Ad-Dukhan

¹Ha, Meem[1].

²Ako (Dios) nanumpa[2] pinaagi sa tin-aw nga Libro (ang Qur'an):

³Sa pagkatinuod, Among gipakanaog kining (Qur’an) sa usa ka bulahan nga kagabion[3]. Sa pagkatinuod Kami kanunay nga magpasidaan (sa katawhan ug jinn).

⁴Niini (nga kagabion) gihimo nga tin-aw (takda) ang matag butang[4].

⁵Pina'agi sa Mando nga gikan Kanamo; sa pagkatinuod Kami mao ang mga Nagpadala (sa mga mensahero),

⁶Ingon nga Kaluoy gikan sa imong Ginoo. Sa pagkatinuod, Siya mao ang Labing Makadungog sa Tanan, ang Labing Nakahibalo sa Tanan.

⁷Ang Ginoo sa mga langit ug yuta, ug sa tanan nga anaa sa taliwala niini, kon kamo adunay pagtoo nga adunay sigurado[5].

⁸Walay dios (nga takos simbahon) gawas Kaniya 'Allāh'. Siya ang naghatag ug kinabuhi ug nagpahinabog kamatayon, (Siya ang) inyong Ginoo, ug ang Ginoo sa inyong mga katigulangan.

⁹Apan sila anaa sa pagduhaduha, nga nagpatuyang sa ilang kaugalingon (sa kalibutanon) nga mga tinguha, naglingaw sa ilang kaugalingon.

¹⁰Busa padayon sa paghulat sa adlaw nga ang langit magdala ug masanag nga aso, nga makita sa tin-aw -

¹¹Nga maga-lukop sa katawhan. Mao kini ang usa ka sakit nga Pag-antos.

¹²Among Ginoo 'Allāh', ipalayo kanamo kini maong pag-antos; sa pagkatinuod, kami mga magtotoo.

¹³Unsaon pa man nga paagi alang kanila sa pag-pulos sa pahinumdom, sa diha nga ang usa ka mensahero (ang Propeta Muhammad) nga miabut na kanila, nga nagpatin-aw sa mga butang sa tin-aw,

¹⁴Apan sila mitalikod kaniya ug miingon: "Siya usa kinsa tudloan, ug giyawaan."

¹⁵Sa pagkatinuod, Kami magwagtang sa Pag-antos sa makadiyot, (apan) kamo kasigurohan nga mobalik (sa pagkadaotan).

¹⁶Busa sa adlaw nga Kami maga-dakop (kanila) uban sa labing dako nga Pagsakmit; sa pagkatinuod, Kami kanila maga-balos!

¹⁷Una kay kanila Among gisulayan katawohan ni Paraon, ug dihay mianhi kanila nga usa ka halangdon nga mensahero (Moises) "nagdapit kanila sa pagtuo sa pagkausa ni Allāh ug sa pagsimba Kaniya lamang",

¹⁸Nag-ingon: "Ipahi'uli kanako ang mga ulipon sa Allah (ang mga anak sa Israel), sa pagkatinuod ako usa ka matinud-anon nga Mensahero nganha kaninyo,

¹⁹Ayaw pagpasigarbo batok sa pagsimba si Allāh; sa pagkatinuod Ako mianhi kaninyo uban sa tin-aw nga awtoridad (katungod);

²⁰Ug sa pagkatinuod ako nagpasalipod sa (Allah nga) akong Ginoo ug inyong Ginoo, kay tingali unya kamo mobato kanako ngadto sa kamatayon (o mobiaybiay kanako):

²¹Kon kamo dili maga-too kanako, nan, pasagdi na lamang ako.

²²Unya (sa katapusan) si Moises mitu'aw sa iyang Ginoo (Allāh, nga nag-ingon): "Mao kini 'katawohan ni Paraon', ug labing dautan nga katawhan[6]."

²³Busa lakaw uban sa Akong mga ulipon (ang mga anak sa Israel) sa kagabion; sa pagkatinuod kamo gigukod:

²⁴Ug biyai ang dagat nga malinawon ug nabahin; sa pagkatinuod sila (katawhan ni Paraon) usa ka panon nga malumos.

²⁵Unsa kadaghan sa mga tanaman ug mga tubod ang ilang gibiyaan?

²⁶Ug mga uma sa trigo ug halangdon nga mga dapit?

²⁷Ug mga maayong butang nga ilang gikalipay?

