Al-Isra

¹Soɑb ning sẽn kẽnesa yambã ne yʋngo, n yi Lohorem miisrẽ wã n tʋg mis-zãrg (Mɑsgid Al-aƙṣɑɑ) ning D sẽn bark a kɩremsã n yɩlgã, sẽn na yɩl n wĩnig-a D yel-soɑlmã sãndɑ, ad Yẽ bɑl lɑ a Wʋmda n yaa a Neta.

²La Tõnd kõo a Musa Gafã la D maan-a t'a yaa kãndgr n kõ a ɭsraεεl koambã:" tɩ y ra rɩk lall-n-taag zẽng sẽn ka Maam ye".

³[Yãmb] yɑɑ Tõnd sẽn rɩk-b rãmb n lɑgem ɑ Nuuhã yagemse, ad a [Nuuh] yɩɩ yamb sẽn yaa zaamẽ pʋʋsdɑ.

⁴La Tõnd kõo ɭsraεεl koambã kɩbɑr Gafã pʋgẽ :" y na n sãama tẽn-gãngã zug naoor a yiibu; y na n maana waoog-m-meng me tɩ loog nugu.

⁵La rẽenem sãangã sã n wa ta, Tõnd na n tʋmsa y yĩngɑ Tõnd yembs sẽn yɑɑ pãn-kεgems rãmb tɩ b kãɑsd zãgsã. La yaa pʋleng sẽn yɩ bala.

⁶Rẽ poorẽ tɩ Tõnd lebs tõogã n kõ yãmb tɩ y wil-bɑ la D sɑb yãmb ne arzεgs la koamba la D mɑɑn tɩ yãmb sõorã wɑooglem n yɩɩde.

⁷Y sã n manege, y mɑnegɑ y mens yĩngɑ, la y sã n sãame ɑd rẽ me be ne-a. La sãɑng ɑ yiibẽ soabã sã n wa ta, ɑd yaɑlg na paam yãmba, bεεbã na n leb n kẽe misrã wala b sẽn da kẽ-a rãeenmã, b na n bõgsɑ bũmb ning fãa b sẽn paamã bõgsg tεkẽ.

⁸Tõe tɩ yãmb Soabã wɑ yols-y tɩ y sã n tuubi, la y sã n leb n lebe Tõnd na leb n sɩbg-ya, la Tõnd maana Gεhannemã t'a yaa pĩ-gãag ne kɩfr-dãmba.

⁹Ad Alkʋrãan-kãngã kãndgdame n tʋgd bũmb ning sẽn yɩɩd tɩrlem la a kɩt sẽn kõ-b sɩdã la b tʋmd sõma wã kɩbɑ-noogo, tɩ ɑd b tara keoor sẽn yaa bedre.

¹⁰La neb nins sẽn pa kõt sɩd ne yaoolem raarã, Tõnd sεglɑ b yĩngɑ nang sẽn zabde.

¹¹La ninsaal kotɑ wẽng n kõt ɑ meng wala a sẽn kot neerã, ɑ sẽn zɩ wã yĩngɑ; la ninsaal yɩɩme n yaa yãgda.

¹²La Tõnd mɑɑnɑ wĩntoog la yʋngo tɩ yaa yel-soalem a yiibu, tɩ Tõnd yaool n yẽes yʋng yel-solemdã la D mɑɑn wĩntoog yel-solemdã tɩ yaa vẽenem, sẽn na yɩl tɩ y bao neema sẽn yi yãmb Soabẽ wã, la y bãng yʋʋmã sõor lɑ gεεlɑ, la bũmbã fãa Tõnd wεεl-a-la weelg tεkẽ.

¹³La ninsaal fãa Tõnd rɩka a tʋʋm gafo n pid a yublẽ wã, lɑ d yiisd-a-lɑ yikrã raarã tɩ yɑɑ sebr t'ɑ mikd-ɑ t'a yaa sẽn pɑeele.

¹⁴"Karem f gãfã, tɩ seka ne foo rũndɑ rɑɑrã tɩ fo mengã yɩ f toorẽ gεεndã".

¹⁵Ned ning sẽn kãndaga a kãndagrã nafda a mengã, la ned ning sẽn menema me yaa a meng bɑlɑ. Yõor pa tʋkd a to zɩɩb ye, la Tõnd pa yɩ n nɑ sɩbg rẽndame tɩ D reng n tʋm tẽn-tʋʋma.

