Al-Furqan

¹Mahasuti su Allah a pinatulun nin su Qur’an kanu ulipen nin (Muhammad) ka endu nin makapangenggat kanu manga inaden sya sa dunya.

²Lekanin su pitu ka lapis a langit endu su lupa endu dala wata nin, endu dala kaped nin kanu kadatu nin endu binaluy nin su langun na enggaga-isa sa inukul nin tanan.

³Silan a minumbal sa kadenan a salakaw sa Allah na dala gabaluy nin (su barahala) apiya paydu a silan pan i bagumabalen na dala magaga nilan sa ginawa nilan a makagkayd endu dala magaga nilan a ka-imatay endu kawyag endu dala magaga nilan a kapambuwat sa taw.

⁴Endu pidtalu nu manga kafir: dala inan (Qur’an) ya tabiya na kalbutan bu ni (Muhammad), inidtebu nin endu tinabangan sekanin a ped a taw, saben- sabenal a silan i migkafir a mindalbut.

⁵Endu pidtalu nilan: namba (Qur’an) na kalbutan nu nangawna a inisulat nin na pambatyan sa lekanin sa mapita-malulem.

⁶Edtalu ka (Muhammad) sa kanilan: su (Qur’an) na pinatulu nu Allah a katawanin i masulen kanu manga langit endu su lupa, su Allah na mangampun a malimu.

⁷Endu pidtalu nilan: ngin i man a sinugu ka ya nin pegken na su ped bun a pegken tanu endu belalakaw sya sa padyan? U namba ka initulun sa lekanin i malaikat a mabaluy a makatabang sa lekanin.

⁸Ataw ka namba ka inenggan sa ginadung (kakawasan) ataw ka pamulan sa lu ba kumwa sa kanen nin, endu pidtalu nu manga kafir kanu manga bamaginugut: dala inan a mama (Muhammad) a bagunutan nu anan ya tabya na nasugat na sih’r.

⁹Ilay ka (Muhammad) su upaman nilan sa leka ka natading silan, na di nilan magaga i makatuntul silan sa agama.

¹⁰Mahasuti su Allah, u ya nin kyug i baluyan kanin sa muna pan i kapya nin a surga a belagilay sa kababan i manga ig ataw ka baluyan kanin sa maligay na magaga nin.

¹¹Ugayd na pinandalbut nilan su gay a mawli, endu pinagadilan ami kanu di bangimbenal sa gay a mawli i naraka a pagkaleg.

¹²Amayka mailay nilan sa mawatan pan na makineg nilan i bula-bula nin a lipunget i gabales nin endu swara a mapasang.

¹³Amayka iyulug den silan kanu bengawan nin a masimpit sa pinawik su lima nilan kanu tengu nilan, mananawag sa nabinasa tanu.

¹⁴Edtalun nu Allah: da kanu banawag sa nabinasa kanu sa maka-isa bu, ugayd na ya nu edtalu na nabina-binasa kami den.

¹⁵Edtalu ka (Muhammad) ka nilan: ngintu entuba i mapya (na siksa antu) ataw ka su surga a tatap? Entuba i inibpasad kanu magilek sa Allah na su surga i kanilan a balas endu kawliyan.

¹⁶Kanilan kanu surga endaw a kalilinyan nilan, sa da kaliyu nilan, na aden kanu kadenan nengka i pasad a mapanuntul.

¹⁷Endu su gay a buligen silan nu Allah endu su pedsimban nilan a salakaw sa Allah (barahala) na edtalun nu Allah sa kanilan: ngintu sekanu i tinumading kanu manga ulipen ku a namba ataw ka silan bun i midtadingan sa lalan (Islam).

¹⁸Ya nilan edtalun: mahasuti ka, ka di dayt sa lekami i mumbal kami sa salakaw sa leka a manga kadenan, ugayd na inikalimu nengka silan sa mapya a katamanan nilan endu su manga lukes nilan, taman sa nalimpangan nilan su Qur’an na silan i manga taw a nangabinasa.

¹⁹Na pinandalbut kanu pedsimban nu (barahala) kanu pedtalun nu, na dala magaga nu a katulak nu sa siksa endu makasapal sa kanaraka nu, entayn sa lekanu i egkafir na pananamen nami sa siksa a masla.

²⁰Endu dala sinugu nami a nawna sa leka (Muhammad) a manga sinugu ya tabya na pegkan bun silan endu belalakaw bun sa padiyan endu binaluy nami su sabad sa lekanu sa mafitnah nin su kaped nin, ngintu makadsabar kanu? Endu su Kadenan nengka na pedtulik.

²¹Endu pidtalu nu manga taw a di gatagu sa ginawa nilan su ka-adap nin sa lekami: U nya ba ka ya pinatulun sa lekami i malaikat ataw ka ya nami mailay su Kadenan nami, na saben-sabenal a mimamasla su ginawa nilan endu mibpapulu silan sa masla a kinabpapulu.

²²Gay a mailay nilan i malaikat (edtalun nu malaikat): da mapya kanu manga kafir endu lumindung silan kanu manga malaikat.

