Ash-Shu'ara

¹Ṭaa, Sɩɩn, Miim.[1]

²Ad woto yaa Gafã Aaya-rãmba sẽn vẽnegdã.

³Tõe tɩ fo weoogda f sũurã, b sẽn ka kõt sɩd yĩnga.

⁴Tõnd sã n tʋlla, D sikda saagẽ wã yel-soalem tɩ b yubli wã kell n sulg ne-a n gεt-ɑ tɩ yɑɑ vẽenegɑ.

⁵Tẽeg-paall ka wat bãmbã n yi Yolsg Naab nengẽ, rẽndame tɩ b gũda b zãn-kuidsi.

⁶Ad bãmbã yagsame, la b sẽn da sãbsdã kɩbay na n wa-b lame.

⁷Rẽ yĩngã bãmb pa yã tẽn-gãngã, sõor waoog Tõnd sẽn buls ɑ zugu bõn-bundɩ toor-toore sẽn yaa wagle.

⁸Ad tagmas be woto pʋga, la ad bãmbã sẽn waoog fãa pa sɩd-kõtb ye.

⁹La ad fo Soabã yaa wilb Naab n yaa Yolsg Naaba.

¹⁰La (tẽeg) wakat ning fo Soabã sẽn wa n bool a Musa n yeel-ɑ: "kẽng neb nins sẽn wẽg b mensã nengẽ".

¹¹A Fɩr-aoon nebã nengẽ, n tɩ yeel-ba: " rẽ yĩnga y pa nɑ n zoe Wẽnde?"

¹²A Muusɑ yeelɑme m Soaba! Ad mam yεεsdame tɩ b na n wa yags maam.

¹³Tɩ mam yãoogã wa weooge, tɩ mam zɩlemd pa tõe gom ye, bɩ F tʋms a Haarʋʋn n lagem maam.

¹⁴La mam rag n beeg-b lame, tɩ m yaεεsd tɩ b na n wa kʋ maam.

¹⁵Tɩ [Wẽnd] yeele: " rẽ kõ n yɩ ye! Kẽng-y yãmb y yiibã, ad Tõnd bee ne yãmb n kelgdẽ.

¹⁶Kẽng-y yãmb y yiibã a Fɩr-ʿaoon nengẽ n tɩ yeel-a: "ad tõnd yaa bõn-naandsã Gʋʋndã Tẽn-tʋʋmba''.

¹⁷Tɩ fo bas ɭsraεεl koambã tɩ tũ tõndo".

¹⁸La a Fɩr-ʿaoon yeel yã: ''rẽ yĩnga tõnd pa wub foom tõnd nengẽ tɩ fo yaa bi-kɩdga? Tɩ fo zĩnd tõnd nengẽ yʋʋma?''

¹⁹Tɩ fo tʋm tʋʋm ning fo sẽn tʋmã, tɩ fo yaa sõm-zɩta".

²⁰La a Musa yeel yã: "mam tʋm-a-la wakat-kãngã tɩ mam yaa menemda.''

²¹Mam zoeeme n yi yãmba, mam sẽn wa n yaeesdã: rẽ poorẽ tɩ mam Soabã kõ maam Bʋʋd minim la A maan tɩ mam naag Tẽn-tʋʋmbã pʋgẽ.

²²Lɑ fo sẽn gʋʋl mɑɑmɑ yaa neema fo sẽn tɑr-ɑ n tãɑsd maam, tɩ fo yaool n kɩtame t'a ɭsraεεl koambã yaa fo yembse lɑ f bɑs mɑɑm. (lɑ rẽ pɑ gɩdgd mɑɑm tɩ m dɑ bool foo ye).

²³La a Fɩr-ʿaoon yeel yã: " yaa bõe la bõn-naandsã Soaba?"

²⁴La a Musa yeele: " yɑɑ saas la tẽng la bũmb nins sẽn be b yiibã sʋk Soabã, tɩ yãmb sã n yɩɩme n yaa bãng-n-wãag-rãmba".

²⁵La a Fɩr-ʿaoon yeel neb nins sẽn be yẽ kɩrenga: "y wʋmdame bɩ?"

²⁶"Ta a Muusa yeele: "A yaa yãmb Soabã la yãmb bɑ-rãmb sẽn deng tɑoorã Soabɑ".