¹⁶Lɑ Tõnd sã n tʋll n halk tẽngɑ (rãmba), Tõnd sagenda rɩ-n-tεkã rãmb tɩ b kɩɩs tẽngã zugu, tɩ namsg koεεg yɩ tɩlɑe ne-ba, tɩ Tõnd halk-b halkr tεkẽ.

¹⁷Lɑ sõor wɑoog Tõnd sẽn halk zãma-rãmb a Nuuh loogr poorẽ, lɑ minim lɑ nenem tɑ tεk ne fo Soabã sã n yɑɑ ne A yembsã beegrã.

¹⁸Ned ning sẽn yãgda n rat (dũni wã) pʋɩɩrã, Tõnd kot-a la ɑ pʋgẽ D sẽn tʋll tɛka, ne ned ning n sẽn date. Rẽ poorẽ tɩ Tõnd maan tɩ yaa Gεhannem la a na n kẽ, ne sãbgr la tãndgre.

¹⁹Lɑ ned ning sẽn tʋlla yaoolem raarã la a tʋm n bao-a, t'ɑ yaa sɩd-kõta, bãmb rãmb tʋʋmã na n yãa soeesgo.

²⁰Yembr fãɑ Tõnd kõt-b-la sẽn yi fo Soɑbã kũunẽ wã, lɑ ad fo Soabã kũunã pa yɩ n mongd (ned baa a yembr ye).

²¹Ges Tõnd sẽn zẽkd b sãndã n yɩɩg sãndɑ to-to, la ɑd yaoolem-rɑɑrã n yɩɩd ne ziir-dãmbɑ, n leb n yɩɩd ne yɩɩsgo.

²²Ra wa tũ soɑb zẽng n lagem Wẽnd ye, tɩ fo wat n bɑɑsɑme n yɑɑ b sẽn sãbs-a soaba, b sẽn bas-a soabɑ.

²³Fo Soabã bʋʋme tɩ : ''ra tũ-y zẽng sẽn pa Yẽ ye, la (tall-y) manegr ne roagdb a yiibã, zem tɩ yaa b yiibã yembr maa b yiibã fãa n tɑ kɑseng wɑkɑt fo nengẽ, bɩ f ra wa kaees-b ye, lɑ f ra tãs b ye, lɑ f yeel-b yiibã koεεg sẽn yɑɑ waoore''.

²⁴Lɑ f sik f meng ne b yiibã sẽn yɑɑ yolsg buud fãɑ la f yeele: " m Soabɑ yols b yiibã wala b sẽn wub maam tɩ m da yaa yãagã".

²⁵Yãmb Soabã n yɩɩd ne minim sẽn be yãmb mensẽ wã, y sã n yɩɩme n yaa manegdba, ɑd A yaa yaafd ne lebs-m-mens rãmba.

²⁶La kõ rog-pẽt a hɑkε, la ninbãɑn-ned la so-toagda. La ra fãe (arzɛk) yɑɑr ye.

²⁷Ad neb nins sẽn sãamd-b arzεgsã yaa a Sʋtãan ma-biisi, a Sʋtãan me yɩɩme n yaa sõm-zɩt ne a Soabã.

²⁸Lɑ fo sã n sɛgd n ball n bas-ba, fo sẽn tẽed yolsg f Soabã nengẽ (sẽn na n wa tɩ f kõ-ba), bɩ f yeel-b koεεg sẽn yaa yol-yole (Wẽnd nɑ loke).

²⁹Lɑ ra rɩk f nugã n tʋg n gɑlg f yublã ye (ra yɩ beed soab ye), ra leb n tẽeg-a fas-fas ye, tɩ f wat n zĩi ne sãbsg la nimsa.

³⁰Ad yaa fo Soabã n yalgd rɩtlã n kõt A sẽn rat ɑ soab la A weoogd A sẽn tʋll ɑ soɑb zugu. Ad A yaa Mit n yɑɑ Net ne A yembsã.

³¹La y ra kʋ y koambã talemd yaeesg yĩng ye, Tõnd n rɩlgd bãmba la yãmba. Ad b kʋʋbã yɩɩme n yɑɑ tudgr sẽn bedme.

³²La y ra pẽneg yoob ye, ad a yɑɑ yel-beed n le yaɑ sor sẽn yaa wẽngɑ.

