Al-Isra

¹Mahasuti su napalakaw (Allah) kanu ulipen nin (Muhammad) sa magabi, ganat sa Masjidil Haram taman lu sa Masjidil Aqsa a pinambarakat nami su embala-bala lun, ka ipabpagilay nami sa lekanin (Muhammad) su manga tanda nami, saben-sabenal sekanin a Allah i pakakineg a pakailay.

²Endu inenggay nami kani Musa su kitab endu binaluy nami a tutulu kanu tupu nu Israel sa da kanu mamaluli sa salakaw sa Allah i saligan nu.

³Mawli a taw nu a pinapapageda kanu Nuh, ka sekanin na ulipen nu Allah a barasukur.

⁴Endu pinakatawan nami bun kanu manga tupu nu Israel kanu kitab a Taurat i maminasa kanu sya sa lupa sa makaduwa, endu ebpapulu kanu sa masla a kabpapulu.

⁵Na amayka mawma den su isa kanu duwa, na pambuwaten nami sa lekanu i ulipen nami a mapasang endu mabagel i kambunuwa nin, na dalidipenin su langun u pamageletan u dalpa, endu pasad into a di ebplis na manggula.

⁶Mawli na imbalingan nami sa lekanu su kapeges kanilan, endu pagkadakelen nami sa lekanu su manga tamuk endu manga wata, endu binaluy nami sekanu i madakel i bilanganin nin.

⁷(Edtalu ka) amayka ebpiya-piya kanu na ginawa nu bun i migkapiya, endu amayka migkawag kanu (mindupang) na ginawa nu bun (i masiksa), na amayka nawma su pasad (kaduwa a kandupang) na egkenem su manga biyas nu sa lidu na ginawa, endu ludepan nilan su Masjidil Aqsa sa mana bun su nawna a kinaludep nilan, endu maminasa sa sangat a kapaminasa.

⁸(Inipayag u Allah kanu Taurat) sa basi ikalimu kanu bun u Kadenan nu, endu amayka edsaluman kanu na edsalumanan nami bun sekanu, endu binaluy nami su jahannam kanu manga kafir i ikam nilan.

⁹Saben-sabenal su Qur’an na pedtutulu sa lalan a pinakamatidtu, endu papegkalilini kanu manga mu'min, a silan i penggalebek sa manga mapya, na benal a kanilan su balas a mapya a masla.

¹⁰Endu saben-sabenal su di bangimbenal sa gay a mawli na pidtatalenganan nami sa kanilan su siksa a mapasang.

¹¹Endu in-du’a nu taw sa mawag (su galipungetanin) sa mana bun su kapamagayasin sa kand’ua nin sa kanu makapiya kanu ginawa nin, su manusya na masasaw (di matigkel a bukasu).

¹²Endu binaluy nami su magabi endu malamag a duwa a tanda (a kapegkagaga) na pinunas nami su sigay nu magabi (sa ulan-ulan) endu binaluy nami su sigay nu malamag sa pakapailay, ka endu mapangilay su limu nu Allah ebpun sa Kadenan nu, endu katawan su bilangan nu manga lagun endu su bilangan u manga ulan-ulan (manga gay) endu langun u enggaga- isa na inipayag nami san sa (Qur’an) sa mapayag.

¹³Endu uman i manusya na nambalig nin su kitab (sinulatan) kanu galebekin kanu tengu nin, sa palyun nami sa lekanin (bukatan sa kasangulan nin) sa mabaratemu nin sa mapayag.

¹⁴(Edtalun sa lekanin): batya ka i kitab nengka sa natabuwan, saguna a gay sa igkila-kila sa leka.

¹⁵Su tinumuntul sa (Islam) na ginawa nin bun i nakatuntul, su midtadingan na ya nin bun tinading su ginawa nin, endu di mandusa na isa i dusa na ped in, endu di kami sumiksa endu mapa-surga taman a di kami pan makapambuwat sa sinugu.