²⁷Ta a Fɩr-ʿaoon yeele: "ad y Tẽn-tʋʋm ning b sẽn tʋms tɩ wa yãmb nengẽ wã yaa gãeenga".

²⁸T'a a Musa yeele: "A yaa wĩntoog sẽn pukdẽ la a sẽn lʋɩtẽ lɑ bũmb ning sẽn be b yiibã sʋkã Soaba, tɩ yãmb sã n tara yam n tagsd n getẽ".

²⁹La a Fɩr-ʿaoon yeel yã: "la tɩ fo sã n tũ soab zẽng sẽn ka maam, m na pag-f bãense".

³⁰T'a a Musa yeele:" bɑ tɩ mam sã n wa ne bũmb sẽn sɩdgd-m tɩ yɑɑ vẽenegɑ?"

³¹Ta a [Fɩr-ʿaoon] yeele: " bɩ f wa ne-a tɩ sã n mikame tɩ fo yaa sɩd-soaba".

³²T'a [Musa] lobg a rasaarã t'a lebg waaf tɩ yɑɑ vẽenega.

³³La a rɩk a nugã n tʋm a bãokẽ wã, tɩ nugã lebg pεεlg tɩ b neẽ.

³⁴La a [Fɩr-ʿaoon] yeel kug-zĩidb nins sẽn be yẽ kɩrengã: "ad yãoã yaa tɩ-mita,

³⁵n rat n yiis yãmb y tẽngẽ wã ne a tɩɩmã, la yãmb sagenda maam ne bõe?"

³⁶La b yeele: "kɩt tɩ yẽ la a ma-biigã lebg n kuli, la f tʋms tẽngã pʋgẽ tɩ b tigim,

³⁷n wa ne tɩ-mit fãa fo nengẽ".

³⁸Tɩ tɩtã-rãmb na n tigim taab raar ning b sẽn yãkã.

³⁹La b na n yeel nebã: "rẽ yĩngã yãmb tigim n sεεme?,

⁴⁰Tõe tɩ tõnd tũ tɩtã-rãmbã tɩ b sã n wili"

⁴¹La tɩtã-rãmb sẽn wa n wa wã, b yeela a Fɩr-ʿaoona: "rẽ yĩngã tõnd tara keoor tɩ tõnd sã n wili?"

⁴²La a yeel yã: "n-yẽe, yãmb na n lebga mam pẽnegdba!

⁴³La a Musa yeel-ba: "lob-y bũmb nins yãmb sẽn na n lobã".

⁴⁴La b lob b wĩyã la rasapã n yeele: "ne a Fɩr-ʿaoon zɩslemã, yaa tõnd n na n wili".

⁴⁵La a Musa lobg a rasaarã t'a na n vel bãmb sẽn maanã.

⁴⁶Tɩ tɩtã-rãmb lʋɩ n maan suguudu.

⁴⁷N yeele: " D kõo sɩd ne bõn-naands Soabã,

⁴⁸a Musa la a Harʋʋn Soabã".

⁴⁹La a [Fɩr-ʿaoon] yeele: "yãmb kõ-a-la sɩda taoor tɩ mam ka kõ yãmb sore? Ad yaa yẽnda la yãmb kãsmã, sẽn wĩnig yãmb tɩɩmã, yɩ bilfu y na bãnge, m na n (kɩtame tɩ b) kʋʋs y nusã la y naoã n tul taaba, n lulg-y fãa gilli".

⁵⁰La b yeele: "yell ka be ye! ad yaa tõnd Soabã nengẽ la tõnd lebgda''.

⁵¹Ad tõnd tara tʋlsem ne tõnd Soabã t'A yaaf tõnd tʋʋm-tuutsã, tõnd sẽn yaa rãeenem sɩd-kõtbã.

⁵²La Tõnd toola wahɩ tɩ kẽng a Musa nengẽ [n yeel-a] : "loog ne f nebã, ad b na n pʋga yãmba".

⁵³T'a Fɩr-ʿaoon na n tʋms tɩ b bool tẽmsã pʋgẽ tɩ b yek taaba.

⁵⁴"Bãmbã yaa neb kɩdg bala,

⁵⁵La ad b puuga tõnd sũyã

⁵⁶tɩ tõnd fãa gill yaool n yaa gũus-m-mens-rãmba".