³³La y ra kʋ yõore ning Wẽnd sẽn gɩdg tɩ b rɑ kʋ wã ye, rẽndame tɩ tũu ne hakε, la b sẽn kʋ ned ning ne wẽgdo, Tõnd kõo a nedã sor t'ɑ mɑɑn n dole, la y ra maan n zʋʋg kʋʋbẽ wã ye, yẽndɑ yɑɑ (Sãri wã) sẽn sõng-ɑ soɑbɑ.

³⁴La ra pẽneg-y kɩɩb arzεk rẽnda ne neng sẽn be neere, hal t'a wa tɑ ɑ bɩɩng zĩigẽ, la y pids pʋlengã, ɑd b na n soka pʋleng fãa yelle.

³⁵La y pids vũgbu tɩ y sã n wa vũgdẽ, la y mag ne mɑgdg sẽn ya tɩrga, woto la sõma n leb n yɩɩd ne baas-neere.

³⁶La ra pʋg bũmb ning fo sẽn pa tar minim ɑ pʋgẽ ye, ad wʋmbã (tʋbã) la ninã, la sũurã, wãnde fãa b na n wa soka b yelle.

³⁷La ra kẽn tẽn-gãngã zug ne pugb ye, ad fo kõn n tol n pãrg tẽngã, la f pa nɑ n tol n tɑ tãensã ne woglem ye.

³⁸Woto fãa, a wẽngã fo Soabã nengẽ yɑɑ b sẽn kisgi.

³⁹Wãndã fãa yii fo Soɑbã sẽn tʋms tɩ wɑ fo nengẽ sẽn yɑɑ bʋʋd-minim. La keng n da tũ soab zẽng n naag ne Wẽnd tɩ b wa lobg-f Gεhannemã pʋgẽ tɩ f yaa b sẽn sãbs-ɑ soɑb n rig-ɑ n zãag ne yolsg ye.

⁴⁰Yãmb Soabã na n tũusa yãmb n kõ kom-dibli n yaool n yãk malεgsẽ wã kom-pugli n kõ A Mengã? Ad yãmb yeta gomd sẽn yɑɑ bedre.

⁴¹Lɑ ɑd Tõnd welsɑme n wĩnig Alkʋrãɑn-kãngã pʋgẽ bʋɩl yĩng tɩ b nɑ tẽege, la ka paasd-b rẽnda zoe-n-zãag bala.

⁴²Yeele: " soaben-dãmb sã n da naag-A lame wala b sẽn yetã, b rag n na bao sor n tɩ zab ne Al-ʿAršã Naabã.

⁴³A nɑɑm Yɩlgame n zẽk n yi bãmb sẽn yetã, zẽkr tεkẽ.

⁴⁴Saas a yopoe wã la tẽngã la bũmb nins sẽn be b sʋkã yɩlgd A yʋʋrã, bũmb pa be rẽndame t'a yɩlgd A yʋʋrã lɑ ad yãmb pa fɑhemd b yɩlgrã ye, ad A yaa sugr Soaba n yaa yaafg Naaba.

⁴⁵Lɑ fo sã n karemd Alkʋrãanã, Tõnd maanda gɩdr n ning foo ne sẽn pa kõ-b sɩdã sʋka, gɩdr sẽn ludi.

⁴⁶La Tõnd ningɑ b sũyẽ wã lim tɩ b rɑ fɑhem-ɑ ye; b tʋbẽ wã me kɩd n be beenẽ. La fo sã n gom fo Soabã yell A Yembr tãɑ Alkʋrãanã pʋgẽ la b sẽn lɑeegd n leb b poɑyẽ wã n zoet n zãagdẽ.

⁴⁷Tõnd n yɩɩd ne minim ne b sẽn kelgd Alkʋrãɑnã ne rɑɑb ningã, b sẽn wat n kelgd foomã lɑ b sẽn wat n walemd taabã, wɑkɑt ning wẽg-m-mens rãmbã sẽn wɑt n yetẽ:" ad yãmb sẽn pʋgdã pɑ yɩ rẽndɑ rɑo b sẽn sɑo-ɑ tɩɩm".

⁴⁸Ges bũmb ning b sẽn bilgd foom ne wã! Tɩ b menemame n ka tõe n rɩk so-tɩrg ye.

