Al-Ma'arij

¹Ang usa ka mapugsanon, namugos para Silot nga gikatakdang mahitabo,

²Ngadto sa mga manlilimod - walay makapugong niini,

³(Kini) gikan sa Allah, ang Ginoo sa mga Dalan sa Pagsaka.

⁴Ngadto Kaniya musaka ang mga anghel ug ang (balaan) nga espiritu (Gabriel) sulod sa usa ka Adlaw nga ang sukod niini anaa sa kalimaan ka libo ka katuigan "sa inyong ihap".

⁵Busa pagmapailubon (Oh Muhammad) uban sa matahum nga pagpailub[1].

⁶Tan'awa, sila naghunahuna nga hilabihan ka layo (ang adlaw sa Pagkabanhaw).

⁷Apan Kami Naglantaw niini nga duol na.

⁸Sa adlaw nga ang langit mahimong sama sa tinunaw nga tumbaga.

⁹Ug ang kabukiran mahimong sama sa mga balhibo sa karnero.

¹⁰Ug walay higala nga maga-pangu-tana mahitungod sa iyang suod nga higala;

¹¹(Bisan pa) sila makita sa usag-usa. Ang daotan nga tawo magtinguha sa pagtubos sa iyang kaugalingon gikan sa Silot nianang Adlawa pinaagi sa (pagsakripisyo) sa iyang mga anak,

¹²Ug sa iyang asawa ug sa iyang igsoon nga lalake,

¹³Ug sa iyang labing duol nga kaparentehan nga nagpasilong (nagpapuyo) kaniya,

¹⁴Ug ang tanan nga anaa sa yuta, (manghinaut) unya, (nga) kini (tingali unta) makaluwas kaniya.

¹⁵Dili, sa pagkatinuod kini usa ka nagdilaab nga Kalayo,

¹⁶Nga naglangkat sa mga panit sa ulo (ug ang panit sa lawas),

¹⁷Ug magatawag kanila kinsay mitalikod ug mikalagiw (gikan sa Kamatuoran),

¹⁸Ug nagtigum (sa katigayunan) ug nagtipig niini.

¹⁹Ang tawo mao gilalang nga adunay madali-dalion nga kinaiya,

²⁰Walay pailub sa diha nga ang kadautan magsakit kaniya,

²¹Labing hakog, sa diha nga ang maayo muabot kaniya.

²²Gawas niadtong makinasing-kasingon nga nag-ampo,

²³Kadtong makununayon sa ilang mga pag-ampo,

²⁴Kanila nga (sa ilang) bahandi adunay nahibaloan nga katungod ug nakigbahin,

²⁵Ngadto kanila nga manga kabos ug nanginahanglan.

²⁶Ug kadtong mituo sa Adlaw sa 'paghukom ug' Pagbalus;

²⁷Ug kadtong nahadlok sa pagsakit sa ilang Ginoo (Allah),

²⁸Sa pagkatinuod ang Pagsakit sa ilang Ginoo (Allāh), walay bisan kinsa nga mobati nga luwas gikan (niini).

²⁹Ug kadtong nagbantay sa ilang kaputli ug lawasnon nga tinguha (ug pagpanalipod sa ilang pribadong mga bahin sa lawas gikan sa ilegal nga pakighilawas).

³⁰Gawas sa ilang mga asawa o niadtong gipanag-iyahan sa ilang tuong mga kamot (pinaagi sa hustong legal nga mga paagi); kay sa pagkatinuod, sila dili pagabasolon,

³¹Apan siya nga nagtinguha sa labaw pa niini, kini sila mao ang mga malinapason.

³²Ug kanila nga mga nanag-tuman sa ilang mga pagsalig ug saad,

³³Ug kadtong nanag-barog sa ilang mga gipa-matud'an;

³⁴Ug kadtong mga mabinantayon sa ilang mga pag-ampo,

³⁵Sila mao kadtong maga-puyo sa mga tanaman (Paraiso), nga gipasidunggan.

³⁶Apan unsa bay sayop niadtong naglimod (sa Kamatuoran) nga sila naglibot-libot sa imong atubangan,

³⁷Sa tuo ug sa wala nga kamot, nga anaa sa mga pundok?

³⁸Ang matag usa ba kanila nagdahum nga siya makasulod sa Tanaman (Paraiso) sa Kabulahanan?

³⁹Apan dili, sa pagkamatood, Kami naglalang kanila gikan sa matang nga ilang nahibaloan.

⁴⁰Busa ako nanumpa (Allāh) Ginoo sa tanan nga dapit sa mga Sidlakan ug Kasadpan, sa pagkatinuod Kami maka-himo,

⁴¹Aron ilisan sila sa mga tawo nga mas maayo kay kanila, ug dili gayud Kami mabuntog.

⁴²Busa pasagdi sila sa pagpakigsulti nga walay kapuslanan ug maglingaw sa ilang mga kaugalingon, (nagsunod sa ilang ubos nga mga tinguha), hangtud nga sila muatubang sa ilang Adlaw nga gisaad kanila (ang adlaw sa Pagkabanhaw ug sa Paghukom),

⁴³Sa Adlaw diin sila mogula gikan sa ilang mga lubnganan nga nagdali, ingon nga naglumba sa usa ka diosdios ˹para sa usa ka panalangin˺,

⁴⁴Ang ilang mga mata gipaubos; ang kaulawan motabon kanila; kana mao ang Adlaw nga gisaad kanila.