Al-Haqqah

¹Nokorε paa no.

²Ɛdeεn ne Nokorε paa no?

³Na εdeεn na εbεkyerε wo sεdeε Nokorε paa no si teε:

⁴Samuudfoͻ ne Aadfoͻ faa Mobͻmuu, Dede ne Gyegyeegye Da no sԑ atorᴐsԑm.

⁵Enti Samuudfoͻ no, yεde Nteamu denden bi a εborosoͻ na εsεee wͻn.

⁶Aadfoͻ no nso yεde mframa bͻne huhuuhu bi a εpͻ soͻ na εsεee wͻn.

⁷(Mframa no) toaa so bͻͻ wͻn anadwo (nna) nson ne adekyeε (nna) nwͻtwe, na εhͻ na wohunu nkorͻfoͻ no sε wͻdeda hͻ te sε akyiresua dua (anaasε bεtene) a tokuro da mu hoo.

⁸Enti wahunu wͻn mu bi nea ͻkaaeε ?

⁹Ɛna Farao ne wͻn a wͻdii n’anim kan no, ne nkuro bi a yεdanee wͻn butuuε no nso de bͻne baae,

¹⁰Wͻyεε wͻn Wura Nyankopͻn Asomafoͻ no asεm ho asoͻden, enti Ͻde asotwee a emu yε den twee wͻn aso.

¹¹Nokorε sε, εberε a nsuo no yiriiε (wͻ Noa pεn soͻ) no, Yεde motenaa nsuo mu hyεn mu,

¹²Sεdeε Yεde bεyε afutusεm ama mo, na obi a ͻwͻ aso de bεto ne tri mu.

¹³Sε yεbͻ Totorobεnto no mu bͻ prεko a,

¹⁴Na yεpagya asaase ne mmepͻ, na εyam yam prεko a,

¹⁵Saa Da no na εberε no aso.

¹⁶Ɔsoro mu bɛsunsuan wͻ saa Da no ama no ayε mmrε, (n’ahoͻden no bεsa).

¹⁷Na Soro abͻfoͻ bɛgyina-gyina ne ntweaso, na (Soro abͻfoͻ) nwͻtwe na wͻbεsoa wo Wura Nyankopͻn Ahennwa no wͻ wͻn apampamu saa da no.

¹⁸Saa Da no, yεde mobεba (mo Wura Nyankopͻn anim), na momu biara asumasεm nsuma.

¹⁹Enti obi a, yεde (ne dwumadie ho) Nwoma bεma no wͻ ne nsa nifa mu no, (ͻde anigyeε) bεka sε: “Momra mεgye me Nwoma no nkenkan bi.

²⁰Na menim yie sε, mehyia m’akontabuo.

²¹Enti ɔbɛnya ahotͻ asetena--

²²Wͻ Aheman a εkorͻn no mu.

²³Emu nnuaba no bεn (wͻn).

²⁴(Yεbεka akyerε wͻn sε): “Monfa anigyeε nnidi na monom, εnam deε moyε de too moanim wͻ nna a atwa mu no mu no nti,

²⁵Na mmom obi a yεde ne Nwoma bεma no wͻ ne nsa benkum mu no, ͻbεka sε: Ɛkaa menko a, anka yɛanfa me Nwoma no amma me koraa.

²⁶Mennim sεdeε m’akontabuo bɛsi ayε.

²⁷Kaa menko na anka (mawu) ama asεm asa.

²⁸M'ahonyadeε ho amma me mfasoͻ.

²⁹Me tumii afri me nsa.

³⁰(Yεbεka akyerε Soro abͻfoͻ no sε): ”Monsͻ ne mu, na mongu no mpokyerε.

³¹Afei monfa no nwura Amanehunu gya no mu,

³²Afei monfa nkͻnsͻnkͻnsͻn a ne tenten yε basamu aduͻson no nkyekyere no.

³³Nokorε sε, na ͻnnye Nyankopͻn Kεseε no nni.

³⁴Na ͻnhyε ma wͻnnidi mma ahiafoͻ no bi.

³⁵Enti Ɛnnε deε onni ͻdͻfo biara wͻ ha,

³⁶Onni aduane nso (a ɔbɛdie), gyesε akuro mu nsuo (ne efii),

³⁷Obiara nni hͻ a ɔbɛdie gyesε abͻnefoͻ no.

³⁸Mede adeε a moani hunu,

³⁹Ne adeε a moani nhunu di nse sε:

⁴⁰Nokorε, (Qur’aan) yε Ɔsomafoͻ Nimuonyamfoͻ (Gebriel) no asεm,

⁴¹Na εnyε ͻdwomtoni asεm. Mo gyidie a εwͻ mu no sua.

⁴²Na εnyε ntafowayifoͻ nso kasaa, - εho adwen a modwen no sua.

⁴³(Qur’aan) yε Adiyisεm a efiri Abͻdeε nyinaa Wura Nyankopͻn no hͻ.

⁴⁴Sε anka (Nkͻmhyεni) abͻ ne trim aka atorͻsεm bi ato Yεn so a,

⁴⁵Anka Yɛasͻ ne mu wͻ ne nsa nifa,

⁴⁶Na Yɛatwa n’akoma nkomena mu afri ne ho,

⁴⁷Na mo mu biara nnihͻ a, anka ɔbɛtumi asi Yεn ne ho kwan.

⁴⁸Nokorε sε (Qur’aan) yε Afutusεm ma Nyame-surofoͻ no.

⁴⁹Na nokorε sε, Yɛnim yie sε, mo mu binom wͻ hͻ a wͻnnye nnie.

⁵⁰Nokorɛ sɛ (Qur’aan) yε akomasεeε ma boniayεfoͻ no.

⁵¹Ampa nso sε, εno ne Nokorε pefee no.

⁵²Enti bͻ wo Wura Nyankopͻn Kεseε no abodin.