¹⁶Endu amayka egkahandan nami i binasan nami i dalpa na pagkadakelen nami su mapya i katamanan nin, ka lumyu silan sa inugut (semupak) na wagib bu lawa su siksa kanilan nabinasa bu lawa silan.

¹⁷Endu di bu pila-pila i bininasa nami kanu nangawna (a manga taw) sa ulyan ni Nuh, endu su Kadenan nengka i pedtyakap kanu manga kadusan nu manga ulipenin, a mataw (su Allah) a pakailay.

¹⁸Su myug sa limu sa sagugunay na enggaganan nami (menggay) sa kanu kalilinyan in sa endaw bu i kyug ami kanu pegkyugan nami bu menem, mawli na binaluy nami sa lekanin su jahannam a kaludepan nin a mawag gayd sa nakatangka sa limu nu Allah.

¹⁹Su ya nin menem kyugan su akhirat endu pinamikalanin sa galebek (a mapya) na sekanin na mu'min, na silan i manga taw a langun a galebekanin na pidsukuran.

²⁰Uman isa kanu duwa (mu'min-kafir) na pembagelen nami kanu rizki nin a ebpun sa Kadenan nengka, ka dala kanu rizki nu Kadenan nengka i ma-haram kanu pedsupak.

²¹Ilay ka (Muhammad) u panun i kinapandadalabya nami kanu sabad kanu ped in (sya sa dunya) endu lu sa akhirat i masla a pangkatan (pahala), endu masla a kandadalabya (di kena mana bu sya sa dunya).

²²Da ka mumbal sa isa a kadenan a lyu sa Allah, ka maka-ayan ka sa kalusak i mabpalas nengka.

²³Endu inibpalyugat u Kadenan nengka i da kanu sumimba ya tabiya na su Allah, endu kabpiyapiya sa duwa-mimbata, na amayka masawt na katuwa silan duwa na san sa leka atawa sakataw kanilan na di ka bu mangagkag silan endu di ka silan edtegasi, endu ya ka edtalu (kambityala) kanilan na kadtalu a mananaw.

²⁴Endu imbaba nengka kanilan su ula-ula (su palangay) sabap kanu limu, endu edtalu ka: Kadenan ku, ikalimu nengka silan sa mana su kinakalimu nilan sa laki (kinatyakap nilan) sa manawt aku pan.

²⁵Su Kadenan nu i mataw sa kanu dalem nu ginawa nu, amayka sekanu ka manga mapya kanu (edtidtu kanu) na sekanin a Allah na bangampun kanu manga taw a baratawbat.

²⁶Endu inggay nengka kanu manga pagali nengka su kawagibin, endu su miskinan, endu su natanaw (di pakawli sa dalpa) na da ka (menem) magudal (mapalyu sa tamok a supak sa Islam).

²⁷Saben-sabenal na su taw a magudal na manga pagali nu manga Shaytan, na su Shaytan na supak sa Kadenan nin (di makatadem sa limu).

²⁸Endu amayka di nengka ka-enggan silan (a manga pagali) kanu limu ebpun kanu Kadenan engka na pagangapa ka, sa edtalu ka kanilan i su kadtalu a mapya.

²⁹Endu di ka kemegkem su lima nengka sa ibetad nengka sa tengu nengka (sabap sa kasingit) endu di ka menem pembelat sa dala den masama lun, ka maka-ayan ka (makagkaya ka) sa tilan ka na taw sa pangimbulatan ka.

³⁰Saben-sabenal su Kadenan nengka na belatenin i rizki nin kanu kagkahanda nin endu simpitanin, ka sekanin a Allah kanu manga ulipenin na katawanin na gailay nin.

³¹Endu di nu pembunu su manga wata nu sa gilek sa kamiskin ka sekami i pe-rizki kanilan endu sekanu, su kabununu kanilan na kadusan a masla (sa Allah).

³²Endu di nu semikeni su kadzina (di enggulan su ukit a makadzina) ka su (kadzina) na sangat a maledsik, endu mawag a benal a ukit (a kadtiwalay).

