Al-Ma'arij

¹Obisafoͻ bi abisa fa asotwee a εrebesi –

²Ama boniayεfoͻ no a, ɛnni obi a obɛsi ho kwan no ho asεm.

³(Saa asotwee no) firi Sorokͻ akwan Wura Nyankopͻn no hͻ.

⁴Soro abͻfoͻ ne Honhom no (Gabriel) de dakoro fro kͻ Nehͻ a nensusueε yε (wiase nsusueε) mfie mpem aduonum.

⁵Enti (Nkͻmhyεni), si aboterε, aboterε pa (a yaw die anaa apenesie biara nni ho).

⁶Nokorε sε wͻhunu (asotwee) no wͻ akyiri kyiri.

⁷Ɛna Yεnso Yεhunu no sε abεn.

⁸Ɛda a ͻsoro bεyε sε yaawa a ananee,

⁹Na mmepͻ nso bεyε sε aboa nwii a εrehu korͻ,

¹⁰(Saa Da no) adamfoͻ mmisa adamfoͻ (asεm).

¹¹Wͻbɛhu wͻn ho deε. Ɔbͻneni no bεpε mpo sε, anka saa Da no asotwee no, ͻde ne ba bεyε mpata,

¹²Ne neyere ne nenua,

¹³Ne n'abusuani a ͻyεε no yie,

¹⁴Ne deε εwͻ asaase so nyinaa na afei wanya ne ho (afri asotwee no mu).

¹⁵Daabi, (εnyε yie saa), nokorε sε εyε Amane-hunu gya noa.

¹⁶Ɛworͻ (onipa) tiri ho nwoma (ne nehonam wedeε no nyinaa ma ԑkͻto ne nnompe).

¹⁷(Egya no) refrε obi a obrekyi, na ͻdane neho fri (Nokorε no) ho kͻ,

¹⁸Na ͻboa sika ano na ͻyε ho pεpεε (anaa ͻbͻ hoo ayεmuͻnyono).

¹⁹Nokorε sε, onipa suban ne sԑ, ᴐyԑ mpepreho. (Ɔpε biribiara ntεm).

²⁰Sε bͻne bi to no a, na n’aba mu abu (anaasε na w’apa aba).

²¹Sε papa bi nso to no a, na wabu n’ani agu (n’asεdeε) so.

²²Gyesε Nyamefrε foͻ no,

²³Wͻn a wͻkuta wͻn Nyamefrε mu daadaa no.

²⁴Ne wͻn a wͻn agyapadeε mu asεdeε bi a yahyehyε (sε wͻyi dema) wͻ mu--

²⁵Dema aserεfoͻ ne mmͻborͻwafoͻ no;

²⁶Ne wͻn a wͻgye Atemmuda no die,

²⁷Ne wͻn a wͻsuro wͻn Wura Nyankopͻn asotwee no.

²⁸Efirisε, wͻn Wura Nyankopͻn asotwee no nnyε abodweε asεm koraa

²⁹Ne wͻn a wͻhwε wͻn mmarima so yie.

³⁰Gyesε wͻn yere nom (nko ara so), anaasε wͻn mfenaa a wͻyε wͻn dea. Saa nkorͻfoͻ no deε nokorԑ sԑ wͻ’nni soboͻ biara.

³¹(Na mmom) obi a obefri (mmaa a yakyerε mu) yi akyi akͻpε foforͻ no, saa nkorͻfoͻ no ne wͻn a w’ato mmara no.

³²Ne wͻn a wͻdi nokorε wͻ nhwεsodeε a yεde ahyε wͻn nsa, san di wͻn bͻhyε soͻ,

³³Ne wͻn a wͻgyina pintinn di nokorε wͻ wͻn adansedie mu,

³⁴Ne wͻn a wͻhwε wͻn Nyamefrε so yie.

³⁵Saa nkorͻfoͻ no na wͻbεtena Aheman no mu wͻ animuonyam mu no.

³⁶Ԑdeεn na εha boniayεfoᴐ no a enti wᴐrepere wᴐn ho ba wohͻ, atwetwe wᴐn kᴐn ahahaa wᴐn ani atwa wo ho ahyia-

³⁷Akuo-akuo wᴐ nifa so ne benkum soᴐ yi?

³⁸Enti wͻn mu nnipa biara pε sε ͻkͻ Anigyeε Aheman no mu (wͻ aberε a ͻnnyε ho adwuma)?

³⁹Daabi da, nokorε sε wͻnim adeε a Yεbͻͻ wͻn frii mu.

⁴⁰Enti Mede Apueε ahodoᴐ no ne Atͻeε ahodoᴐ no Wura Nyankopͻn di nse sε: Nokorε, Yεwͻ tumi

⁴¹Sε Yεsesa wͻn de wͻn a wͻyε kyεn wͻn bεhyε wͻn anan mu, na εno ntumi mmu mfa yεn so, (anaasε εnnyε den mma Yεn).

⁴²Enti (Nkͻmhyεni), wodeε gyae wͻn ma wͻn keka wͻn nsεm hunu no, na wͻn ni agorͻ nkosi sε wͻ behyia wͻn Da a yahyε wͻn ho bͻ no.

⁴³Ɛda no a wͻde ahoͻherε bepue afri adakamena mu, na wᴐbԑyԑ tesε deε wͻrekͻ faako a wͻn anidaasoͻ bi wͻ no.

⁴⁴Wͻn ani bewu, na animguaseε bεmene wͻn. Saa Da no na yahyε wͻn ho bᴐ no.