Maryam

¹Kaaf-Ha-‘Ain-Saad (su Allah i mataw kanu ma'na nin).

²Nya ba i labitan kanu limu nu Kadenan engka sa kanu ulipenin a si Zakariya.

³Su waktu a min-du’a kanu Kadenan nin sa kinandu’a a masulen.

⁴Ya nin pidtalu: pedtyakap sa laki (Allah) saben-sabenal na saki na minggepuk/migkalubay su tulan ku endu migkadakel kanu ulu ku i maputi a buk, endu da aku maaden sabap kanu kabangeni sa leka a pedtiyakap sa laki (Allah) sa egkalidu (su ginawa).

⁵Endu saben-sabenal kagilekan aku sa dadagen nu pakatundug sa laki su agama, endu su kaluma ku na bayas (di pembata) na enggay aku ebpun sa leka a Kadenan sa wata.

⁶Sa makawaris sa laki, endu makawaris kanu Ya'kub sa kataw endu kanabi (di kena kakawasan) endu baluy ka, Kadenan ku, a kasuwatan (nu Allah).

⁷(Tig nu Allah): O Zakariya! Benal a sekami na papegkalilinin nami seka (enggan nami seka) sa wata a ya nin ngala na si Yahya a dala sangay nin a nawna pan sa lekanin.

⁸Tig nu Zakariya: Kadenan ku panun i ka-aden a wata sa kaluma ku na bayas, na saki menem na naka sampay sa katuwa?

⁹Pidtalu nu malaikat: manggula den inan pidtalu nu Kadenan nengka na ya pan malemu kanu Allah, ka binaluy ka nin paganay sa dala, namba i tanda nu kapegkagaga nu Allah endu kaisa-isa nin.

¹⁰Tig nu Zakariya: Kadenan ku umbali aku sa tanda (sa magingay su kaluma ku), tig nu Allah: ya nin tanda na di ka miyug edtalu kanu manga taw sa taman sa telu gay (ya tabiya na ka-tasbih).

¹¹Na liniyuwan in su manga taw ebpun sa pedsambayanganin, inigulinganin i edsambayang kanu den sa mapita-malulem.

¹²(Tig nu Allah): O Yahya! Kamali ka su kitab (Taurat) sa mabagel endu inenggay nami sa lekanin i kataw (ungangen) sa wata pan.

¹³(Endu binaluy) a limu sekanin (kanu manga taw) ebpun sa lekami (Allah) endu suti sekanin endu na-aden sa magilek sa Allah.

¹⁴Endu ebpiya-piya sa duwa a mimbata lun, endu dala ma-aden sa tamegesen a darwaka a supak sa Kadenan nin.

¹⁵Sagyahatra sekanin sa kanu gay a kinambata lun (malilintad) endu su gay a kapatay nin, endu su kambuwatin (kanu kinapatay nin) sa bibyag.

¹⁶Endu labit ka (Muhammad) san sa kitab (Qur’an) si Maryam kanu kutika a tinumangka (tinagakin) su kadakelin sa lu mibpawang sa gabetadan a tampal sa sebangan.

¹⁷Na nangaden sa makadalindingin sa ginawa nin (linemambung), sinugu nami (tig nu Allah) lu sa lekanin su Jibril a mibpalas sa manguda a mama a mapya i palasin.

¹⁸Tig nu Maryam: benal a lumindung aku sa Allah sa leka amayka seka na magilek sa Allah.

¹⁹Tig nu Jibril: saki na sinugu aku nu Kadenan nengka ka endu ku ka-enggan seka sa wata a mapya.

²⁰Tig nu Maryam: panun i ka-aden a wata sa laki sa dala aku makembil na mama endu di kena aku darwaka?

²¹Tig nu Jibril: manggula den inan, ugayd na pidtalu nu Kadenan nengka i nampamba i malemu sa lekanin, endu baluyn nami a tanda kanu manga taw endu limu ebpun sa lekami, endu di ebplis na manggula bun.

²²Na migkagingay (su Maryam) na tinemangka sekanin sa mawatan kanu manga kadakelin.

²³Na ginedamin su tyanin lu kanu lawas u kayu kulma (taman sa nakambata), ya nin nadtalu: niya ba ka minatay aku sa da pan i niya manggula, na dala den mabanding (malabit) sa laki sa kalipatanan den.

