ق
Qaf • 45 ayahs • Meccan
بِسْمِ ٱللَّهِ ٱلرَّحْمَٰنِ ٱلرَّحِيمِ
1Qaaf (su Allah i mataw kanu ma’na nin), saki (su Allah) idsapa ku su Qur’an a mapulu.
2Ugayd na nagayp (su manga taw) sa nakawma sa kanilan i papegkagilek a bangsa nilan bun, ya pidtalu nu manga kafir: nya den i isa a makagayp.
3Upama ka matay tanu na libubuk tanu den, na mawatan i makambuwat tanu pan.
4Saben-sabenal a natawan nami su ped kanu lumpukan nilan, endu sya sa lekami su kitab a nasulatan kanilan (Lawh al-Mahfuz).
5Ugayd na pinandalbut nilan su haqq guna makawma sa kanilan, ka silan na mimbida-bida (ped kanilan na dala edtalu sa sih’r).
6Ngintu di nilan gadsuliman su langit kanu pulu nilan upama manan i kinambalay nami lun? Endu dala manga pesu nin dala palos nin.
7Endu su lupa sa binelat nami, endu aden manga palaw nin a di gapalin, endu aden pan bagetu a embalang-balang a mapya i palas nin.
8Bagilayan endu ipapedtadem kanu langun nu ulipen a baratawbat.
9Endu pinatulun nami pan kanu langit su ig a barakat (ulan) na pinatu’ nami su bamangetu’ endu su lagas a gapapagani.
10Endu su kayu-kulma a malambeg, aden pusu nin a mindalalapis.
11Rizki nu manga ulipen, endu inuyag nami pan sabap kanu ulan su dalpa a minatay, na mamba i kawyag sa kambuwat (sa kubur).
12Napandalbut su nawna sa kanilan mana su taw nu Nuh endu su manga taw a kigkuwan sa kalut endu su Thamud.
13Endu su Aad endu su Fir’awn endu su pagali nu Lut.
14Endu su manga taw a kigkuwan sa lipunget endu su taw nu Tuba, pinandalbut nilan su manga sinugu, na wagib su tyuba sa kanilan.
15(Tig nu Allah): dala kami malugat sa kinabaluy nami sa dunya paganay, endu di kami pan galugat kabaguyagen kanu bu, ugayd na penduwa-duwa kanu.
16Endu saben-sabenal a binaluy nami su manusya na katawan nami su bityala nu ginawa nin, endu sekami (Allah) na muna pan i kasupeg nami sa ugat nu lig nilan.
17Su duwa a malaikat, tampal sa kawanan su isa, su isa na tampal sa biwang, na bagagayan silan duwa.
18Da kadtalu nu taw a di kena kadtulikan nilan a pakasulat.
19Endu nakawma su langut u kapatay sa haqq, (edtalun sa lekanin): nya ba su gay a banaligkudan nengka.
20Endu yupen su sanggakala na namba a gay na siksa su manga kafir.
21Endu makawma kanu uman isa (i malaikat) a pedtundug lun endu pedsaksi lun.
22Endu saben-sabenal (lu sa dunya) na inidtalipenda nengka i nyaba na saguna ini-awa nami su pakadalung sa leka, su mata nengka saguna na mailay nin su siksa nengka.
23Endu edtalun (u malaikat): nya den ba su laki a tinuganul.
24(Endu edtalun nilan): iyulug nu sa naraka su langun na kafir a sinumupak.
25Midsingit sa mapya, matibaba, penduwa-duwa.
26Silan na minumbal sa kadenan nilan a salakaw sa Allah, isumek nu san kanu siksa a sangat i kapasang nin.
27Ya edtalun nu shaytan: Kadenan ku di kena ku sekanin pinasibay ugayd na andang bun a natading sekanin sa mawatan.
28Edtalun nu (Allah): Da kanu pendapata sa hadapan ku, ka inilu ku sa lekanu su bandingan sa kapasang a siksa.
29Di kasambyan sya sa laki su kadtalu, endu da sa laki i kadupang ku kanu manga ulipen ku.
30Su gay na edtalun nu Allah kanu naraka: nginan napenu ka den? Ya kadtalu nu naraka: enduken aden pan ibaguman?
31Endu pibpalasan su surga endu inisupeg kanu magilek sa Allah sa di kena mawatan.
32(Edtalun sa kanilan): nya ba su inibpasad sa lekanu kanu bara-tawbat a timuganul sa agama.
33Entayn i magilek sa Allah sa gayb, endu su pusung nin a midtawbat.
34Ludep kanu (sa surga) sa sagyahatra kanu, entuba gay na dala kadtamanan nin.
35Sa kanilan i pegkyugan nilan sa surga, na aden pan ibaguman (sa kanilan i manga mapya).
36Endu madakel i bininasa nami a dalpa a nawna, a ya pan mabagel sa lekanu a nakapangilay sya kanu manga dalpa sa kapalaguyan nilan.
37Saben-sabenal a langun a entuba na indawan kanu aden pusung nin atawaka su nanuliman a mibpegu i pusung nin.
38Endu saben-sabenal a binaluy nami su manga langit endu lupa endu su pageletan nin na naka-nem gay, endu dala kami malugat.
39Tigkeli ka (Muhammad) su kadtalu nilan, endu tasbih ka kanu kadenan nengka sa di pan makasebang su senang endu di pan makasedep.
40Endu sya kanu sabad ku magabi na suti ka su Allah endu sya kanu mga ulyanan u manga sugyud .
41Endu panuliman ka su gay a mananawag su banawag a masupeg.
42Su gay a makineg nilan (su ikaduwa) kayup kanu sanggakala, namba su gay a kalyu.
43Saben-sabenal a sekami na baguyag a bangimatay, sekami bun i kambalinganan.
44Gay a kambutekad nu lupa sa mangagan gayd i kalyu nilan, namba su gay a kambulig, na malemu gayd sa lekami intu.
45Sekami i mataw sa langun a kadtalu nilan, endu dala sa leka (Muhammad) i kapameges, pangindaw ka kanu (Qur’an) su taw a magilek kanu naraka.