⁴⁹La b yeele: "tõnd sã n wa lebg kõb la bugdu, b na n le yik-d lɑme tɩ d yaa naan-paalle?"

⁵⁰Yeele: " (y sã n rat bɩ) y yɩ kug maa kutu,

⁵¹Maa bõn-naamds yãmb sẽn tagsd tɩ bãmb n yɩɩd bedrem. B na n yeelame:" yaa ãnd n na n leb n vʋʋg tõndo." Yeele: " yaa yãmb Soab ning sẽn naana yãmb rãeenmã bala" lɑ b na n girɑ b zutã n yetẽ: yaa wakat bʋg la ɑ na n yɩ? Yeele: " tõe tɩ yɩ pẽem-pẽem.

⁵²Raar ning A sẽn na n bool yãmba, tɩ y sakdẽ lɑ y pẽgd-A, tɩ y tẽed tɩ yãmb pɑ zĩnd dũni rẽnd bilf bala!"

⁵³Lɑ f yeel Mam yembsã tɩ b yeel bũmb ning sẽn be neere, bala Sʋtãan baooda sãang bãmb ne taab sʋka, ad a Sʋtãan yɩɩme n yaa ninsaal bε sẽn yɑɑ vẽenega.

⁵⁴Yãmb Soabã n yɩɩd minim ne yãmba, A sã n rata t'A yols yãmba, A sã n rat t'A sɩbg yãmba, ad Tõnd pa tʋms foom tɩ f yɑɑ gũusd b zug ye.

⁵⁵Lɑ fo Soabã n yɩɩd minim ne sẽn be saasẽ la tẽng zugu, la ad Tõnd yɩɩsɑ nabiyaam-rãmbã sãndɑ sãndɑ zugu, la D kõ a Daawʋʋd Zabʋʋre.

⁵⁶Yeele:" bool-y yãmb sẽn dɑ yẽgemd tɩ yɑɑ soɑben-dãmb zẽng sẽn pa Yẽ wã, b pa tõe n pãrg keelem n bas yãmba, b pa tõe n wẽnems-a.

⁵⁷Ad bãmb me baooda raodg n rat n pẽneg b Soabã ne põs-tɑɑbɑ, la b tʋll A yolsgã la b yaeesd A namsgã, ad fo Soabã sɩbgrã sõmbɑ ne gũusgu.

⁵⁸Lɑ tẽn-wẽng ka be rẽndame tɩ Tõnd halk-a taoor tɩ yikr raarã na n ka ta ye, maa D sɩbg-a dũni nang sẽn yɑɑ kεgenga; rẽ yɩɩme n yɑɑ b sẽn gʋls Gafã pʋga.

⁵⁹Lɑ bũmb ka gɩdgd Tõnd tɩ D pɑ tʋm tagmas-rãmbã rẽnda rãeenem rãmbã sẽn dɑ yagsbã yĩnga, la ɑd Tõnd kõo a Sɑmʋʋd-rãmb yʋgemdã tɩ yɑɑ vẽenega, tɩ b kɩfl ne-a, lɑ Tõnd pa tʋmsd tagmas-rãmbã rẽnda bugsg yĩnga.

⁶⁰La tẽeg wakat ning Tõnd sẽn wɑ n yeel foom:"ad fo Soabã (tõogã la a bãngrã) gũbga nebã fãa, la Tõnd pa maan yãab ning Tõnd sẽn wĩnig-a foomã rẽndame t'a yaa zarb-n-gɛsg ne nebã; la kãab-beed tɩɩgã b sẽn gom a yell Alkʋrãanã pʋgã me yɑɑ boto. lɑ Tõnd bugsd-b lame la pa paasd-b rẽnda maan-n-zʋʋg wʋsg bala.

⁶¹Tẽeg Tõnd sẽn wa n yeel malεgsã:" maan-y a Adam suguudu", tɩ b maane rẽnda a ɭblɩɩs. A yeelɑme ''mam na maan suguud n kõ ned ning Fo sẽn naan ne tãndo?"

⁶²La a yeele:" Fo yãa Fo sẽn waoog-a soab n yɩɩg maamã, Fo sã n yaoolg maam n tɩ tãag Yikrã raare, mam na kedg a koambã, sã n pɑ bilf bala".