²³(Tig nu Allah): ini-una nami su galebek nilan sa dunya, na binaluy nami sa gay a mawli na matag nilan mailay na dala besen (balas nin).

²⁴Su taw sa surga kanu gay a kaludep nilan na mapya gayd a kadtakenan nilan endu mapya gayd i papedsalidepan nilan.

²⁵Endu su gay a malundus i uman i langit (na mangawlug) i dadtem a maputi endu tumulun su manga malaikat magubal den su dunya.

²⁶Su kadatu sa entuba a gay a bantang na kanu Allah endu entuba a gay na sangat i kapasangin kanu manga kafir.

²⁷Endu su gay a mabut nu kafir su duwa a lima nin sa ya nin madtalu: kanugunin (ka entuba) ka ya ku den mun napaginugutan na su rasul.

²⁸Duwan-duwan ku den ya ku tumu i da ku mabpakat si kwana.

²⁹Saben-sabenal a tinadin aku nin kanu Qur’an sa ulyan na kinawma nin sa laki endu su shaytan na ibalusak nin su manusya.

³⁰Endu ya kadtalu nu sinugu: Kadenan ku, su manga taw ku na tinagak nilan su Qur’an sa dala pinatagan nilan lun kanu panduwanin.

³¹Endu mamba i kinabaluy nami kanu uman i nabi na aden satru nin kanu manga baradusa, endu natabwan kanu kadenan nengka i tumutulu endu tumabang.

³²Endu pidtalu nu manga kafir: u namba ka naka-isa bu nakatulun sa lekanin su Qur’an, (tig nu Allah): mamba i kadtakena nin kanu atay nengka (Muhammad) na paydu-paydu i kinabatya nami lun sa leka.

³³Endu da pambuwaten nilan a manga upaman a di kena lawanan nami sa bantang endu ya pan labi i kapya na kapayag nin.

³⁴Entuba i manga taw a bagulugen sa patuy lu sa naraka endu silan i mawag i kandalpanin endu tading sa lalan sya sa dunya.

³⁵Endu saben-sabenal a inenggay nami kanu Musa su kitab (Taurat) endu binaluy nami su suled nin a si Harun a pedtabang sa lekanin.

³⁶Na pidtalu nami: angay kanu (duwa) sa manga taw a pinandalbut nilan su manga ayatan nami, na bininasa nami silan guna su da silan pangimbenal.

³⁷Endu su manga taw nu Nuh guna nilan pandalbuta su manga sinugu na pina-geled ami silan endu binaluy nami a tanda kanu manga taw, endu inipagadila nami kanu manga kafir su siksa a sangat i kasakit nin.

³⁸(Endu labit ka Muhammad) su taw nu Aad endu su Thamud endu su taw nu Shu’aib endu madakel i manga taw sa pageletan nilan (bininasa ka dala pangimbenal).

³⁹Uman isa na pinambuwatan nami sa upaman, na langun nilan na bininasa nami silan sa ulyan na kinawma na sinugu a da nilan pangimbenala.

⁴⁰Endu saben-sabenal a nawma nilan su dalpa (ni Lut) a nasugat na ulan a makabinasa (watu endu apuy) na ngintu ka di silan ma-indaw sa kinailay nilan kanu dalpa a nabalikwat? Kagina dala sa kanilan i kabangimbenal sa mawyag pan i taw a minatay den.

⁴¹U nailay sa kanilan (Muhammad) na pagumpaken ka kanilan bu, ya nilan kadtalu: namba besen i pinambuwat nu Allah a sinugu?

⁴²Pabpagendan nin sa lekitanu su manga kadenan tanu? U di kena bu minanged kanu pamusungan tanu (na kadenan tanu), na di ebplis na katawan nilan kanu kailay nilan sa siksa nilan na natading silan sa lalan.

⁴³Su taw a ya nin sinimba su kyug na ginawa nin, na di nengka (Muhammad) magaga sa matutulu nengka.

⁴⁴Ataw ka ma-antap nengka i madakel i banuliman sa kanilan ataw ka bagungangen? Na di kena! Ka mana bun silan manga binatang endu muna pan silan sa binatang i kinatading nin.

⁴⁵Ngintu di nengka gailay su galebek nu Allah u panun i kapegka-aden nu alung-alung? Na u ya nin kahanda i makatelen na entuba i manggula, mawli na binaluy nami su senang a tanda nu alung-alung.

⁴⁶Mawli na pegkwan nami so alung-alung sa paydu-paydu.

⁴⁷Sekanin (a Allah) i minaluy sa lekanu sa kanu magabi a dalinding nu endu su kapedtulug nu a ibangintelen nu endu su malamag a imbukakalu.

⁴⁸Endu sekanin i pedsugu sa sambel a lilini nu manga taw kanu limu nu Allah endu pinatulun nami ebpun sa langit su ig a suti maka-suti.

⁴⁹Ibaguyag nami kanu dalpa a minatay endu ipabpaginum nami kanu binaluy nami a manga binatang endu manga manusya a madakel.

⁵⁰Endu saben-sabenal na pinapayapat nami kanu pamageletan nilan ka endu silan ma-indaw, na ya madakel sa taw na minenda (da talima) ya tabya na kinagkafir.