³³Endu di nu pembunu su ngyawa a hinaram nu Allah ya tabiya na haqq, (su pinamakay na Islam a kabunu) ka su taw a binunu sa dinupang (pidtibaban sa dala kawagibin) na binaluy nami kanu wali nin (lukesin-pagalinin) i bagel sa kakwa (katuntut in) sa kawagib, na di nin pasagaden i galebekin (di padsublan su kasuli) ka sekanin na nanget i pedtabangan nu Allah.

³⁴Endu di nu semupegi su tamuk nu yateem (binasan atawa kwan sa di kena kawagib) ya tabiya na muna pan i kapiya nin (sa pagkadakelen) taman sa makasampay sa balig, endu tuman nu i pasadu a mapya, kagina su pasad na ibagidsa (salta na siksa amayka di matuman).

³⁵Endu patidtu nu i kapagasadu amayka nagasad kanu, endu edtimbang kanu sa bantang a matidtu, ka entu ba i mapya, endu mapya i mawli nin.

³⁶Da ka bagamung sa dala leka lun ataw na (dala sabut engka lun) ka su tangila endu su mata na langun a namba na pangingidsan (salta sa naraka).

³⁷Endu da ka belakaw kanu lupa sa kasandagan ka seka na di nengka malesu su lupa sa kadsangkad, endu di nengka kalepengan su palaw sa kapulu.

³⁸Langun a entuba a nalabit na mawag a benal lu sa Kadenan nengka a inisapalin a nabensiyan nin.

³⁹Langun a entu na kaped kanu ini-wahi nu Kadenan nengka sa leka a kadtalu a nanga-atul endu da ka mamaluli salta sa Allah a isa a kadenan ka makasumek ka lu sa naraka a masla i tila nin sa nakatangka sa limu nu Allah.

⁴⁰Ngintu ya bu tinantu nu Kadenan nu sa lekanu (a makagkapiya) na su manga wata a manga mama, endu kanu Allah menem i manga malaikat a babay? Sekanu a manga kafir na saben-sabenal a namba a kadtalu na masla gayd (lu sa Allah i kasiksan nin).

⁴¹Endu saben-sabenal a pidtinatad nami san sa Qur’an banan su manga ibaratan (upaman) ka endu kanu (su di bangimbenal) ma-indaw, na dala pakauman kanilan (a inugut) a di kena (nalunsanan) i kinatangka nilan (kanu Qur’an).

⁴²Edtalu ka (Muhammad): u mana bu ka duwa kataw i Kadenan sa mana su kadtalu nilan na magagawa silan sa Arsh, endu sapalan na isa i kapedin.

⁴³Mahasuti su Allah kanu langun u pedtalu nilan, lepas sekanin, mapulu su Allah sa kapulwa kasla.

⁴⁴Pedtasbih sa lekanin (Allah) su manga langit endu lupa endu su dalemin, endu dala kanu enggaga-isa a di kena pedtasbih sa pugi sa Kadenan nilan, ugayd na di nu kasabutan i tasbih nilan, su Allah na matigkel a bangampun.

⁴⁵Endu amayka binatya nengka su Qur’an, na binaluy nami kanu pageletan nengka sa kanu manga taw a di bangimbenal sa gay a mawli i pagelet a pakadalinding sa leka sa di ka nilan mailay.

⁴⁶Endu binaluy nami i dapeng kanu manga atay nilan a di nilan kasabut lun, endu sya sa tangila nilan su kabisu, endu amayka linabit nenka su Kadenan nengka san sa Qur’an sa isa nin bu (di malabit i barahala nilan) na tumaligkud silan endu mawa silan. (di silan tumalima).

⁴⁷(Tig nu Allah): Sekami na katawan nami su bakikinegen nilan amayka bakikineg silan sa leka (Muhammad), endu silan na bamagedunga silan sa ya nilan pedtalun (manga kafir): dala sa bagunutan nu banan tabiya na mama a nasugat a pakayd.

⁴⁸Ilay ka (Muhammad) i kapamelagid nilan sa leka sa embalang-balangan a upaman, na natading silan, di nilan magaga i makatuntul silan sa sa lalan (a bantang)

⁴⁹Endu ya nilan kadtalu na u nagubal su tulan tanu (naldak) na libubuk su badan tanu, na ditanu den makambwat sa mabagu tanu pamun.

