Al-Qamar

¹Dũni yikr pẽnegame tɩ kiuugã pãrge(Nɑbiyɑɑmã wɑkɑtẽ wã) tɩ rẽndɑ yɑɑ yelsolemde n kõ nɑbiyɑɑmã pʋʋsg lɑ tɩlgr be ɑ yĩngɑ.

²La b sã n yã yel-soalmã b balldame la b yetẽ: "yaa tɩɩm sẽn duumdi".

³Tɩ b yags la b pʋg b yamleoodo, la yell fãa tara tεka.

⁴La sɩd la hakɩɩka, kibay waa bãmb nengẽ, pεlen-yɩk sẽn be a pʋgẽ.

⁵Bãng-nafa sẽn ta tεka, la bugsg pa nafd ye.

⁶Bɩ f gõd kuidg n bas-ba. Raar ning boaandã sẽn boond n tʋgd yell kɑseng sẽn zɩ n yã.

⁷B ninã yaa sẽn nodg n yit yaadẽ wã, tɩ bãmb yaa wala sʋy sẽn yelge.

⁸N rondgd n rabd boaandẽ wã. Kɩfr-dãmb yetame: "yãoã yaa keelem raare"

⁹A Nuuh nebã ra yagsa bãmb taoore, n yags Tõnd yambã la b yeel tɩ yaa gãeenga, la b yɩk a pεlenga.

¹⁰T'a bool a Soabã: ad mam yaa b sẽn wil-a soaba, bɩ F sõnge.

¹¹Tɩ Tõnd pak saag rag-noyã tɩ yaa koom sẽn kiigdi.

¹²La d pãrg Tẽngã t'a yaa ko-ninim tɩ koomã yek taab yell zug sẽn da korde.

¹³La D rɩk-a ra-pɛgd la bay zugu (koglgo.)

¹⁴T'a zoetẽ, Tõnd nenem pʋgẽ tɩ yaa rolbo, n nɑ n sõng ned ninga b sẽn kɩɩs-a (A Nuuh).

¹⁵La sɩd la hakɩɩka Tõnd bas-a lame t'a yaa yel-soalma, la rẽ yĩnga tẽegd beeme bɩ?

¹⁶La Mam naongã ne M bugsgã yɩɩ wãn-wãna?

¹⁷La sɩd la hakɩɩka Tõnd yolsa Alkʋrãanã tẽegr yĩnga, la tẽegd beeme bɩ?

¹⁸A Aad rãmb yagsame, la Mam naonga ne M bugsgã yɩɩ wãn-wãna?

¹⁹Tõnd tʋmsa seb-kεgeng b zug ra-toog raar sẽn duumdi.

²⁰A lugsda neba, tɩ b yaa wala tamar-tɩɩs yẽg sẽn võoge.

²¹La Mam naongã ne M bugsgã yɩɩ wãn-wãna?

²²La sɩd la hakɩɩka Tõnd yolsa Alkʋrãanã tẽegr yĩnga, la tẽegd beeme bɩɩ?

²³Ad a Ṯamuud rãmb kɩɩsa bugsgã.

²⁴Tɩ b yeele: "ninsaal a yembr tõnd pʋgẽ la tõnd pʋgda? Ad tõnd wakat-kãngã d bee meneng la gãeemd pʋga".

²⁵Rẽ yĩnga b sika tẽn-tʋʋmdã yẽ zug bal tõnd sʋka? A rag n yaa zĩrimbe-neda n yaa waoog-m-meng soaba".

²⁶Beoogo b na bãng ãnd la zĩrimbe-ned n yaa waoog-m-meng soaba.

²⁷Tõnd n tʋms yʋgemdã, tɩ yaa zarbg ne-ba, bɩ f koll-ba la f maan sugri.

²⁸La f togs-b tɩ koomã yaa sẽn pʋɩ bãmb (ne yʋgemdã) sʋka, ned fãa wata a yũub (raare).

²⁹Tɩ b bool b tũud-n-taagã, t'a rɩk (a sʋʋgã) n kõs (-a).

³⁰La Mam naongã ne M bugsgã yɩɩ wãn-wãna?

³¹Tõnd tʋmsa b zug kaas-vuka, tɩ b lebg wala yãgr moodo.

³²La sɩd la hakɩɩka Tõnd yolsa Alkʋrãanã tẽegr yĩnga, la tẽegd beeme bɩ?

³³A Lʋʋt nebã kɩɩsa Bugsgã.

³⁴Tõnd tʋmsa b zug sob-fãeedga, sã n ka a Lʋʋṭ zakã rãmb bala, Tõnd tɩlg-b lame tõd-beoog wakato.

³⁵Yaa neema sẽn yi Tõnd nengẽ, yaa woto bal la D rond sẽn pʋʋs-a barka.

³⁶La sɩd la hakɩɩka, ad a bugs-b lame ne tõnd yõk-kεgengã tɩ b kɩɩs Bugsgã.

³⁷La sɩd la hakɩɩka b ro-a lame t'a bɑs bãmb ne ɑ sãambã, tɩ Tõnd yẽes b ninã, bɩ y lemb Mam namsgã la M Bugsgã.

³⁸Sɩd la hakɩɩka, naong sẽn tabe n vẽeg-b yibeoogo.

³⁹Bɩ y lemb Mam naongã la M Bugsgã.

⁴⁰La sɩd la hakɩɩka Tõnd yolsa Alkʋrãanã tẽegr yĩnga, la tẽegd beeme bɩ?

⁴¹Sɩd la hakɩɩka bugsgã waa a Fɩr-aoon zakã rãmbẽ.

⁴²B yagsa Tõnd yel-soalmã gilli, tɩ Tõnd yõk-b Wilb Naab sẽn yaa Tõogd yõkre.

⁴³Rẽ yĩnga yaa yãmb (Mak) kɩfr-dãmba! yãmb sõmblem n yɩɩd nin-kãeesã bɩ, bɩ yãmb tara põsg zĩig gaf rãmbã pʋgẽ?

⁴⁴Bɩ b yetame: "tõnd yaa zãma, d na tõoge".

⁴⁵B na n sãeega zãma wã tɩ b gõd kuidsi.

⁴⁶Pa woto ye, Dũni wã yikr la b sεka, la Dũni wã yikr me n yɩɩd wẽng la toolem.

⁴⁷Ad nin-wẽnsã bee meneng pʋgẽ la bug-witim.

⁴⁸Raar ning b sẽn na n vuud-b bugmã pʋgẽ b nemsã zugu "lemb-y Sakar sɩɩsgo".

⁴⁹Ad Tõndo, bũmbã fãa D naan-a-la ne geelgo.

⁵⁰La Tõnd yεlã pa yɩ rẽnda vũka, wala nif kamsgo.

⁵¹La sɩd la hakɩɩka Tõnd halka yãmb buudu, la rẽ yĩnga tẽegd beeme bɩ?

⁵²La bũmb fãa b sẽn tʋmã bee gaf rãmbẽ.

⁵³La sẽn paood fãa, la sẽn bedme, gʋlsame.

⁵⁴Ad wẽn-zoεtbã bee arzãn-rãmb pʋsẽ la ko-soodo.

⁵⁵Sɩd zĩndg zĩigẽ, Naab sẽn yaa tõog Soab nengẽ.