⁵⁷Tɩ Tõnd na n yiis-b pʋtã pʋsẽ la ko-ninã pʋsẽ.

⁵⁸La arzεksẽ la waoogr zĩisẽ.

⁵⁹Yaa woto tɩ Tõnd rɩk a faadã n kõ a ɭsraεεl koambã.

⁶⁰Tɩ bãmb na n pʋg-b wĩntoog yiib wakato.

⁶¹Wakat ning zãma a yiibã sẽn wa n yãnd taaba, a Musa nebã yeelame: "ad b na n paama tõndo".

⁶²La a yeele: "tek-y woto, ad mam Soabã bee ne maam, A na n kãnda maam".

⁶³Tɩ Tõnd na n tʋms wahɩ tɩ kẽng a Musa nengẽ: "rɩk f rasaarã n wẽ mogrã". T'a pãrg n maan tɩ yembr fãa lebg wala tãm-bedre.

⁶⁴Tɩ Tõnd kɩt tɩ neb a taabã [a Fɩr-ʿaoon ne a nebã] pẽnege.

⁶⁵La Tõnd tɩlg a Musa la neb nins sẽn naag yẽnda wã fãa.

⁶⁶Rẽ loogr poorẽ tɩ Tõnd na n bõr neb a taaba.

⁶⁷Ad tagmas be woto pʋga la ad bãmbã sẽn waoog fãa pa sɩd-kõtb ye.

⁶⁸La ad fo Soabã yaa wilb Naab n yaa yolsg Naaba.

⁶⁹La karem n togs-b a ɭbraahɩɩm kɩbarã:

⁷⁰Wakat ning a sẽn wa n yeel a saamb la a zãmã wã: "yaa bõe la yãmb tũudã?"

⁷¹La b yeele: "tõnd tũuda rʋbse n yãs ne b tũudmã lug-lugi''.

⁷²La a yeele: "rẽ yĩnga b wʋmda yãmba, y sẽn wat n kot-ba?''

⁷³Maa (yãmb sẽn tũud-bã) b nafda yãmbã, maa (y sã n bas n ka tũ-ba) b namsda yãmbã?

⁷⁴La b yeele: "ka woto ye! Tõnd mika d saam-rãmbã tɩ b maand woto".

⁷⁵La a yeele: "yãmb yãame, y sẽn tũud bũmb ningã wã…?

⁷⁶Yãmb la y saam-dãmb nins sẽn reng taoorã?

⁷⁷Ad b yaa mam bεεba, rẽnda bõn-naandsã Soabã (Wubdã).

⁷⁸Soab ning sẽn naan maamã la A kãndg maamã;

⁷⁹Naab ning sẽn rɩlgd maam la A yũnugd maamã.

⁸⁰Naab ninga, tɩ mam sã n wa ka keeme, A kõta maam laafɩ,

⁸¹Naab ning sẽn reegd-a mam yõorã la A leb n vʋʋg maamã,

⁸²Naab ning mam sẽn tar tʋlsem t'a yaaf mam tʋʋm-tuutsã, dĩinã (yaoodã) raare.

⁸³M Soabã Wẽnde, kõ maam bʋʋd minim la lagem maam ne nin-sõmã wã;

⁸⁴La maan maam tɩ m tɑl yʋ-noogo yaoolem zãmaan rãmbẽ,

⁸⁵La maan maam tɩ m yɩ neemã arzãnã fa-rɩkda,

⁸⁶La yaaf mam saambã, ad a yɩɩme n yaa menemda.

⁸⁷La ra wa ning-m yãnd Yikr raarã ye.

⁸⁸Raar ning arzεk la koamb sẽn pa nafde.

⁸⁹Rẽnda ned ning sẽn wa Wẽnd nengẽ ne sũur sẽn yɩlge".

⁹⁰Tɩ b na n kolg arzãnã n kõ Wẽnd-zoεtbã.

⁹¹La Gεhɩɩm Bugum na n vẽneg a meng n wuk ne sẽn belg b mensã,

⁹²Tɩ b nɑ n yeel-bɑ: "yãmb sẽn da yɩ n tũud bũmb ningã wã bεε,

⁹³zẽng sẽn pa Wẽndã? Rẽ yĩnga b tõe n sõnga yãmbã? Bɩ b tõe n sõnga b mense?"