⁵⁰Edtalu ka (Muhammad) apiya watu kanu pan atawa putaw kanu (makambwat kanu).

⁵¹Atawa muna pan sa putaw a masla den sa ginawa nu, na ya nilan den edtalun: kanu i kawma na namba (Muhammad) endu entayn i mapambalingan sa lekami? Edtalu ka: su minaluy sa lekanu paganay, na iteku nilan sa leka su ulu nilan sa ungat (bagungat) bu, endu edtalun nilan: kanu i namba? Edtalu ka kanilan: basi masupeg (mangagan) di kena den mawatan i kawma nin.

⁵²Gay a katawag sa lekanu na makasumpat kanu sa pugi sa Allah, endu ma-antap i paydu bu ged i kinadtangen nu sa kubur (ataw sya sa dunya).

⁵³Edtalu ka kanu manga ulipen ku i ya nilan edtalun na mapya, ka saben-sabenal su Shaytan na pembinasa kanu pamageletan nilan, ka su Shaytan na satru (kuntra) nu manusya a mapayag.

⁵⁴Su Kadenan nu i mataw sa lekanu sa yanin kyug i ikalimu kanu nin atawa siksan kanu nin, endu di kena ya nami kinasugu sa leka sa kanilan i pedtyakap ka.

⁵⁵Endu su Kadenan nengka i mataw kanu dalem nu manga langit endu su lupa, endu saben- sabenal a pinandadalabya nami su ped kanu manga nabi kanu kaped lun, endu inenggay nami kanu Daud su Zabur.

⁵⁶Edtalu ka (Muhammad) i tawagen nilan su pedsimban nilan a salakaw sa Allah, na di nin kamilikan sa makapa-awa nin su pakagkayd sa lekanu, endu di nin magaga mapasibay su pakagkayd sa lekanu.

⁵⁷Silan a manga taw a pedsimba (sa barahala) na pedtuntut sa Kadenan nilan sa titayan a makasupeg silan (Allah) endu baginagkay silan sa limu nu Kadenan nin, endu kagilekan sa siksa nin, ka benal su siksa nu Kadenan nengka na ingatan.

⁵⁸Endu da dalpa a di kena sekami bun i pembinasa lun sa unan a (di pan gauma) i gay a mawli, atawa sekami bun i sumiksa kanu taw nin sa siksa a mapasang, langun a entuba na lu sa Lawh Al-Mahfudh nakasulat.

⁵⁹Endu da nakasapal sa lekami sa papaytan nami silan sa siksa, ya tabiya na kinapandalbut u nangawna kanilan, endu inenggay nami kanu (taw) nu Thamud su unta a babay a kailay sa mapayag na pindupangan nilan (sinumbali), endu da kapedsugu nami kanu manga siksa kanu dupang, ya tabiya na ipapegkagilek.

⁶⁰Endu pidtalu nami sa leka: su Kadenan nengka na langkap kanu manga taw, endu dala nami baluya su gangailay a inipailay nami sa leka (kanu mi'raj) ya tabiya na fitnah (ipembatalu) kanu manga taw, endu su kayu a namulkan san sa Qur’an (zaqqum), endu papegkagilekan nami silan, na dala nakawman kanilan (kapaginugut) ya tabiya na kinandupang a masla.

⁶¹Endu labit ka kanilan su kinadtalu nami kanu malaikat sa sugyudi nu si Adam, na sinumugyud silan ya tabiya na si Iblis, ka ya nin pidtalu: enduken ka paka-sugyud aku sa yanin asal na lupa?

⁶²Tig nu Iblis: ipailay nengka sa laki Kadenan ku i namba pinakapulu nengka anan sa laki ka amayka pakalendun nengka i umur ku taman sa gay a mawli na tadingeng ku i manga mawli a taw nin, ya tabiya na paydu bu kanilan (i di ku matading).