²⁸Sa ingon niini (kini nahitabo), ug Kami mihatag kanila ingon nga kabilin ngadto sa lain nga mga katawhan (ang mga anak sa Israel).

²⁹Busa ang langit ug ang yuta wala maghilak alang kanila (Paraon ug sa iyang katawohan sa diha nga sila nangalumos), ni sila nahatagan ug lugway "sa paghinulsol".

³⁰Sa pagkatinuod, Kami miluwas sa mga anak sa Israel gikan sa makauulaw nga pag-antos,

³¹Gikan kang Paraon. Sa pagkatinuod, siya usa ka tinuod nga malupigon, usa ka malapason.

³²Ug sa pagkatinuod Kami nagpili kanila (ang mga anak sa Israel) ibabaw sa mga nasud (sa ilang kapanahonan), uban sa kasayuran.

³³Ug Kami mihatag kanila sa mga Timaan diin adunay tin-aw nga pagsulay.

³⁴Sa pagkatinuod, kini (mga manlilimod) nag-ingon:

³⁵"Wala nay lain gawas sa atong unang kamatayon ug kita dili na mabanhaw."

³⁶Busa dad-a (pabalik sa kinabuhi) ang among mga katigulangan, kon kamo nagsulti sa tinuod[7].

³⁷Sila ba mas maayo o ang katawhan sa Tubba ug kadtong nauna kanila? Kami naglaglag kanila (tungod sa ilang mga sala), kay sa pagkatinuod sila mga masupilon.

³⁸Kami wala magbuhat sa mga langit ug sa yuta ug sa unsay anaa sa taliwala kanila sa walay kapuslanan nga panagdula (nga walay tumong ug katuyoan).

³⁹Kami wala maglalang niini gawas nga alang sa Kamatuoran 'ug katuyoan', apan kadaghanan kanila wala mahibalo.

⁴⁰Sa pagkatinuod, ang Adlaw sa Paghukom mao ang ilang tinudlong panahon, alang kanilang tanan.

⁴¹Ang Adlaw nga diin ang usa ka higala dili makabenepisyo (sa iyang) higala nga bisan unsa, ni sila matabangan,

⁴²Gawas niadtong Kanila nga ang Allah adunay Kalooy; sa pagkatinuod Siya mao ang Labing Gamhanan ang Labing Maluluy-on.

⁴³Sa pagkatinuod, ang kahoy sa Zaqqum,

⁴⁴Mao ang pagkaon sa makasasala,

⁴⁵Sama sa nagabukal nga lana; kini magbukal sa (ilang) mga tiyan,

⁴⁶​​Sama sa pagpabukal sa init nga tubig.

⁴⁷Dakpa siya, ug guyora siya ngadto sa tunga-tunga sa Imperno;

⁴⁸Unya bu’boi ang ibabaw sa iyang ulo sa silot sa nagbukal nga tubig:

⁴⁹Tilawi kini; ikaw nga nag-isip sa imong kaugalingon nga hilabihan kagamhanan, ug kahalangdon!

⁵⁰Sa pagkatinuod, mao kini (Silot) imong giduhaduhaan ug gilalisan kaniadto.

⁵¹Sa pagkatinuod, ang mga matarung maanaa sa luwas nga dapit,

⁵²Sa mga tanaman ug mga tubod;

⁵³Sila magsul-ob sa pino ug baga nga seda, (nga naglingkod nga malipayon) nag-atubangay;

⁵⁴Sa ingon niini (kini mahitabo), ug Kami magpapangasawa (magpaminyo) kanila ngadto sa mga maanyag (nga mga babaye sa Paraiso) nga adunay lapad, ug matahum nga mga mata.

⁵⁵Sila maga-tawag sa matag-bunga uban ang kalinaw ug luwas.

⁵⁶Didto (sa Paraiso) wala na'y kamatayon, gawas sa na-una nga kamatayon (sa kalibutan), ug Siya maga-luwas kanila gikan sa nag-lagiting nga Kalayo sa Imperno,

⁵⁷Ingon nga usa ka gasa ug panalangin gikan sa (Allah) nga inyong Ginoo; mao kini ang dakong kalampusan.

⁵⁸Busa Kami naghimo niini (nga Qur’an) sayon sa imong dila, aron sila makahinumdom.

⁵⁹Busa paghulat (sa Kamanduan sa Allāh); sa pagkatinuod sila usab naghulat[8].