning-a nin-sõmsẽ wã.

⁵¹La sẽn kɩfl-bã ra pẽnegame n na n guug foo ne b ninã, wakat ning b sẽn wa n wʋm Alkʋrãanã, la b yetẽ: "ad a sɩd yaa gãeenga".

⁵²Lɑ Alkʋrãanã pa yɩ, rẽnda tẽegr ne bõn-nãandsã.