⁹⁴B na n lob-b lame n kalem taaba, bãmb ne sẽn belg b bãmbã,

⁹⁵La a ɭblɩɩs poorẽ rãmbã fãa gilli.

⁹⁶La b na n yeele, tɩ bãmb be Bugmã pʋgẽ n takd taaba:

⁹⁷"Ne Wẽnde! Ad tõnd rag n bee meneng sẽn vẽneg pʋgẽ,

⁹⁸tõnd sẽn wa n rɩkd yãmb n zemsd ne bõn-naandsã Soabã.

⁹⁹Bũmb pa menes tõnd n zʋʋg nin-wẽnsã ye.

¹⁰⁰La tõnd pa tar sugsd ye.

¹⁰¹Zao tɩrg ka be me ye.

¹⁰²La tɩ lebgr sã n da beeme tɩ d paam n yɩ sɩd-kõtba.

¹⁰³Ad tagmas be woto (ɑ ɭbrɑɑhɩɩm kibɑrã lɑ yɑgsdbã bɑɑsgã) pʋga la ad bãmbã sẽn waoog fãa pa sɩd-kõtb ye.

¹⁰⁴La ad fo Soabã yaa wilb Naaba n yaa Yolsg Naaba.

¹⁰⁵A Nuuh nebã yagsa Tẽn-tʋʋmbã,

¹⁰⁶Wakat ning b saam-biig a Nuuh sẽn wa n yeel-ba: "rẽ yĩnga yãmb ka zoet [Wẽnde]?''

¹⁰⁷Ad mam yaa Tẽn-tʋʋm ne yãmba n yaa bas-m-yam soɑbɑ.

¹⁰⁸Bɩ y zoe Wẽnd la y pʋg maam.

¹⁰⁹Mam pa kot yãmb keoor a zug ye, ad mam keoorã bee bõn-naandɩ wã Soabã nengẽ.

¹¹⁰Bɩ y zoe Wẽnd la y pʋg maam

¹¹¹La b yeele: "rẽ yĩngã tõnd na sak n kõ foom sɩda, tɩ yaool n yaa nin-yaalsã la sẽn pʋgd foomã?"

¹¹²La a yeele: "mam ka tar bãngr ne b sẽn da tʋmd ye.

¹¹³Ad b geelgã roga ne mam Soabã zug tɩ y sã n miẽ.

¹¹⁴Mam ka na n rig sɩd-kɩtbã ye.

¹¹⁵Mam ka zẽngã rẽnda bugsd sẽn vẽnege".

¹¹⁶La b yeele: "yaa a Nuuhu, la tɩ fo sã n ka maan gũusgu, ad b na n loba foom [ne kuga]!"

¹¹⁷La a yeele: "yaa m Soaba, ad mam nebã yagsa maam.

¹¹⁸Bɩ F bʋ maam ne b sʋka, bʋʋd sẽn sãɑmd-b tɩ yaa vẽenega , la F tɩlg-ma la neb nins sẽn kõ sɩd n lagem maamã".

¹¹⁹Tɩ Tõnd na n tɩlg-a la neb nins sẽn kẽ n naag-a wã kogl pitgã pʋgẽ.

¹²⁰Rẽ poorẽ tɩ Tõnd bõr neb a taabã (kɩfr-rãmbã).

¹²¹Ad tagmas be woto pʋga la ad bãmbã sẽn waoog fãa pa sɩd-kõtb ye.

¹²²La ad fo Soabã yaa wilb Naab n yaa Yolsg Naaba.

¹²³Ad a ʿAad rãmb yagsa Tẽn-tʋʋmbã,

¹²⁴Wakat ning b saam-biig a Huud sẽn wa n yeel-ba: "rẽ yĩnga yãmb ka zoet [Wẽnde]?

¹²⁵Ad mam yaa Tẽn-tʋʋm n yaa bas-m-yam ne yãmba.

¹²⁶Bɩ y zoe Wẽnd la y pʋg maam.

¹²⁷Mam pa kot yãmb keoor a zug ye, ad mam keoorã bee bõn-naandɩ wã Soabã nengẽ.

