An-Nazi'at

¹Idsapa ku (Allah) kanu manga malaikat (a pegketeng kanu ngyawa nu manga taw a di pamalityaya sa kapegketeng a mapasang).

²Idsapa ku (Allah) kanu manga malaikat (a malangkas i kapegkuwanin kanu ngyawa nu manga taw a pamalityaya.

³Endu su manga malaikat a malangkas i kapedtuman nilan kanu suguwan kanilan nu Allah sa benal a malangkas.

⁴Endu su manga malaikat a pegkuyakuya sa kapenggalebek sa kasuguwan kanilan.

⁵Na su manga malaikat a bagatul (sa egkatamanan nu manga kaaden) sa kasuguwan.

⁶Siya kanu gay a paganayan a kayup kanu Sanggakala a makugkung/kumegkel su dunya (na maibped matay su langun nu balangyawa.

⁷Tundugan kanu kaduwa a kayup kanu Sanggakala (egkawyag embalingan su manga balangyawa).

⁸Su manga pusung (nu manga kafir) kanu entuba a gay na egkyab-kyab (kukuken).

⁹Su kapangingilay nilan na luntana (matayungu) (sabap sa gilek ilan kanu entuba gay).

¹⁰Ya nilan madtalu: ngintu makambalingan tanu pamun kanu andangan a mambebetad tanu kanu uliyan nu kapatay tanu?

¹¹Apya yanin kaaden i su manga tulan tanu na mimbubuk den?

¹²Ya nilan edtalun: su entuba a kinawyag nami na kena besen ka uyag-uyag a kalugyan (lugi lumugi).

¹³Ya bu kabpelesing (kagkag) kanu entuba na makaisa bu (kanu ika-duwa a kayup kanu Sanggakala).

¹⁴Na silan bantu kanu entuba a gay na midtudayuk sa ya nilan kinaimaman na siya kanu liyawaw nu bagu den a lupa.

¹⁵Ngintu nakatingguma sa leka (Muhammad) su tudtulan kanu Musa?

¹⁶Kutika a kinatawag sa lekanin nu Kadenan nin siya kanu bawgan a suti a binedtuwan sa Tuwa (bawgan sa palaw sa Sina).

¹⁷"Angay ka lu kani Fir’awn ka saben-sabenal na sekanin na mindupang.

¹⁸Edtalu ka (Musa kani Fir’awn): "Ngintu aden pan sa leka i kadtawbat nengka (kanu manga dusa nengka)?"

¹⁹"Ka tutulun ku seka lu kanu Kadenan nengka na mabaluy a magilek.

²⁰Ulyan nu entu na pinailay ni Musa si Fir’awn sa tanda a masla.

²¹Na pinadalbutin (si Musa) endu sinupakin.

²²Mawli na tinemaligkud na namagayas mawa (na pinatalus nin su kapendupang nin).

²³Na linimudin na nanawag (sa manga taw nin).

²⁴Sa pidtalu nin "Saki su Kadenan nu a mapulu!.”

²⁵Tinumpalak (siniksa) sekanin nu Kadenan (Allah) sa siksa sa akhirat endu siksa sa dunya.

²⁶Saben-sabenal kanu entuba na ibalatan (indawan) a masla kanu entayn i magilek (kanu Allah)

²⁷"Ngintu sekanu den ba i labi i kapasangin a binaluy? Ataw ka su langit a pimbalay nin (Allah)?"

²⁸Inipulu nu Allah su langit sa dala daway nin.

²⁹Endu pinagkenemin su magabi nin endu pinagkaliwanagin su malamagin.

³⁰Endu su lupa kanu uliyan a entuba na binelatin.

³¹Pinambuwat nin su manga ig, manga utan.

³²Endu su manga palaw sa inipasekin ku lupa.

³³Kawyagan nu sekanu endu su manga pangangayamen nu.

³⁴Na amengka makawma den su bangkit a masla (gay a mawli).

³⁵Gay a mendudulugud nu manusya su langun nu nanggalebekin (magidsan i mapya endu mawag).

³⁶Endu ebpapayag den su apuy sa jaheem siya kanu entayn i dayt a makailay lun.

³⁷Makapantag kanu entayn i mindupang.

³⁸Endu inilabi nin su uyag-uyag sa dunya.

³⁹Na saben-sabenal na su apuy sa naraka jaheem na entuba i kadtakenanin.

⁴⁰Endu makapantag menem kanu entayn i inikagilek in su kapangadap in kanu Kadenan in (Allah), endu kinumpen nin su ginawa nin kanu nafsu hawa.

⁴¹Na saben-sabenal na su surga i kadtakenan in.

⁴²Ibpagidsa nilan sa leka (Muhammad) kanu i kawma nu bangkit?

⁴³Na kena man seka i dayt a makalabit lun.

⁴⁴Su Kadenan nengka (Allah) i pegkatawkataw lun.

⁴⁵Ya bu man leka na kabpanginggilek kanu entayn i magilek kanu gay a mawli.

⁴⁶Kataw nilan kanu kinawget ilan sa dunya na nalalamagan bu ataw ka nagagabyan.