الحاقة
The Inevitable • 52 ayahs • Meccan
بِسْمِ ٱللَّهِ ٱلرَّحْمَٰنِ ٱلرَّحِيمِ
1Su gay a mawli.
2Ngin i pidtalu a gay a mawli?
3Na di nengka gatawan (Muhammad) u ngin i pidtalu a gay a mawli.
4Pinandalbut ni Thamud endu si Aad su gay a mawli.
5Ya inibinasa kanu Thamud na kilat a mapasang i suwara nin.
6Endu ya menem inibinasa kanu Aad na sambel a sangat i kabagel nin.
7Nadayun su sambel sa nakapitu a magabi na nakawalu a malmag sa midtundug-tundug, ya nengka kailay kanu manga taw na nakadempas sa nakailing sa kayu na kulma a nangalundus.
8Da mailay nengka (Muhammad) sa kanilan a nasama a bibyag.
9Endu nakatundug menem su Fir’awn endu su nawna pan sa lekanin endu su taw nu dalpa (nu Lut) a madakel a galebek a supak.
10Sinangka nilan su sinugu nu Kadenan sa kanilan, na bininasa nu Allah silan sa muna pan i kapasang nin kanu nawna.
11Saben-sabenal su kinadegan na pinapageda nami (kanu awang nu Nuh) a penggampung.
12(Namba a nanggula) na binaluy nami a indawan sa lekanu endu di kalimpangan nu tangila a di makalimpang.
13Na amayka yupen den su sanggakala sa makaisa.
14Endu makapulu su lupa endu su palaw na malupet tanan sa makadsalengan pan.
15Entu den ba su kabangkit sa dunya.
16Endu malupet den su langit, entuba i kagkalubay nin.
17Endu su manga malaikat na sya sa embala-bala, endu su pebpusay kanu Arsh kanu pulu nilan na walu.
18Entu ba a gay na pagitungen den su manga galebekan nu sa da makapagena sa lekanu.
19Entayn i tampal sa kawanan nin i kakwa nin kanu kitab nin na nya nin madtalu: sya kanu ka batyan tanu su kitab ku.
20Ka di ebplis na mawma ku su kapagitung sa laki a malemu.
21Sekanin na dalem a uyag-uyag a kasuwatan nin.
22Lu sa dalem na surga a mapulu.
23Su manga unga na kayu na masiken kanu pegkawa lun (mawma kumwa).
24(Na ya edtalun sa kanilan): kan kanu endu inum kanu sa mapya i ginawa nu sabap kanu nangawna a galebek nu (lu sa dunya a mapya).
25Su taw menem a tampal sa biwang i nasunguwan nu kitab nin na ya nin madtalu: nya ba ka dala den inggay salaki i kitab ku.
26Ka endu dala ku den katawi i kapagitung sa galebek ku.
27(Ya nin mapanganganay): entuba ka napasad aku den sa kinapatay ku sa di aku den makambuwat.
28Da natagan nin salaki su tamuk ku.
29Na-awa den sa laki su bagel ku.
30(Edtalun nu Allah kanu malaikat): kwa nu anan ka bulikes nu.
31Mawli na iludep nu sa naraka.
32Mawli na lu menem kanu lantay-lantay a pitu-pulu ka siku isagkal (bagiketan).
33Saben-sabenal a entu a manga taw na di bangimbenal kanu Allah a masla.
34Endu di masugu su ginawa nin sa kapakan kanu miskinan.
35Na da den sa lekanin saguna i pagali a makambarapantag sa lekanin.
36Endu da pan makan nin a salakaw kanu dana nu sa taw sa naraka.
37Da makakan sa nan ya tabya su baradusa.
38Inidsapa nu Allah su binaluy nin a egkailay.
39Endu su binaluy a masulen.
40Su Qur’an a kadtalu nu sinugu a mapulu a malimu.
41Endu di kena kadtalu nu pababayuk, na paydu i mangimbenal.
42Endu di kena kadtalu na taw a edtaw-taw, na paydu i ka-indaw nin.
43Nakatulun ebpun kanu Kadenan nu dunya.
44Umana bu ka midtetebu su (Muhammad) sa edtebu nin sa lekami.
45Na binasan nami den sekanin sa bagel.
46Mawli na tebpeden nami sa lekanin su ugat a pepatayan.
47Na da sa lekanu apya sakataw i makapangalaw lun.
48Endu saben-sabenal (su Qur’an) na indawan kanu magilek.
49Endu saben-sabenal a katawan nami i kaped sa lekanu na pendalbut.
50Endu saben-sabenal a ma-antang-antang su manga kafir.
51Endu saben-sabenal su Qur’an na benal gayd.
52Tasbih ka su ngala nu Kadenan nengka a masla.