⁶³(Tig nu Allah): lu ka den ka entayn i munut sa leka na saben-sabenal su naraka jahannam i balas nu a balas a dala kulangin.

⁶⁴Endu enggat ka i magaga nengka kanilan kanu suwara nengka (manga sengal/music, langun a supak sa Allah), endu tawag ka silan kanu (tantara) a pakukuda nengka endu su pelalakaw (a pembunu kanu manga mu'min) endu amungi ka silan kanu manga tamuk ilan (pantiyali a haram) endu su manga wata nilan (ka bagusal kanu babay sa haram) endu pagakali ka den silan, ka da kapadulatan nu Shaytan ya tabiya na su sya bu i atay nin sa dunya.

⁶⁵(Tig nu Allah): saben-sabenal su ulipen ku na da lalan nengka kanilan (Shaytan) a mabagel sa katading nengka kanilan, Ka su kadenan nengka i pedtuldu kanilan.

⁶⁶Su Kadenan nu i pabpagiseg sa lekanu kanu bageda nu sya sa lagat ka mapangilay nu su limu nin, ka sekanin a Allah na malimu gayd sa lekanu.

⁶⁷Endu amayka kagilekan kanu sa kakagem sya sa lagat, na natading su pedsimban nu ya tabiya na su Allah, guna kanu nin belepasa (kanu kapegkageled) ini-lu kanu sa kapuluwan, na sinemakutu kanu menem, endu ya ka-aden nu manusya na madakel i kakafirin.

⁶⁸Pakagedam kanu sa kalilintad sa da kanu makageled sa lagat, na da kanu malepas sya tampal sa kapuluwan (lupa), atawa ka masugat kanu na sambel (sa apiya da kanu bun makageled sa lagat), mawli na dala bun maparuli nu a tumuldu sa lekanu a salakaw sa Allah.

⁶⁹Atawa da kanu bun malepas u pambalinganen kanu nin sa makaisa, na patibpuan kanu nin sa sambel a mabagel sa ibayug kanu nin sa pageleden kanu nin kanu kapegkafir nu, mawli na dala mapaluli nu a makasapal sa lekami (manga taw a semuli sa lekami).

⁷⁰Endu saben-sabenal a inipulu nami su tupu nu Adam, pinapageda nami silan sa kapuluwan endu lagat, endu rinizkiyan nami silan sa manga mapya, endu inilabi nami silan kanu madakel a binaluy nami sa sampulna a kinalabi.

⁷¹Su gay a tawagen nami i uman isa kanu inunutan nin, na su (taw) a inenggay nami sa lekanin su kitab nin tampal sa kawanan nin na silan na batyan nilan su kitab nilan sa mapya, endu di silan madsalimbut sa apiya paydu.

⁷²Endu su taw a pisek sya sa dunya (di nin mailay su limu nu Allah) na sekanin lu sa akhirat na pisek bun sa lalan.

⁷³Endu saben-sabenal a sinupegan nilan i ka- fitnah sa leka (Muhammad) kanu ini-wahi nami sa leka (Qur’an) ka endu kami nengka kadtebuan sa salakaw kanu wahi, na u nakwa kanilan bu na seka i kalilinyan nilan a tagapeda nilan.

⁷⁴Endu u di kena nami bu seka tinigel na saben- sabenal a paydu bu ged i dala nengka kasalig kanilan.

⁷⁵U nanggula nengka bu su atulan nilan na matakep i siksa nengka sa dunya, endu siksa nengka sa gay a mawli, mawli na dala mapaluli nengka a tumabang sa leka.

⁷⁶Endu sinupegan (panginggileken) ka nilan, ka endu ka nilan makapalyu sa kanu lupa (Makkah), ugayd na kyug nu Allah i kinaganat nengka, endu dala bun kawgeti silan sa ulyan a kinaganat engka. (nabunu silan sa Bad'r).

⁷⁷Mamba i ukit nu Allah kanu sinugu nin a nawna sa leka (Muhammad) endu dala mapaluli nengka kanu ukit nami a makasibay.