¹²⁸Rẽ yĩngã yãmb na n meta kunkubr zug fãa me-zãntg n reemdẽ bala?

¹²⁹La y met ro-bεda (gãsdo) tɩ yaa wala yãmb na n duumame?

¹³⁰La yãmb sã n na n maan n role, y maandame tɩ y yaa maan-n-zʋʋg rãmbã, tɩ ninbãan-zoeg ka be ye.

¹³¹Bɩ y zoe Wẽnd la y pʋg maam.

¹³²Yaees-y Naab ning sẽn kõ yãmb bõn-sõmã wɑlɑ y sẽn mi wã.

¹³³Sẽn kõ yãmb rũms la koamba.

¹³⁴La pʋt la ko-soaya.

¹³⁵Ad mam yaeesda yãmb zugu, ra-kãseng raarã naongã.

¹³⁶La b yeele: "zem tɩ fo maana tõnd waazʋ maa fo ka maane, fãa yaa a yembr tõnd nengẽ''.

¹³⁷Ad wãnde yaa rãeenem rãmb zʋgdo lɑ b rog-n-miki.

¹³⁸La b pa na n sɩbg tõnd ye.

¹³⁹Tɩ b yags-a, tɩ Tõnd halk-ba, ad tagmas be woto pʋga la ad bãmbã sẽn waoog fãa pa sɩd-kõtb ye.

¹⁴⁰La ad fo Soabã yaa wilb Naab n yaa Yolsg Naaba.

¹⁴¹Ad a Ṯamuud rãmb yagsa Tẽn-tʋʋmbã.

¹⁴²Wakat ning b saam-biig a Ṣaalɩḥ sẽn wa n yeel-ba: "rẽ yĩnga yãmb ka zoet [Wẽnde]?''

¹⁴³Ad mam yaa Tẽn-tʋʋm n yaa bas-m-yam ne yãmba.''

¹⁴⁴Bɩ y zoe Wẽnd la y pʋg maam.

¹⁴⁵Mam pa kot yãmb keoor a zug ye, ad mam keoorã bee bõn-naandɩ wã Soabã nengẽ.

¹⁴⁶Rẽ yĩnga, yãmb tẽedɑme tɩ b na basɑ yãmb kaanẽ tɩ yãmb be bas-m-yam pʋg bɑla?

¹⁴⁷Tɩ y be pʋt pʋg la ko-sood pʋga

¹⁴⁸La koodo la tamar tɩɩs biis sẽn yaa lom-lome (n sakd rɩɩbo)?

¹⁴⁹La y peesd tãmsã n met rot tɩ yãmb yɑɑ sẽn tõe tʋʋmdã tɩ looge?

¹⁵⁰Bɩ y zoe Wẽnde la y pʋg maam.

¹⁵¹La y ra wa tũ zʋʋg-toadg rãmbã sagell ye.

¹⁵²Neb nins sẽn kẽnd tẽngã zug ne sãoongã la b pa manegdã.

¹⁵³La b yeele: "ad b maana foom tɩɩm,

¹⁵⁴Fo ka baa fʋɩ n zʋʋg ned wala tõnd ye, bɩ f wa ne tagmas tɩ sã n mikame tɩ f naaga nin-sõma wã".

¹⁵⁵La a yeele: "woto yaa yʋgemde: a tara yũub raare, tɩ yãmb me tar yũub raar sẽn yãk n miẽ''.

¹⁵⁶Ra sɩɩs-y-yã-a ne wẽng ye, tɩ ra-wagell raarã sɩbgr wa yõk yãmb ye".

¹⁵⁷La b kõs-a [n kʋ] tɩ b vẽeg beoog ne nimsa!

¹⁵⁸Tɩ naongã yõk-ba, ad tagmas be woto pʋga la ad bãmbã sẽn waoog fãa pa sɩd-kõtb ye.

¹⁵⁹La ad fo Soabã yaa wilb Naab n yaa Yolsg Naaba.

¹⁶⁰Ad a Lʋʋṭ nebã yagsa Tẽn-tʋʋmbã.

¹⁶¹Wakat ning b saam-biig a Lʋʋṭ sẽn wa n yeel-ba: "rẽ yĩnga yãmb ka nɑ n zoe [Wẽnde]?