⁶³La A yeele: ''kẽnge, la sẽn pʋga foom b sʋkã ɑd Gεhannem lɑ b rolbo; yaa rolb sẽn pidsi.

⁶⁴La belg ned ning fo sẽn tõe b pʋgẽ ne f koεεgã, lɑ f kãɑg-b ne f wiidi wã la f naoã rãmbã, lɑ f lagem-b arzεgsẽ wã la koambẽ wã la pʋlem-bɑ". La ad a Sʋtãan sẽn pʋlem-ba pɑ yɩ rẽndɑ belgr bala.

⁶⁵Ad Mam yembsã fo pa tar tõog b zug ye, la fo Soabã taa tεk ne bobl-m-menga.

⁶⁶Yãmb Soabã n kẽnesd kogendã mogrã zug sẽn na yɩl tɩ yãmb bao A kũunã, ad A yɩɩme n yaa Yoalsd ne yãmba.

⁶⁷La pakr sã n paam yãmb mogrã pʋgẽ la bũmb nins yãmb sẽn boondã sẽn menemd (y yamẽ) rẽnda Yẽnda bala, la A sã n wa tɩlg yãmb n yiis ween--n-vɩɩgã zug la y sẽn bɑllde, la ninsaal yɩɩme n yaa sõm-zɩta.

⁶⁸Rẽ yĩnga yãmb tara bas-m-yam t'A ka na n bõr yãmb ween-n-vɩɩgẽ wã maa A tʋms seb-fãeedg y zug tɩ yãmb pa paam fãɑgd y yĩngɑ.

⁶⁹Yãmb tara bas-m-yam t'A ka na n lebs yãmb ɑ (mogrã) pʋgẽ raar ningɑ, n tʋms seb-kεgeng yãmb zug t'ɑ bõr yãmb y sõm-zɩɩlmã yĩngɑ? Rẽ poore me y pɑ nɑ n paam pʋgd sẽn nɑ n pʋg n sok Tõnd ye!

⁷⁰Lɑ ɑd Tõnd waooga a Adam-koambã la D kẽnes-b ween-n-vɩɩg la mogr zugu; la D rɩlg-b rɩ-yɩlm buud fãɑ la D zẽk-b n yɩɩg Tõnd sẽn naanã wʋsg fãa yɩɩdlem tεkẽ.

⁷¹Raar ning D sẽn na n bool zãma fãa ne b taoor soabã; raar-kãngã b sẽn kõ-a soɑb a gaf ne a rɩtgo, rẽnd yaa bãmb rãmb la sẽn na n karem b gafã tɩ b pa na n wẽg-b baa fʋɩ.

⁷²La ned ning sẽn yɩ zõang dũni kaanẽ, yẽ soab yɩta zõang Yaoolem raarã, n leb n yɩɩd ne sor menengo.

⁷³La ad kella bilf tɩ b gũdg foom n yi Tõnd sẽn tʋms bũmb ning tɩ wa fo nengẽ wã n dɑt tɩ fo wãag zĩri sẽn pɑ yẽ n rogl Tõndo, wɑkɑt-kãngã b rɑg n na rɩkẽ foom n mɑɑn b zoa.

⁷⁴La sã n pɑ Tõnd sẽn tabend foomã, fo rɑg n nɑ n kɩllɑ bilf n tʋg b nengẽ.

⁷⁵Rẽnd Tõnd rag n na leems foom sɩbg zɑbdg vɩɩmã pʋgẽ la sɩbg zɑbdg kũumã poorẽ, rẽ poorẽ tɩ f pɑ paam fãɑgd n yi Tõnd ye.

⁷⁶Lɑ b rɑ pẽnegɑme n nɑ n weoog foom sẽn nɑ yɩl n yiis foom Mɑk tẽngẽ wã, la bãmb me ra kõn n zĩndẽ fo poorẽ rẽnda bilf bala.

⁷⁷Rẽ yaa Tõnd sẽn tʋm-b rãmb tɩ reng fo taoorã nao-kẽndre, la fo pɑ yãt teoong Tõnd nɑo-kẽndrã pʋgẽ ye.

⁷⁸Yãnes Pʋʋsgã sẽn sɩng wĩntoogã kɩllg wakato n tɩ tãag zĩ-sobdo la Fɑgir kɑrem-n-wogle, ad Fɑgir Pʋʋsgã Mɑlεgsã yɩɩme n zĩndid beenẽ.