⁵¹U pigkahanda nami bu na uman i dalpa na aden rasul nin.

⁵²Na di ka baginuguti su manga kafir endu in-jihad engka silan sa masla (su Qur’an).

⁵³Endu sekanin (Allah) i napendulug sa tabang (a ig) endu lagat, su isa a tabang na baginumen, su isa na matimus, aden pageletan nilan a pagalet endu makasapal sa di nilan kadsimbul.

⁵⁴Endu sekanin (Allah) i minaluy sa lekanu ebpun sa ig (ig nu babay-mama) endu binaluy nin i katupuwan nin endu kanggyagyamung nu, endu ya ka-aden nu Kadenan nengka na pakagaga.

⁵⁵Endu (silan) a pedsimban nilan i salakaw sa Allah a di pakangguna sa kanilan endu di bun makagkayd sa kanilan, su manga kafir na su kadenan nin a (barahala) na pedtabangan nu shaytan kanu inugut nin (sa makasupak).

⁵⁶Endu dala sinugu nami a di kena papegkalilini ataw ka papegkagilek.

⁵⁷Edtalu ka sa kanilan i di aku papedsukay sa kapedsampay ku (kanu Islam) ya tabya na su taw a pambaranggyan nin i tamuk nin sa lalan sa Allah (ka di ku sapalan).

⁵⁸Endu salig ka kanu Allah a di matay endu tasbih ka sa pugi sa lekanin (Allah), su Allah i mataw sa kadusan nu manga ulipen nin.

⁵⁹Sekanin (Allah) i minaluy kanu manga langit endu su lupa, endu su pageletan nin sa nem gay, mawli na lu migkahanda kanu Arsh, na sekanin i minggungala sa Rahman, na idsa nengka (Muhammad) sa lekanin ka sekanin i mataw kanu langun.

⁶⁰Amayka pidtalu sa kanilan i sugyud kanu sa kanu Rahman, na ya nilan kadtalu: ngin i Rahman? Sumugyud kami sa suguwan nengka (Muhammad)? (di kami a benal sumugyud), naisegan i kinatangka nilan (sa Islam).

⁶¹Mahasuti su Allah a binaluy nin sya sa langit i manga lalan nu bitun, endu binaluy nin i senang endu ulan-ulan a pedsigay.

⁶²Endu binaluy nin su magabi endu malamag a pedsukelya kanu taw a myug makatadem ataw ka myug sa kadsukur.

⁶³Endu su ulipen nu Allah na belakaw silan kanu lupa sa dala kasandag nin endu amayka imbityala nu manga jahil na mapya i kasumpat nin.

⁶⁴Endu silan na kanu magabi nilan na sumugyud endu tumindeg ka banunuwat sa Allah.

⁶⁵Endu ya nilan kadtalu na: Kadenan ami iyawa nengka sa lekami i siksa nu jahannam ka su siksa nin na ya nin ka aden na di gapinda sa taman sa taman.

⁶⁶Endu ngin den i kawag nin a kabetadan a kadtangenan.

⁶⁷Endu silan (mu'min) na amayka mimbaranggya sa Allah na da makasagad endu di kena menem da gaws, endaw i nasasangan.

⁶⁸Endu di silan mangeni sa salakaw sa Allah ka dala kaduwa nin su Allah a pedsimban nilan endu di silan mimatay kanu nyawa a hinaram nu Allah, ya tabya na haqq endu di silan edzina, ka su taw a enggulan nin intuba na madsemak nin i dusa a kanaraka nin.

⁶⁹Endu takepen sa lekanin i siksa sa gay a mawli endu tatap sa naraka sa nakalusak.

⁷⁰Ya tabya na su midtawbat, nangimbenal a minggalebek sa mapya, ka sambyan nu Allah su kawagan nin sa mapya, ka su Allah na sangat a bangampun a malimu.

⁷¹Su taw a midtawbat endu minggalebek sa mapya na lu sa Allah edtawbat sa tidtu a kadtawbat.

⁷²Endu di silan edsaksi sa kalbutan endu amayka nasagadan nilan i mawag (a kambityala) na mapya i kasagad nilan.

⁷³Endu amayka linabit sa kanilan su manga ayatan nu kadenan nilan na di silan embisu-ebpisekan.

⁷⁴Endu kadtalu nilan: Kadenan ami enggi kami sya kanu manga kaluma nami sa manga mawli-a-taw a kalilinyan nu manga mata nami, endu baluy ka a kaunutan nu manga magilek sa Allah.

⁷⁵Silan i pembalasan sa pangkatan a mapulu (surga) sabap sa kinadsabar nilan endu mabaratamu nilan i mapya kadtalu.

⁷⁶Dala sa kanilan i kalyu sa surga, mapya gayd a kabetadan a kadtangenan i kanilan.

⁷⁷Edtalu ka (Muhammad) sa kanilan: da idan nu Kadenan ku sa lekanu u di kena bu su kapendu’a nu, ka pinandalbut nu su sinugu nin endu su Qur’an, na di ebplis na matatap su siksa.