¹⁶²Ad mam yaa Tẽn-tʋʋm n yaa bas-m-yam ne yãmba.

¹⁶³Bɩ y zoe Wẽnde la y pʋg maam.

¹⁶⁴Mam pa kot yãmb keoor a zug ye, ad mam keoorã bee bõn-naandɩ wã Soabã nengẽ.

¹⁶⁵Yãmb nɑ n baooda raop bõn-nɑɑndi wã sʋkɑ?"

¹⁶⁶N yaool n basd pagbã yãmb Soabã sẽn naan n kõ yãmb tɩ yaa halaalã? Ad yãmb yaa zʋʋg-toadg rãmbã".

¹⁶⁷La b yeele: "yaa foo Lʋʋṭe! ad fo sã n ka tek n base, b na n rig-f lame n yi tẽngã".

¹⁶⁸La a yeele: "ad mam kisga yãmb tʋʋmdã,

¹⁶⁹M Soaba, tɩlg maam la m zakã rãmbã n yi bãmbã sẽn tʋmdã".

¹⁷⁰Tɩ Tõnd na n tɩlg-a la a zakã rãmb fãa gilli.

¹⁷¹Rẽnda pʋg-yãanga, n naag halkdbã pʋgẽ.

¹⁷²Rẽ loogr poorẽ tɩ Tõnd na n halk sẽn ket-bã.

¹⁷³La Tõnd na n sik sa-koom b zugu, ɑd bugs-n-kong rãmb saag yɩ wẽnga.

¹⁷⁴Ad tagmas be woto pʋga la ad bãmbã sẽn waoog fãa pa sɩd-kõtb ye.

¹⁷⁵La ad fo Soabã yaa wilb Naab n yaa Yolsg Naaba.

¹⁷⁶Ad a Ayka nebã (kãgrẽ rãmbã) yagsa Tẽn-tʋʋmbã.

¹⁷⁷Wakat ning a Sʋ'ʿayb sẽn wa n yeel-ba: "rẽ yĩnga yãmb ka nɑ n zoe [Wẽnde]?''

¹⁷⁸Ad mam yaa Tẽn-tʋʋm n yaa bas-m-yam ne yãmba.

¹⁷⁹Bɩ y zoe Wẽnde la y pʋg maam.

¹⁸⁰Mam pa kot yãmb keoor a zug ye, ad mam keoorã bee bõn-naandɩ wã Soabã nengẽ.

¹⁸¹Pids-y vugbã la y ra yɩ neb nins sẽn boogd vugb ye.

¹⁸²La y pees ne pεεsdg sẽn tẽeg tɩrga.

¹⁸³Ra wa boog-y nebã teedã vugbã pʋgẽ ye, la y ra kẽn tẽn-gãngã zug ne sãang ye.

¹⁸⁴Zoe-y Naab ning sẽn naan-a yãmb la zãma-rãmb nins sẽn reng yãmb taoorã.

¹⁸⁵La b yeele: "ad b maana foom tɩɩm,

¹⁸⁶Fo ka baa fʋɩ n zʋʋg ned wala tõnd ye, la ad tõnd tẽedame tɩ fo yaa zĩri-be-neda.

¹⁸⁷Bɩ f kɩt tɩ bõn-wεdg yi saagẽ wã n lʋɩ tõnd zugu, tɩ sã n mikame tɩ fo yaa sɩd-soaba!"

¹⁸⁸La a yeele: "mam Soabã n mi bũmb ning yãmb sẽn maandã".

¹⁸⁹Tɩ b na n yags-a, tɩ sawadg (maasem) raar sɩbgr na n gãd-ba, la ad raarã yɩɩ ra-kãseng raar naongo.

¹⁹⁰Ad tagmas be woto pʋga, la ad bãmbã sẽn waoog fãa pa sɩd-kõtb ye.

¹⁹¹La ad fo Soabã yaa wilb Naab n yaa Yolsg Naaba.

¹⁹²Ad a sigame n yi bõn-naandsã Soab nengẽ.

¹⁹³Bas-m-yam yõ-yɩlemdã (Gibriil) n sik-a.

¹⁹⁴Fo sũurẽ wã, sẽn na yɩl tɩ fo yɩ bugsda.

¹⁹⁵Ne Laarab-rãmb zɩlemd sẽn vẽnege.

