As-Saffat

¹M wẽen ne Mɑlεgs tedgdbã, rulg-rulgã.

²La sẽn tãsd-b Sɑwɑtã tãsg tεkẽ n peegd-b n teesd Wẽnd sẽn tʋllẽ.

³La sẽn karemd-b Tẽegrã sẽn yɑɑ Wẽnd goɑmã.

⁴Ad yãmb Soabã, a yaa a Yembre.

⁵Saas la tẽng la bũmb ning sẽn be b yiibã sʋk Soaba, la Wĩndg pukr zĩis Naaba.

⁶Ad Tond nagsa Dũni saagã ne faas-teed sẽn yaa ãdse.

⁷La D leb n gũus-a n yi Sʋɩtãan fãa sẽn yaa tõta.

⁸B pa tõe n kelg yĩngr rãmbã ye, b lobd-b-la wεεng fãa gilli.

⁹Na zãag yĩnga, la b le tar nong sẽn ruumdi.

¹⁰Rẽnda ned ning sẽn zaeeg-a zaeegr tɩ vɩleng sẽn wit pʋgl-a.

¹¹Bɩ f sok-b n gese, bãmb naanegã toolem n yɩɩd bɩ? Bɩ yaa bũmb ning Tõnd sẽn naanã? Ad Tõnd naan-b lame ne tãnd sẽn yaa tabende.

¹²Pa woto ye, fo maanda yel-solemd tɩ bãmb yaandẽ.

¹³La b sã n tẽeg-ba, b pa tẽegd ye.

¹⁴La b sã n yã yel-solemde, la b sẽn boond taab n yaandẽ.

¹⁵La b yeel yã: "yãoã pa yɩ rẽnda tɩɩm sẽn vẽnege".

¹⁶B yeelame: "rẽ yĩnga tõnd sã n ki n lebg tom la kõaba, b na leb n vʋʋg tõndo?

¹⁷La tõnd saam-rẽemsã fãa?"

¹⁸Yeele: "n-ye". Tɩ yãmb yaa b sẽn faag-b rãmba.

¹⁹Ad a yaa tãs-vuk bal tɩ bãmb yaa sẽn gete.

²⁰Tɩ b yeele: "yaa tõnd wɩɩbdo! Yãoondã yaa rolbã raare.

²¹Yãoã yaa welgr raar ning yãmb sẽn da yɩ n yagsdẽ wã".

²²Tigim-y b rãmb nins sẽn wẽgbã, b pagbã la bũmb nins b sẽn da yɩ n tũudẽ wã.

²³Zẽng tɩ pa Wẽndã, bɩ y kãag-y-b n tʋg Bugmã sorẽ.

²⁴La y yals-y-ba, tɩ b na n sok-b lame.

²⁵Yaa bõe n tar yãmb tɩ y pa sõngd taaba?.

²⁶Pa woto ye, bãmbã rũnda, b yaa sak-n-tũ rãmba.

²⁷Tɩ b sãnda togl sãnda n sogsd taaba.

²⁸N yetẽ: "ad yãmb ra yɩɩme n wat tõnd nengẽ ne pãnga".

²⁹Tɩ b yeele: "yãmb pʋs n ra pa yɩ n yaa sɩd-kõtb ye".

³⁰La tõnd ra pa tar ba pãng yãmb zug ye, yãmb pʋs n ra yɩɩ neb sẽn yaa kεdgdba.

³¹Tõnd Soabã gomd sɩdga tõnd zugu, ad tõnd yaa (naongã) lεmbdba.

³²Tɩ tõnd kedg yãmba, ad tõnd yɩɩme n yaa kεdgdba.

³³La raar-n-kãngã, b fãa yaa lagem-n-taas naongã pʋga.

³⁴Ad tõnd yaa woto bal la D tʋm ne nin-wẽnsã.

³⁵Ad bãmb ra yɩɩme tɩ b sã n yeel-ba: "soab kae sã n pa Wẽnde". La b sẽn maand waoog-m-menga.

³⁶La b yetẽ: "rẽ yĩnga tõnd yaa d soben-dãmbã basdba, yɩɩn-yɩɩnd sẽn yaa gãeeng yĩnga?".