²⁴Na tinawag nu Jibril sa tampal sa baba: di ka pelidu i ginawa nengka, ka saben-sabenal a binaluy nu Kadenan nengka san sa kababan nengka i ig a pelagilay a ka-inuman.

²⁵Endu kuyung ka i lawas a kayu kulma anan ka mangalubpug su unga nin na mapya a pegken.

²⁶Kan ka lun endu inum ka kanu ig endu pakagalaw ka sa beneng, na amayka aden mailay nengka apiya sakataw a manusya na (edtalu ka): midsamaya aku sa Allah sa kabpuwasa sa di ka edtalu-talu, na di aku a benal embityala saguna sa manusya.

²⁷Na initin su wata nin lu kanu manga kadakelin, ya pidtalu nu manga taw: O Maryam! Nayt engka anan a wata na di kena paydu inan a kayayan.

²⁸Seka (Maryam) na suled kun na suled kani Harun, si ama nengka na di kena mawag (a mama) endu si ina nengka (na endaw ka den anan miniling).

²⁹Na inigulinganin su wata nin, ya nilan nadtalu na: panun i kambityala nami sa wata a pebpuyut pamun?

³⁰Tig nu wata (su Eisa): benal a saki na ulipen aku nu Allah inenggan aku nin sa kitab, endu binaluy aku nín a nabi.

³¹Endu pinambarakat aku nin apiya endaw aku makendaw, endu inidtutuma nin sa laki i kadsambayang endu kadzakat taman sa bibyag aku pan.

³²Endu kabpiya-piya sa kani ina ku, endu da ku nin baluya a tamegesen sa mawag.

³³Endu sagyahatra (kalilintad) sya sa laki kanu kinambata sa laki endu su gay a kapatay ku, endu gay a kambuwat ku a bibyag aku.

³⁴Namba si Eisa a wata ni Maryam a midtalu sa bantang a penduwa-duwa kanu (kaped na pedtalu sa wata nu Allah).

³⁵Dala sa Allah i mumbal sa wata nin, mahasuti sekanin, amayka aden kahanda nin na ya nin bu edtalun na pangaden ka na ma-aden (sapelek mata bu i kangagan nin).

³⁶Endu su Allah i Kadenan ku a Kadenan nu bun, na simba nu sekanin, ka namba i lalan a matidtu a dala lun i kabigkug.

³⁷Na mimbida-bida su manga taw (kanu Eisa) na sa bawgan sa naraka i kanu manga kafir kanu gay a kadalpa (kawma nilan) kanu gay a masla (kabangkit sa dunya-kabulig sa mahsar).

³⁸Magayp silan kanu kakineg nilan kailay nilan kanu gay a makatingguma silan sa lekami, ugayd na silan a baradusa na saguna na natading silan sa mapayag.

³⁹Endu pakagileki ka silan (Muhammad) kanu gay a ka-anteng-anteng a napasad (ibagangapa) i siksa nilan, na silan a (kafir) na dala sa ginawa nilan i (masiksa) endu silan na di bangimbenal.

⁴⁰(Tig nu Allah) benal a sekami i mawaris kanu lupa endu su dalemin, endu syabun makambalingan sa lekami.

⁴¹Endu labit ka (Muhammad) san sa kitab (Qur’an) si Ibrahim ka sekanin na benal (bantang) endu nabi sekanin.

⁴²Pidtalu nin kani ama nin: Hay ama ku! Nginan ka pedsimban engka i di pakakineg endu di pakailay endu dala pakangguna nin sa leka apiya paydu?

⁴³Hay ama ku! Saben-sabenal a aden nakawma sa laki a kataw a dala makawma sa leka, na unuti aku ka tutulun ku seka sa lalan a matidtu a bantang.

⁴⁴Hay ama ku! Da ka pedsimba sa Shaytan ka su Shaytan na sinangka nin su Allah.

⁴⁵Hay ama ku! Benal a kagilekan aku sa malumpak kanu siksa ebpun sa Allah, na makuyug ka sa madtagapeda nu Shaytan lu sa naraka.

⁴⁶Tig nu ama ni Ibrahim: nginan gabensiyan nengka i Kadenan ku Ibrahim? Amayka di ka menda (tumelen) na rajamen ku seka, pasagadi aku, tangkay aku sa mawatan.

⁴⁷Tig nu Ibrahim: su sagyahatra nanget sa leka ipangeni ko seka sa ampun kanu Kadenan ku, ka su Kadenan ku na taliman nin i pangeni ku.