¹⁹⁶Ad a bee rãeenem (Tẽn-tʋʋmbã) gaf-rãmb pʋgẽ.

¹⁹⁷Rẽ yĩnga a ka yɩ yel-solemd ne bãmbã t'a ɭsraεεl bãngdbã wa tar a kɩbare?

¹⁹⁸La tɩ b sã n da sik-a n kõ neb zẽms sẽn pa Laarab-rãmba.

¹⁹⁹Tɩ b wa karem-a n wĩnig-ba, b ra ka na n kõ sɩdɑ tɩ bɑla b pɑ fɑsmd-ɑ ye.

²⁰⁰Yaa woto la Tõnd kẽes (Tẽn-tʋʋmbã yagsgo) nin-wẽnsã sũyẽ,

²⁰¹B pa na n kõ (Alkʋrãanã) sɩda, hal tɩ b wa tʋg n yã naon-zabdgã,

²⁰²Naongã na n waa b nengẽ ne lingri, tɩ b pa tẽed ye.

²⁰³La b yetdẽ: "rẽ yĩnga, b na n kolla tõnd (tɩ d tuub bɩ)?"

²⁰⁴Rẽ yĩnga yaa Tõnd nongã la b yãgd n baoodẽ?

²⁰⁵Fo yãame tɩ Tõnd sã n wʋms-b noog yʋʋm saare,

²⁰⁶Rẽ poorẽ tɩ (nong) ning b sẽn da pʋlem-bã yaool n wa,

²⁰⁷Bõe lɑ bũmb ning b sẽn da wʋmd noogã na n tõog n nɑf-bɑ?.

²⁰⁸Lɑ Tõnd pa halkd tẽnga, rẽndame tɩ D reng n tʋms Tẽn-tʋʋm tɩ tʋg n bugs-ba.

²⁰⁹Tɩ yaa tẽegre, la Tõnd pa yɩ n yaa wẽgdb ye.

²¹⁰Ad pa Sʋɩtãamb n sig ne Alkʋrãɑnɑ ye.

²¹¹A ra pa sõmb ne-ba, b pʋs n pa tõe.

²¹²Ad b lill-b lame tɩ b pa tõe n paam n kelg (Wẽnd goamã) ye.

²¹³Bɩ f ra wa bool soab zẽng sẽn pa Wẽnde, tɩ fo wa yɩ neb nins b sẽn na n namsã pʋgẽ ye.

²¹⁴La bugs fo rog-pẽtbã.

²¹⁵La gãneg f faagr pɩgs ne neb nins sẽn pʋgd foomã sẽn yaa sɩd-kõatbã.

²¹⁶La b sã n kɩɩs foom, bɩ f yeele: "mam pigd n yii bũmb ning yãmb sẽn tʋmdã''.

²¹⁷La bobl f meng ne wilb Naabã la Yolsg Naabã.

²¹⁸Naab ning sẽn ne foomã, wakat ning fo sẽn wat n yik n deed pʋʋgã.

²¹⁹La fo sẽn wat n leebd suguud maandbã sʋka.

²²⁰Ad A yaa Wʋmd n yaa Mita.

²²¹Rẽ yĩnga, m pɑ na n kõ-y kibar ne Sʋɩtãambã sẽn sigd neb nins nengẽ wã?

²²²B sigda zĩrimbeed soab sẽn yaa zunuub-bεd soab nengẽ.

²²³B modgdame n na n pɑɑm n kelg sɑɑsẽ wã…la b wʋsg fãa yaa zĩrimbe-neba.

²²⁴La yɩɩn-yɩɩndbã, yaa kεdgdbã n pʋgd-ba.

²²⁵Rẽ yĩnga fo pa yãnd tɩ ko-soog (wεεng fãɑ) fãa pʋgẽ, bãmb n be beenẽ n faooda,

²²⁶La b yet bũmb ning b sẽn pa tʋmde?

²²⁷Rẽndɑ yɩɩn-yɩɩdb nins sẽn kõ sɩdã la b maan tʋʋm sõmã la b tẽegd Wẽnd yʋʋrã wʋsgã, la b wili, b sẽn wẽg-b loogr poorẽ. La wẽgdbã na wa n bãng lebgr zĩig ninga b sẽn na n wa lebã.