³⁷Pa woto dɛ! A waa ne sɩd la a sɩdg tẽn-tʋʋmbã.

³⁸Ad yãmb yaa naon-zabdgã lεmbdba.

³⁹La b pa rond yãmb rẽnda yãmb sẽn ra yɩ n tʋmdẽ wã.

⁴⁰Ralla Wẽnd yembs nins b sẽn tɩlgã.

⁴¹Bãmb rãmb n tar rɩtl b sẽn mi.

⁴²Sẽn ya tɩ-biisi, tɩ bãmb yaa b sẽn waoog-b rãmba.

⁴³Tɩ b be Neema arzãn-rãmbã pʋsẽ.

⁴⁴N be gãt zutu, n togl taaba.

⁴⁵Tɩ b gilgd b zut ne ko-tees sẽn yɑɑ yolgmd wɑ lɑ ko-nifri.

⁴⁶Pεεlg fudd n yaa noog ne a yũudba.

⁴⁷Suub kɑ ɑ pʋgẽ ye, ɑ pa zɑb b zutu.

⁴⁸La b tara pagb sẽn ya ges-koees rãmba, n ya pʋg-neeb nin sẽn yalme.

⁴⁹B yaa wala gεl sẽn gũusi.

⁵⁰Tɩ b sãnda togl sãnda n sogsd taaba.

⁵¹Yεt n yeel b pʋgẽ wã : "ad mam ra tara zao.

⁵²T'a ra yetẽ: "rẽ yĩnga fo lagma sɩd kõtbã bɩ?''.

⁵³Tõnd sã n ki n lebg tom la kõaba rẽ yĩnga tõnd yaa b sẽn na n rol-b rãmb bɩ?"

⁵⁴Tɩ sɩd-kõtã yeel tũud-n-tɑɑsã sẽn be Arzẽnɑ: "rẽ yĩnga yãmb pɑ na n wa tɩ d lik n ges ɑ sẽn mɑɑnegɑ?"

⁵⁵T'a lɩk n yã-a Bugmã sʋka.

⁵⁶T'a yeele: "m wẽen ne Wẽnde, fo ra na n halkẽ-la maam,

⁵⁷La sã n ka mam Soabã neema wã yĩngã, m ra na n zĩnda b sẽn wa ne-b rãmb bugmẽ wã.

⁵⁸M mi tɩ tõnd ɑ Arzẽn koɑmb pa kiidb lɑ?.

⁵⁹Rẽnda d kũ-rãeengã? Tõnd pa b sẽn na n nams-b rãmb me ye?.

⁶⁰Ad woto la pʋɩ-bedre.

⁶¹Bɩ tʋm-tʋmdbã tʋme, woto bilgr paang yĩnga.

⁶²Señ togs tɩ loogã, yẽ la sigb zĩig sõama sẽn yɩɩd bɩ yaa zakʋʋm tɩɩgã (tʋk sẽnego) ?.

⁶³Tõnd naan-a lame t'a yaa zarbg-n-gεsg ne wẽgdbã.

⁶⁴Ad a yaa tɩɩg sẽn yit Bugmã yẽgrẽ.

⁶⁵A bĩisã yaa wala Sʋɩtãams zutu.

⁶⁶La bãmb na n rɩ-a lame n pids-a b pʋsã.

⁶⁷Rẽ poorẽ b tara bõn-yũudi sẽn gẽdg ne ko-tʋʋlg n na n paas a zugu.

⁶⁸Rẽ poorẽ ad b lɛbeng zĩig yaa Bugmẽ wã.

⁶⁹Ad bãmb mika b saam-dãmbã tɩ b yaa menemdba.

⁷⁰Tɩ bãmb yaa sẽn zoet n wurd b vũunã tũub zugu.

⁷¹La sɩd la hakɩɩka rãeenem-rãmbã wʋsg sẽn reng bãamb taoor menmame.

⁷²La sɩd la hakɩɩka Tõnd tʋmsa bugsdb b pʋgẽ.

⁷³Bɩ f ges b sẽn bugs-b rãmbã baasg yɩɩ wãn-wãna?