⁷⁹La yʋngã pʋgẽ bɩ f pʋʋs tɩ yɑɑ paasg ne foo, tɩ sãnd-sãnde fo Soabã na taas foom pẽgr zĩigẽ.

⁸⁰La yeele:" m Soaba, kẽes maam sɩd kõom zĩiga la yiis maam sɩd yiisg zĩiga la maan sõngr pãng n kõ maam".

⁸¹La yeele:"sɩd waame la zĩri viigɑme, ɑd zĩri wã rag n yɑɑ sẽn viigi".

⁸²La Tõnd sikda Alkʋrãanẽ wã bũmb ning sẽn yaa tɩp-tɩɩm la yolsg n kõ sɩd-kõtbã, la ad a ka paasd wẽgdbã rẽnda bõn bala.

⁸³Tõnd sã n maan ninsaal neema la a sẽn gũt a zãn-kuidg n wuk a koagdã n zãage, la wẽng sã n paam-a la a sẽn lebgd tẽeb wãɑgdɑ.

⁸⁴Yeele:" ãnkãm fãa tʋmda a yam-yãkre, la yãmb Soabã n yɩɩd minim ne ned ning sẽn yɩɩd ne so-tɩrg rɩkre.

⁸⁵La b sokdɑ foom yõorã yelle. Yeele:" ad yõorã yellã yaa m Soabã yεlã a yembre", la b pa kõ yãmb bãngr rẽnda bilf bala.

⁸⁶Lɑ Tõnd sã n ratẽ D na loog ne bũmb ning Tõnd sẽn tʋm tɩ wɑ fo nengẽ wã, rẽ poorẽ f pɑ nɑ n paam bobend sẽn nɑ n lebs-ɑ Tõnd nengẽ n kõ-f ye.

⁸⁷Sã n pɑ yolsgã sẽn yi fo Soabã nengẽ wã yĩngɑ. Ad A kũunã fo zugã yɩɩ bedre.

⁸⁸Yeele:" ninsaalb la zĩn-dãmb sã n lagem taaba n na n wa ne Alkʋrãan-kãngã buudu, b kõn n tõog n wa ne a bilgri baa tɩ b sã n sõng taaba.

⁸⁹Ad Tõnd welsame n wĩnig nebã Alkʋrãan-kãngã pʋga bũmbã fãa biligri, la nebã wʋsgã fãɑ tõdgame rẽnd sõm-zɩɩlem bɑlɑ.

⁹⁰La b yeelɑme:" tõnd ka na n tol n kõ sɩd ne foom hal tɩ f wa pusg ko-nin tẽngẽ wã n kõ tõndo"

⁹¹Maa fo tall pʋʋg sẽn yaa tamar tɩɩs la sib pʋʋgo, tɩ ko-sood pusgd a pʋgẽ pusgr tεkẽ.

⁹²Maa f lub sɑɑgã geemd-geemd tõnd zug wɑlɑ fo sẽn yẽgemdã, maa f wa ne Wẽnd la malεgsã tõnd taoor vẽenegɑ.

⁹³Maa fo tall roog sẽn bolg ne sãnem; maa f rʋ saagẽ wã, la d ka na n kõ fo rʋʋbã sɩd lae rẽndame tɩ fo wa sik tõnd zug gafo tɩ tõnd karemd-a". Yeel-ba: "yɩlgemd be ne m Soabã! Mam pa bũmb a to n zʋʋg ned sẽn yɑɑ tẽn-tʋʋm ye"

⁹⁴Lɑ bũmb pa gɩdg nebã tɩ b kõ sɩd kãndagrã sẽn wa b nengẽ poore, rẽnda b sẽn yetede: " yaa bõe yĩng tɩ Wẽnd tʋms yĩng soab [neda] tɩ yɑa tẽn-tʋʋma?"

⁹⁵Yeele:"malεgs sã n rag n beẽ tẽngã zug n kẽnd n tɑr yõgnego D na sɩk b zug malεk tɩ yɑɑ tẽn-tʋʋma".

⁹⁶Yeele: "ad Wẽnd kɑsetã sekɑme maam ne yãmb sʋka", ad A yɩɩme n yaa minim Tẽng-n-biig la Net ne A yembsã.