⁷⁸Itindeg nengka su sambayang sa kapulid a senang taman sa kasedep na senang (dhuhur, as'r, maghrib, isha) endu (batya ka) su Qur’an kanu faj'r (sambayang a sub'h) ka su Qur’an sya kanu faj'r (kadsambayang sa sub'h) na pedsaksiyan nu manga malaikat.

⁷⁹Endu su ped kanu magabi na tahajjud ka ka sunnat sa leka, ka di ebplis na pambuwaten ka nu Kadenan nengka sa mapulu a pangkatan (lu sa surga).

⁸⁰Endu edtalu ka: Kadenan ku paludep aku sa beludepan a benal (sa Madinah) endu palyu aku sa belyuwan a benal (Makkah) endu enggi aku ebpun sa leka sa tindeg a bagel a makatabang sa laki.

⁸¹Endu edtalu ka: nakawma su bantang na mailang (mapunas) su baatil, ka su baatil na andang a mapunas.

⁸²Endu ipedtulun nami ebpun kanu Qur’an i makauli (makagamut) sa dalu, endu limu kanu manga mu'min, endu dala makawman kanu manga tading a salakaw sa kalugyan.

⁸³Endu amayka inikalimu nami su manusya (a di bangimbenal) na tumaligkud atawa tumangkili sa kadsukur sa Allah amayka dinumalu atawa nakamutu na tinebpekan.

⁸⁴Edtalu ka: uman isa na enggalebeken nin endaw i nalayamanin, na su Kadenan nu i mataw kanu naka-tuntul sa lalan.

⁸⁵Endu su ibagidsa nilan sa leka su ngyawa, edtalu ka: su ngyawa na su Allah i mataw lun, endu da kanu enggay sa kataw, ya tabiya na paydu gayd.

⁸⁶Endu amayka nagkahanda nami i iyawa nami su kataw a wahi nami sa leka (su Qur’an) na dala maparuli nengka a kasaligan nengka lun sa kambalinganin.

⁸⁷Ya tabya na limu ebpun sa Kadenan nengka, saben-sabenal su kalimu nin sa leka na sangat i kasla nin.

⁸⁸Edtalu ka kanilan sa apya embulig su manusya endu su jin sa mapambuat silan sa pagidsan nu Qur’an na di nilan magaga i pagidsanin, apiya pan su sabad kanilan na midtatabanga den silan.

⁸⁹Endu saben-sabenal a pidtinatad nami san sa Qur’an kanu manga taw i langun a ibaratan, na menda bun su kadakelan kanilan (di tumalima) ya tabiya na kagkafir bu.

⁹⁰Endu pidtalu nilan: di nami pangimbenalen seka (Muhammad) taman a di nengka makapambuat sa lekami kanu lupa i manga buwal na ig.

⁹¹Atawa ka ma-aden sa leka i pamulan a kayu kulma endu teneb, endu pambuat ka i manga lawas a ig kanu pamageletan nu pamulan nengka.

⁹²Atawa palundusi kami sa langit, atawa ka pambuat ka su Kadenan nengka endu su manga malaikat sa manga mapayag.

⁹³Atawa ka ma-aden sa leka i walay a dala pagidsanin sa kapiya atawa pusug ka sa langit, na di nami bun pangimbenalen i nakapusug ka sa langit, taman a di nengka makapatulun i kitab a batyan nami, edtalu ka (O Muhammad): mahasuti su Kadenan ku, ka dala sa laki (inan) ya tabiya na manusya aku bu a sinugu.

⁹⁴Endu dala nakasapal kanu manga taw sa kapangimbenal kanu kinauma nu tutulu kanilan ya tabiya na pidtalu nilan na napambuat besen su Allah sa manusya a sinugu (ibagumpak a kadtalu)?

⁹⁵Edtalu ka kanilan u mana bu ka malaikat bu i taw na lupa a lumalakaw sa tumatana, na ya nami bun patulunen kanilan ebpun sa langit na malaikat bun i sugun nami.

⁹⁶Edtalu ka su Allah i saksi kanu pageletan nu, ka sekanin (Allah) na katawanin su manga ulipenin a pakailay kanilan.