⁷⁴Ralla Wẽnd yembs nins b sẽn tɩlgã, (bãmb nɑ n põsɑ nɑngã).

⁷⁵La sɩd la hakɩɩka a Nuuh boola Tõnd, la sakdb sɑkr sẽn be neer n yɩɩd yaa Tõndo.

⁷⁶La D tɩlg-a-la ne a zakã rãmb n yi naon-bedrã.

⁷⁷La D maan a koambã tɩ bãmb la kεlldba.

⁷⁸La D bas tɩ b na n wa gomd a yell yaoolem rãmbẽ wã.

⁷⁹Tɩlgr be ne a Nuuh bõn-naandsã pʋga.

⁸⁰Ad yaa woto bal la Tõnd rond manegdbã.

⁸¹Ad a yaa Tõnd yembs nins sẽn ya sɩd-kõtbã a yembre.

⁸²Rẽ loogr poorẽ tɩ Tõnd na n bõr neb a taabã.

⁸³La a ɭbraahɩɩm yɩɩme n dɩk a sorã n yɑ-ɑ yãɑgɑ.

⁸⁴Wakat ning a sẽn wa a Soabã nengẽ ne sũur sẽn yɩlge.

⁸⁵Wakat ning a sẽn wa n yeel a saambã la a zãma wã: "yaa bõe la yãmb sẽn tũudã?"

⁸⁶Zĩri soben-dãmb zẽng sẽn pa Wẽnd la yãmb rata?

⁸⁷La yãmb tẽeda wãn-wãn ne bõn-nãandsã Soabã, tɩ sã n sεgɑ ne lɑgm-n-tɑɑre?

⁸⁸T'a nak n ges ãdsẽ wã.

⁸⁹N yeel-bɑ: "ad mam yaa bãada".

⁹⁰Tɩ b ball n yi-a n gũd b kuidsi n looge.

⁹¹T'a zãoos n kẽng b soben-dãmbẽ wã, n yeel: "yãmb pa rɩt laa?''.

⁹²Bõe n tar yãmb tɩ y pa gomda?"

⁹³T'a loog n ta n pãbd-b ne rɩtgo.

⁹⁴Tɩ b togl n wat a nengẽ ne yãgbo.

⁹⁵T'a yeele: "yãmb tũuda bũmb ning yãmb sẽn peesdã''

⁹⁶Tɩ Wẽnd n yaool n naan yãmb ne bũmb ning yãmb sẽn tʋmdã?

⁹⁷Lɑ b yeelyã: "me-y wulg a yĩngɑ, n lobg-a bugmã pʋga".

⁹⁸Tɩ b tʋls-a ne wẽnga tɩ Tõnd maan tɩ bãmb lɑ bõnɑ rãmba.

⁹⁹T'a yeele: "ad mam yaa loogda n tʋg m Soabẽ nengẽ, A na n kãndga maaam''.

¹⁰⁰Foom m Soabã! Kõ maam bi-sõngo.

¹⁰¹Tɩ Tõnd noog a sũuri ne bi-ribl (ɭmaa-ɩɩl) sẽn yaa sugr soaba.

¹⁰²Lɑ ɑ sẽn wa n bi, n ta sõng-ɑ sãɑmbã n tʋm wakatã, a (ɭbraahɩɩm) yeelame: "m biig sõngo, ad mam yãta gõeem pʋgẽ n kodgd foom, bɩ f gese fo tagsg yaa wãn-wãna?" T'a yeele: yaa m baaba sõngo, maan b sẽn sagend-fã tɩ Wẽnd sã n sake, f na n mika maam tɩ m lagma sugr rãmbẽ".

¹⁰³B yiibã fãa sẽn wa n sak n reeg b zugẽ, t'a gãneg-a a yεgdgẽ wã.

¹⁰⁴Tɩ Tõnd boaal-a: "yaa foom ɭbrahɩɩma!''

¹⁰⁵Sɩd la hakɩɩka fo sɩdga zãmsdã", yaa woto bal la Tõnd rond manegdbã.

¹⁰⁶Ad wãnda la zarb-n-gɛsg sẽn vẽnege.

¹⁰⁷La Tõnd tεdg-a lame ne bõn-koadgdg sẽn bedme.