⁹⁷La Wẽnd sẽn kãndag ɑ soɑbɑ, yẽ n paam kãndgre. La A sẽn menes ɑ soab me, a kõn n tol n paam lall-n-taas zẽng sẽn pa Yẽ ye. D na n tigim-b lame Yikrã raarã b nensã zugu, tɩ b yaa zõees n yaa mugs n yaa wʋmse, la b gãag zĩig yaa Gεhannem; Bugmã sã n maag la Tõnd sẽn paasd-a widgri.

⁹⁸Yaa woto la b rolb b sẽn kɩfl ne Tõnd Aayay-rãmbã yĩngã la b yeele: "rẽ yĩnga tõnd sã n lebg kõb la bugdu b na n leb n vʋʋga tõnd tɩ yɑɑ naan-paalga?"

⁹⁹Rẽ yĩnga bãmb pa get tɩ Wẽnd sẽn naanã saasã la tẽngã tara tõog ne A naan b bilgr yεsa? Ad A kõo bãmb wakat sik sẽn ka be a pʋgẽ, la wẽgdbã zãgsame rẽnda sõm-zɩɩlem bɑlɑ.

¹⁰⁰Yeele: "yãmb sã n da so m Soabã yolsgã baoã y rag n na maan beed talemd yaeesg yĩnga, la ad ninsaal rag n yɩɩme n yaa beed soɑbɑ.

¹⁰¹Lɑ ɑd Tõnd kõo a Musa yel-soalem a wae sẽn yɑ vẽenese, bɩ f sok a ɭsraεεl koambã a sẽn wa n wa b nengẽ wã t'a Fɩr'aoon yeel-a: " ad mam tẽeda foo ɑ Musɑ tɩ b maan-f-lɑ tɩɩm".

¹⁰²T'ɑ yeele: "fo meng miime tɩ pɑ sik yel-solem bãmbã rẽndɑ saas la tẽng Soabã; rẽ yaa vẽenega, la ad mam tẽeda foom ɑ Fɩr'ɑoon tɩ f yaa bõndɑ".

¹⁰³T'a [Fɩr-aoon] maan tʋlsem n na n yiis-b tẽngẽ wã tɩ Tõnd bõr-a ne neb nins sẽn lagem yẽ wã fãa gilli.

¹⁰⁴Rẽ loogr poorẽ, Tõnd yeela a ɭsraεεl koambã:" zĩnd-y tẽngẽ wã, la Yaoolem raarã pʋleng sã n wa ta, D wɑtɑ ne y fãɑ gilli.

¹⁰⁵La yaa ne sɩda la Tõnd sik-a (Alkʋrãanã), yaa ne sɩd me la ɑ sigi, la Tõnd pa tʋms foom rẽnda (f na yɩ) sũ-noogd la bugsda.

¹⁰⁶(Tõnd sik-a lame) tɩ yɑɑ Alkʋrãan D sẽn wεgs sẽn na yɩl tɩ f kɑrem-ɑ nebã ne maag-m-menga. La Tõnd sik-a-la gĩnd-gĩndi.

¹⁰⁷Yeele: "kõ-y-yã-a sɩda maa y rɑ kõ sɩd ne-ɑ ye, ad neb nins b sẽn da kõ bãngrã taoor t'a na n pa wa wã, b sã n na n karemd-a b nengẽ la b sẽn lʋɩt b lεmã zut n maan suguudu.

¹⁰⁸La b yetedẽ: "yɩlgemd be ne d Soabã, ad tõnd Soabã pʋlengã sɩd na n yɩɩme"

¹⁰⁹La b lʋɩt suguud b lεmã zut n kũmdẽ, tɩ woto paasd b wẽn-zoεεga.

¹¹⁰Yeele: "bool-y Wẽnd maa y bool Yolsg Naabã, yãmb sẽn bool yʋʋr ning fãa A yʋɩyã manegɑme tɩ be neere n yɩɩda. La ra wa zẽk f koεεgã wʋsg Pʋʋsgã pʋgẽ ye, ra leb n sik f koεεgã wʋsg me ye, la bao tẽng-n-sʋgr rẽ pʋgẽ.

¹¹¹La yeele: "pẽgr be ne Wẽnde, A pa tar biiga, A leb n pa tar lagem-n-taag A naamã pʋga, A pa tar lall-n-taag A pãng kaalg yĩng ye, la waoog-A n zɩsg-A zɩsgr tεkẽ.