Ad-Dukhan

¹Hɑɑ miim[1]

²Ne gaf-vẽenegã.

³Ad Tõnd sik-a-la yʋng pʋgẽ sẽn yaa bark yʋngo, ad Tõnd yɩɩme n yaa bugsdba.

⁴Yʋʋn-kãngɑ pʋgẽ la b welgd yell buud fãa sẽn bʋ n manege.

⁵Tɩ yaa sagls sẽn yi Tõnd nengẽ, ad Tõnd yɩɩme n yaa Tʋmsdba.

⁶Tɩ yaa yolsg sẽn yi fo Soabã nengẽ; ad Yẽnda la Wʋmd n ya Mita.

⁷Yaa saasã lɑ tẽngã, la sẽn be b yiibã sʋk Soɑbã, yãmb sã n yaa bãng-n-wãak rãmba, bɩ y kõ sɩd ne Mɑm tẽn-tʋʋmã.

⁸Soab ka be sẽn na n tũ n tɩlg tɩ pa Yẽ ye, A kʋʋdame la A vʋʋgdẽ, yaa yãmb Soaba, yaa y baaba-rãmb sẽn reng taoor me Soaba.

⁹Pa woto ye, bãmb bee sik pʋgẽ n reemdẽ.

¹⁰Bɩ f koll-ba, raar ning saagã sẽn na n wa n yaa wulwuku tɩ yɑɑ vẽenega.

¹¹N buiid fo nebã, lɑ b yet-bɑ, ad wãnde yaa namsg sẽn zabde,

¹²"D Soab a Wẽnde! Pãrg naongã n bas-do, ad tõnd yaa sɩd-kõtba"

¹³La tẽegr na n nafa bãmb wãn-wãna tɩ tẽn-tʋʋm sẽn yaa vẽeneg ra waa bãmb nengẽ!

¹⁴Rẽ poorẽ tɩ bãmb gõd b zãn-kuids n bas-a la b yeele: " yɑɑ karem-biig sẽn yaa gãeenga".

¹⁵Ad Tõnd na n pãrga naongã bilfu, ad y na n le lebame.

¹⁶Raar ning sẽn na n wẽoog-b wẽoog kεgengã, ad Tõnd yaa sɩbgdba.

¹⁷La sɩd la hakɩɩka, Tõnd zarba sẽn reng bãmb taoore, a Fɩr-aoon nebã, tɩ tẽn-tʋʋm wagell wa b nengẽ.

¹⁸(n yeel-ba:) "bas-y Wẽnd yembsã tɩ b wa mam nengẽ, tɩ mam yaa tẽn-tʋʋm sẽn yaa vẽeneg ne yãmba".

¹⁹La y ra zẽk y mens ne Wẽnd ye, ad mam na n waa ne daliil (vẽnegr) sẽn yaa vẽeneg yãmb nengẽ.

²⁰La ad mam kota gũudum ne m Soabã la yãmb Soabã, tɩ y ra wa lob-m ye.

²¹La yãmb sã n ka kõ sɩd ne maam, bɩ y ball n bas-ma.

²²T'a na n bool a Soabã, (n yeele): "bãmbã yaa nin-wẽnse"

²³T'A yeele: "yi ne M yembsã n bob yʋngo, ad b na n pʋga yãmba."

²⁴La f bas mogrã hãoo tɩ ad b yaa tãp b sẽn na n bõr-b".

²⁵Sõor waoog b sẽn bas sẽn yaa pʋt la ko-nin.

²⁶La kood la zags sẽn yaa wagla.

²⁷La neema-rãmb b sẽn da be beenẽ n wʋmsd noogo.

²⁸Yaa woto bala, la Tõnd rɩka b faadã n kõ neb a taaba.

²⁹La saag la tẽng pa kũm b yĩng ye, b pa yɩ me n ya b sẽn na n koll-b rãmb ye.

³⁰La sɩd la hakɩɩka Tõnd tɩlga ɭsraεεl koambã n yi naon-yaandga.

³¹N yi a Fɩr-aoona, ad a yɩɩme n yaa zẽk-m-meng soab maan-n-zʋʋk rãmbã pʋgẽ.

³²La ad Tõnd tũus-b lame, Tõnd minim pʋgẽ, bõn-nandsã fãa zugu.

³³La D kõ-b yel-soalem-rãmba, tɩ zarb-n-gɛsg sẽn ya vẽeneg sẽn be a pʋgẽ.

³⁴Ad bãmbã sẽn kɩɩsd Yikrã na yeele:

³⁵"Ad vɩɩm kɑbe rẽndame tɩ yaa tõnd kũ-rãeengã bala, tõnd pa yɩ n yaa b sẽn na n yik-b rãmb ye."

³⁶Bɩ y wa ne tõnd baaba-rãmbã tɩ y sã n yaa sɩd-rãmb.

³⁷La bãmb sõmblem n yɩɩd bɩ yaa Tʋba'ɑ nebã la sẽn reng-b bãmb taoorã? Tõnd halk-b lame, ad b yɩɩme n yaa wẽngdba.

³⁸La Tõnd pa naan saasã la tẽngã la sẽn be b yiibã sʋkã reem yĩng ye.

³⁹Tõnd pa naan b yiibã ralla ne sɩda, la ad b wʋsgã fãa pa mi ye.

⁴⁰Ad Welgrã Raar la b fãa kɛp sεka.

⁴¹Raar ning lalld sẽn pa nafd a lall-n-taag ba fʋɩ, b pa tõe n song taaba.

⁴²Sã n pa Wẽnd sẽn yols-a soaba, ad Yẽnda la Wind n yaa Yolsda.

⁴³Ad (zakʋʋm) tok-sẽnegã tɩɩgã.

⁴⁴Yaa beegdb rɩɩbo.

⁴⁵A yaa wala zũud koom n kaeed pʋsẽ wã.

⁴⁶Wala ko-tʋʋlg kaeebo.

⁴⁷(Tɩ b yet bugumɑ mɑlεgsã):Yõk-y-yã-a n vẽs n kẽng Bugmã sʋka.

⁴⁸Rẽ poorẽ bɩ y kiig a zugã sʋk ko-tʋʋlgã.

⁴⁹Lembe, tɩ foo la zɩsg n yaa wagelle.

⁵⁰Ad yaa wãnde la yãmb sẽn maan sik ne wã.

⁵¹Ad wẽn-zoεtbã bee bas-m-yam zĩigẽ.

⁵²Arzãn-rãmb pʋgẽ la ko-nini.

⁵³B yeelgd-b-la fu-faas la fu-taga, tɩ b yaa sẽn togl taaba.

⁵⁴Woto bal la D furd-b pʋg-neeb nin sẽn yaa yalemse .

⁵⁵B boondame tɩ wat a pʋgẽ, sẽn yaa tɩ-biig buud fãa, tɩ b yaa bas-m-yam rãmba.

⁵⁶B pa lembd kũum a pʋgẽ, rẽnda kũ-rãeengã, tɩ b Soabã gũ-b n yi Bug-yõogdgã.

⁵⁷Tɩ yaa kũuni sẽn yi fo Soabã nengẽ, ad wãnde la pʋɩɩr sẽn yaa zɩsgo.

⁵⁸La ad Tõnd yols-a-la ne fo zɩlemdã, sãnd-sãnde b na tags n gese.

⁵⁹Bɩ f koll-ba, tɩ ad bãmb me yaa kolldba.