⁴⁸Endu ganatan ku sekanu endu su manga barahala a pedsimban nu a salakaw sa Allah, endu ya ku pangenyan su Kadenan ku, ka basi di aku bun makabpayan ka pangenin ku sa Kadenan ku sa di nin taliman.

⁴⁹Na guna nin ganati silan endu su pedsimban nilan a salakaw sa Allah na inenggay nami sa lekanin si Ishaq endu su Ya'kub endu uman isa kanilan na binaluy nami a nabi.

⁵⁰Endu inenggan nami silan ebpun kanu liyu (sa tamuk endu wata), endu binaluy nami kanilan i labitan (badtugan) kanilan a mapulu.

⁵¹Endu labit ka (Muhammad) san sa kitab (Qur’an) su Musa ka sekanin na ikhlas endu sinugu sekanin endu nabi.

⁵²Endu tinawag nami sekanin sa tampal sa kawanan nin kanu palaw, endu pinasupeg nami sekanin sa nakineg in su kadtalu nu Allah.

⁵³Endu inenggay nami ebpun sa lekami su limu (su suled in a si Harun) a nabi a pakadtabangay nin.

⁵⁴Endu labit ka (Muhammad) san sa kitab (Qur’an) su Ismail, ka sekanin na benal i pasadin, endu sekanin na sinugu a nabi.

⁵⁵Endu pedsugun nin su kaluma nin sa kadsambayang endu kadzakat, ya kaaden na gasuwatan u Kadenan nin.

⁵⁶Labit ka (Muhammad) san sa kitab anan (Qur’an) su Idris, ka sekanin na benal gayd i kadtalu nin a nabi.

⁵⁷Endu inipulu nami kanu gambetadan a mapulu.

⁵⁸Silan a manga taw a inikalimu nu Allah silan ebpun sa manga nabi a manga mawli a taw ni Adam, endu su pinapageda nami kanu awang nu Nuh endu su manga mawli a taw ni Ibrahim endu su Ismail endu su tinutulu nami endu pinamili nami, amayka batyan kanilan su tanda nu malim (Allah) na mangalimbaban silan a sinemugyud endu bagulyang.

⁵⁹Na makambwat kanu ulyan nilan i manga taw a dinadag nilan su sambayang, endu ya nilan inunutan na kyug a ginawa nilan, na di ebplis na ya nilan maparuli su bawgan sa naraka.

⁶⁰Ya tabiya su midtawbat endu nangimbenal endu minggalebek sa manga mapya, na makaludep silan kanu surga, endu di silan madsalimbut sa apiya paydu.

⁶¹Manga surga a jannatu ad'n (gatakenan) a pibpasad u Allah kanu manga ulipen nin sa gayb, ka su Allah na matuman a benal i pasadin.

⁶²Dala makineg nilan sa surga a mawag a kadtalu ya tabiya na mapya, endu kanilan i rizki nilan sa magabi-mapita.

⁶³Entuba i surga a pawarisan nami kanu manga ulipen nami a magilek sa Allah.

⁶⁴Endu di kami (malaikat) makatulun ya tabiya na suguwan nu Kadenan nengka bu (Muhammad), lekanin a Allah su gasangulan (a gay a mawli) endu su gataligkudanan (su dunya) endu su pageletan nu duwa, dala kanu Kadenan nengka i limpang (malipat).

⁶⁵Kadenan nu pitu lapis a langit endu su lupa endu su pageletan nin, na simba nu sekanin endu edsabar kanu sa simba sa Allah, dala natawan nengka a sangay nu Allah.

⁶⁶Endu edtalun nu manusya (kafir): u matay aku na makambwat aku pamun a bibyag?

⁶⁷Ngintu di katademan nu manga manusya (kafir) i binaluy nami sekanin sa unan a dala pan mabaluy na dala (bun) sekanin?

⁶⁸Na idsapa ku kanu Kadenan nengka (Muhammad) na buligen nami silan kanu mga shaytan mawli na pandalpan nami silan kanu ligid na naraka a namakalumpeni silan.

⁶⁹Mawli na pamadsenggayan i uman isa tumpuk, ka endaw i kategas a isa sa Allah na lu bumba bagunut i kapasang a siksa nin,

⁷⁰Mawli na katawan nami bun kanilan i wagib lagangen (baganagen) sa naraka endu su ilaleg, endu su ped a kasiksan.

⁷¹Endu dala isa sa lekanu a di makaludep sa naraka, ka entu na hukuman nu Kadenan nengka a di ebplis na kawkitan.