¹⁰⁸La D bas tɩ b na n gomd a yell yaoolem rãmbẽ wã.

¹⁰⁹Tɩlgr be a ɭbraahɩɩm yĩnga.

¹¹⁰Yaa woto bal la tõnd rond manegdbã.

¹¹¹Ad a yaa Tõnd yembs nins sẽn yaa sɩd-kõtbã a yembre.

¹¹²La D noog a sũur ne a ɭshaaka t'a yaa nabiyaam n yi nin-sõmsẽ wã.

¹¹³La D bark-a (ɭsmaa-ɩɩl) la a ɭshaaka. Be b yiibã koamb pʋsẽ, manegd la wẽg-m-meng soab sẽn vẽnege.

¹¹⁴La sɩd la hakɩɩka Tõnd maana neema a Musa ne a Harʋʋn zugu.

¹¹⁵La D tɩlg b yiibã la b yiibã neb n yi naon-bedrã.

¹¹⁶La D sõng-b tɩ b yɩ n yaa bãmb la windba.

¹¹⁷La D kõ b yiibã gaf vẽenega.

¹¹⁸La D kãndg b yiibã n tʋg so-tɩrga.

¹¹⁹La D bas tɩ b na wa gomd b yiibã yʋ-noogo yaoolem rãmbẽ wã.

¹²⁰Tɩlgr be a Musa ne a Harʋʋn yĩnga.

¹²¹Ad yaa woto bal la Tõnd rond manegdbã.

¹²²Ad b yiibã yii Tõnd yembs nins sẽn yaa sɩd-kõtbã pʋgẽ.

¹²³La sɩd la hakɩɩka a ɭlyaas bee tẽn-tʋʋmbã pʋgẽ.

¹²⁴Wakat ning a sẽn wa n yeel a nebã: "yãmb pa zoet Wẽnde?.

¹²⁵Yãmb tũuda a Baal (rʋbga) la y basd Naand sẽn yɩɩd a ne sõmblem,

¹²⁶Sẽn yaa Wẽndã, yãmb Soabã la yãmb baab-rãeemsã Soabã?

¹²⁷Tɩ b yags-a. Ad bãmba yaa b sẽn na n wa ne b rãmba.

¹²⁸Ralla Wẽnd yembs nins b sẽn tɩlgã.

¹²⁹La D bas tɩ b na n wa gomd a yʋ-noogo yaoolem rãmbẽ wã.

¹³⁰Tɩlgr be ne a ɭlyaasɩɩn yĩnga.

¹³¹Ad yaa woto bal la Tõnd rond manegdbã.

¹³²Ad a yaa Tõnd yembs nins sẽn yaa sɩd-kõtbã a yembre.

¹³³La sɩd la hakɩɩka a Lʋʋt bee tẽn-tʋʋmbã pʋga.

¹³⁴Wakat ning Tõnd sẽn wa n tɩlg-a ne a zakã rãmb gilli.

¹³⁵Ralla pʋg-yãang n pa halkrã pʋgẽ.

¹³⁶Rẽ loogr poorẽ tɩ Tõnd na n halk sẽn ket-bã.

¹³⁷La sɩd la hakɩɩka yãmb pɩʋʋgd-b-la yibeoogo.

¹³⁸La yʋngo, yãmb pa tar yam la?

¹³⁹Sɩd la hakɩɩka a Yuunus bee tẽn-tʋʋmbã pʋga.

¹⁴⁰Wakat ning a sẽn wa n zoe n kẽng kogl pitgã pʋga.

¹⁴¹Tɩ b maan poeere, t'a zĩnd b sẽn wil-b rãmbã pʋgẽ, (ti b lu-bɑ mõgrẽ wã).

¹⁴²Tɩ zĩnfã vel-a, tɩ yẽ yaa b sẽn sãbs-a soaba.

¹⁴³La tɩ sã n pa a sẽn yɩ n lagem sẽn yɩlg-b Wẽnd yʋʋrã.

¹⁴⁴A naan n zĩndẽ a pʋgẽ wã n tãag b sẽn na n yik-b raarã.

¹⁴⁵Tɩ Tõnd lob-a weo-raoogẽ wã t'a yaa bãada.