⁹⁷Endu su taw a tinutulu nu Allah na entuba i nakatuntul, endu su tadingenin na dala mapaluli nengka kanilan a tumuganul a salakaw sa Allah, endu buligen nami silan sa gay a mawli sa ibaguna i biyas nilan sa naraka sa pisek a maw a bisu, kandalepan nilan i naraka uman mapandeng (su apuy) na umanan menem sa kayaw.

⁹⁸Entu ba i balas nilan kagina migkafir silan kanu manga ayatan nami, pidtalu nilan: u nalupet su tulan tanu endu libubuk (tanu) na makambuat tanu pamun sa bagu mawatan a manggula intu.

⁹⁹Ngintu da nilan mailay su Allah na binaluy nin su manga langit endu su lupa, a magaga nin mumbal i pagidsan nilan, endu binaluy nu Allah kanilan i tadtab a da kabplis nin na mawma (gay a mawli) na minenda su baradusa (da palityala) ya tabiya na sinemupak silan.

¹⁰⁰Edtalu ka (Muhammad): u mana bu ka kagkyug- kyugan su gunsi nu limu nu Kadenan ku na kamalan nu (kapedta nu) sabap sa gilek sa kambaranggya ka su manusya na masingit.

¹⁰¹Endu saben-sabenal a inenggay nami kanu Musa i siyaw ka biyas a manga tanda a manga mapayag, na idsa nengka kanu tupu nu Israel su kutika a nakawma kanilan si Musa na ya pidtalu ni Fir’awn: saki Musa na bagantapen ko seka sa nasugat kana si'hr (pakayd).

¹⁰²Tig nu Musa: natawan nengka i dala nangaden kanu siyaw kabiyas ya tabiya na su Kadenan nu manga langit endu su lupa sa manga tanda a kapeg-kagaga nu Allah? Endu bagantapen ku seka (Fir’awn) sa nalugi ka a nabinasa ka.

¹⁰³Endu nagkahanda (ni Fir’awn) i pawanin silan sa lupa (na Mis’r) na pinageled nami sekanin endu su manga pedin sa langun.

¹⁰⁴Endu pidtalu nami kanu tupu nu Israel kanu ulyanin i endalpa kanu sya sa lupa sa (Mis’r), na amayka makawma su pasad a gay a mawli na pambwaten nami sekanu a midsisimbul.

¹⁰⁵Endu initulun nami su bantang (Qur’an) endu sabap sa bantang na inibaba nami, endu dala kinasugu nami sa leka (Muhammad) ya tabiya na mapakalilini endu mapakagilek.

¹⁰⁶Endu su Qur’an na pinayagan nami (sa mapya-mawag / halal-haram) ka endu nengka mabatya kanu manga taw sa malanat, endu pinatulun nami sa paydu-paydu.

¹⁰⁷Edtalu ka: pangimbenal kanu atawa di, na di kakulangan su manga taw a natawan nilan su Qur’an sa kanu nawna pan, na amayka batyan kanilan na makambaba silan sa kasugyud sa Allah.

¹⁰⁸Endu ya nilan edtalun na mahasuti su Kadenan nami, na saben-sabenal kanu pasad nu Kadenan nami na manggula.

¹⁰⁹Endu imbaba nilan su biyas ilan a bagulyang, endu kadsisinggumanan silan sa gilek sa Allah.

¹¹⁰Edtalu ka: tawag nu su Allah, atawa Al-Rahman, apiya ngin den i ngalanin a itawagu lun na lekanin su manga ngala a mapya, endu di ka gayd mapaka-tanug i kan-du’a nengka, endu di ka menem ped-sulen na ya ka enggula na pageletan na matanug endu di kena matanug.

¹¹¹Endu edtalu ka i langun a pugi endu pedsukuran na lekanin a Allah, da makambata endu da tagapedanin kanu kapegkagaga nin (kadatu nin), endu dala sa lekanin i wali (pedtabang endu pedsaligan), endu pakasla ka sekanin sa sampulna a kapapegkasla.