⁷²Mawli na lepasen nami su nagilekan sa Allah, endu itagak nami lu sa naraka su manga baradusa sa lusak, endu mababa i kayanan nilan.

⁷³Amayka batyan kanilan (kafir) su ayatan nami a mapayag, na ya edtalun nu manga kafir (a kawasa) kanu silan a manga mu'min (a miskinan): endaw kanu kafir atawa mu'min i mapya i kabetadanin endu mapya i kabuliganin?

⁷⁴Di bu pili-pila i madakel i bininasa nami kanu manga taw a nangawna a silan pan i madakel i tamuk in endu mapya i palas a kailay lun.

⁷⁵Edtalu ka (Muhammad): su entayn e natadin kanilan na lugkan, umanan nu Allah su umulin, endu pedsinggumananin sa limu a mapayag, kena ka ipedsiksa lun taman sa mailay nilan su inibpasad kanilan (mabunu atawa mabyag silan) atawa ka siksa sa naraka, na katawan nilan den bantu u entayn i mawag i kabetadanin, endu malubay i manga tantara nin (sundalu nin).

⁷⁶Endu edsinggumanan nu Allah su nangatutulu sa tutulu, endu su inugut sa Allah na gasama kanu egkuwanun i sangat i kapiyanin, kanu Kadenan nengka i balasin endu kabpawangan.

⁷⁷Nailay nengka (Muhammad) su taw a sinupakin su manga ayatan nami, endu pidtalu nin i kanggan aku pamun sa tamuk endu wata.

⁷⁸Ngintu nailay nin i gayb atawa ka ngintu aden pasad nilan sa Allah a minggungala sa Rahman?

⁷⁹Kena ka di ebplis na isulat nami i pedtalu nin endu umanan nami sekanin sa siksa.

⁸⁰Endu sekami bun i mawaris kanu pidtalu nin a (tamuk endu wata) endu (tig nu Allah): makawma bun sa lekami na isa nin bu.

⁸¹Minumbal silan sa kadenan a salakaw sa Allah, ka endu kanu maka-safaat kanilan.

⁸²Di kena, ibpalawa bu na manga barahala sa kinasimba nilan (sa barahala) endu mabaluy a semupak kanilan sa gay a mawli.

⁸³Da nengka mailay (Muhammad) i sinugu nami su manga shaytan lu kanu manga kafir sa mapagkawalaw kanilan sa mawag.

⁸⁴Na di ka semasawi su kasiksa kanilan ka pembilangen nami bun su gay nilan atawa kapengginawa nilan taman kanu ajal nilan.

⁸⁵Su gay a buligen nami su manga magilek sa Allah lu sa Rahman sa migkuda iganat sa kalyu nin sa kubur.

⁸⁶Isedseg nami su manga baradusa lu sa naraka a bamelakaw a egkawaw gayd.

⁸⁷Dala den makadtabang (kanilan) ya tabiya na su tinumalima sa pasad ebpun sa Allah.

⁸⁸Endu pidtalu nu manga kafir i aden wata nu Allah.

⁸⁹Saben-sabenal a ungkir a masla a nadtalu.

⁹⁰(Sabap kanu kadtalu nilan) na paydu bu i di kapegkalupet nu manga langit sa namba a kadtalu nilan, endu su lupa na gabukakal, endu su manga palaw a galundus a egkagubal.

⁹¹Sa kinadtalu nilan sa aden wata nu Allah.

⁹²Dala egkapatut nin sa Allah i makaaden sa wata.

⁹³Ka dala kanu dalem nu langit endu su lupa a di kena ulipen nu Allah.

⁹⁴Saben-sabenal tinanudan nu Allah endu binilangin silan sa kina-bilang.

⁹⁵Endu uman isa na makawma sa Allah sa dala kaped nin (dala makadtabang lun).

⁹⁶Benal su manga mu'min a minggalebek sa manga mapya na pembaluyn nu Allah silan sa kagkakalimwa.

⁹⁷Ya tidtu na pinakalmuwan nami (su Qur’an) ka basa nengka, ka endu kapakalilinyan nengka kanu manga magilek, endu kapakagilekan nengka su manga taw a di mataw sa haqq, bantang.

⁹⁸Endu madakel i bininasa nami a manga taw a nawna kanilan na dala isa bu a maparuli nengka kanilan ataw a makineg kanilan a suara apiya paydu.