¹⁴⁶La Tõnd buls tɩɩg a yĩnga, tɩɩg sẽn tão tẽnga.

¹⁴⁷La D tʋms-a neb tus-koabg nengẽ pʋs n yɩɩdɑ rẽ.

¹⁴⁸Tɩ b kõ sɩda, tɩ Tõnd wʋms-b noog n tʋg wakato.

¹⁴⁹Bɩ f sok-b n gese, fo Soabã n so kom-pugli wã tɩ bãmb n so kom-ribli wã?

¹⁵⁰Bɩ Tõnd naana Malεgsã tɩ yaa pagba, tɩ bãmb yɩ kaset-rãmbã?

¹⁵¹Yaa sɩda, ad bãmbã, b zĩri wã yĩnga b yetame:

¹⁵²"Wẽnd rogame". La sɩd la hakɩɩka ad b yaa pʋ-yagdba.

¹⁵³Rẽ yĩnga kom-pigli la A tũus n bas kom-ribli?

¹⁵⁴Yaa bõe n tar yãmb tɩ y bʋʋd woto?

¹⁵⁵Yãmb pa tagsd la?

¹⁵⁶Bɩ yãmb tara daliil sẽn yɑɑ vẽenega?.

¹⁵⁷Bɩ y wa ne y gafã, tɩ y sã n da n yɩɩme n yaa sɩd-rãmba.

¹⁵⁸La b maan rogem n ning Yẽnda ne Malεgsã sʋka. La sɩd la hakɩɩka malεgsã bãngame tɩ ad Wẽnd nɑ n wɑɑ ne lɑgm-n-tɑɑrɑ rãmba n geel-bɑ.

¹⁵⁹Yɩlgemd be ne Wẽnde n yi bũmb ning b sẽn bilgdã.

¹⁶⁰Rẽnda Wẽnd yembs nins b sẽn tɩlgã.

¹⁶¹Ad yãmba, la bũmb ning yãmb sẽn tũudã.

¹⁶²Yãmb pa yɩ n tõe menemes ned n yi sɩdɑ sor ye,

¹⁶³Ralla ned ning sẽn yaa Bugmã kẽeda.

¹⁶⁴La malεk ba a ye pa be tõnd sʋka rẽndame t'a tara yalsg zĩig b sẽn mi.

¹⁶⁵La sɩd la haɩɩka Tõnd la tεdgdba, (Wẽnd tũubɑ pʋgẽ).

¹⁶⁶La sɩd la hakɩɩka Tõnd la yɩlgdba.

¹⁶⁷La b ra yɩɩme n yetẽ:

¹⁶⁸"Tõnd sã n da tarẽ-la tẽegr sẽn yi rẽenem rãmbẽ wã.

¹⁶⁹D rag n na yɩ Wẽnd yembs nins b sẽn tɩlg-ba".

¹⁷⁰Tɩ b kɩfl ne-a, la b na wa n bãnge.

¹⁷¹La sɩd la hakɩɩka Tõnd gomd rag n reng a taoore, Tõnd yembs nins sẽn ya-b tẽn-tʋʋmbã yĩnga.

¹⁷²Tɩ ad yaa bãmb n na n paam sõngrã.

¹⁷³La ad Tõnd tãp-biisã (sodaasã) bãmb la windbã.

¹⁷⁴Bɩ f ball n yi-ba n tʋg n tãag wakato.

¹⁷⁵La f koll-b tɩ b na wa n yã.

¹⁷⁶Paa Tõnd naongã la b yãgd n baoodẽ lɑ?

¹⁷⁷La a sã n wa sig b samandẽ wã, b sẽn bugs-b rãmb yibeoog yɩ wẽnga.

¹⁷⁸Bɩ f ball n yi-b n tʋg n tãag wakato.

¹⁷⁹La f koall-b tɩ b na wa n yã.

¹⁸⁰Fo Soabã yɩlgame, sẽn yaa zɩslem Soabã n yi bũmb ninga b sẽn bilgdã.

¹⁸¹La tɩlgr be ne tẽn-tʋʋmbã.

¹⁸²La pẽgr be ne Wẽnd sẽn yaa bõn-naandsã Soabã.