Hud

¹Alif-Laam-Ra (su Allah i mataw kanu ma'na nin), su Qur’an i na-atul i manga ayatin, mawli na pidtinatad sa manga kukuman ebpun sa Allah a mataw sa mapayag-masulen.

²(Edtalu ka): da kanu sumimba sa salakaw sa Allah, ka saki (Muhammad) na papegkagilekan ku endu papegkalilinin ku sekanu.

³Endu pa-ampun kanu sa Kadenan nu, mawli na edtawbat kanu sa lekanin, ka uyagen kanu nin sa mapya sa taman a ajal nu sya sa dunya a napasad, endu inggay nin sa uman isa su limu lun, endu amayka sinumibay silan na kagilekan aku sa lekanu kanu siksa kanu gay a masla (gay a mawli).

⁴Lu sa Allah i kauliyan nu, endu sekanin (Allah) na langun a enggaga-isa na egkagaga nin.

⁵Benal a pedsanggilan nilan i katawan su dalem nu laleb nilan, ka endu makapagena sa dala makataw lun, saben-sabenal sa kapedtanggub sa balegkas nilan na katawan bun u Allah su ibagema nilan endu su ipebpayag nilan (a galebekan nilan) su Allah na katawan nin i gatagu kanu manga laleb nilan.

⁶Da malanap-lanap sa lupa a di kena su Allah i pe-rizki lun, endu katawan nin i kandalpan nin sya sa dunya gagalu (atawa sya pan sa tiyan nu babay) endu katawan nin i lebengan lun langun na (inaden) na lu tanan sa kitab a mapayag (Lawh Al-Mahfudh).

⁷Sekanin a (Allah) i minaluy kanu manga langit endu lupa sa naka-nem gay, su Arsh nin sa kanu entu na ya nin naudsadan na ig, ka pembatalun kanu nin u entayn ni mapya i galebekin sa lekanu endu amayka pidtalu nengka kanilan i makambuat kanu sa ulyan a kapatay nu, na ya edtalun u manga kafir: dala inan (kabenalin) ya tabiya na sih'r a mapayag.

⁸Endu amayka idtatangguli kanilan (di tundugen) i siksa, taman a di makawma na ya nilan kadtalu na ngin i naka-iket (kanu siksa) ka da makawma sa lekami? Saben-sabenal su gay a kawma na siksa kanilan na di makasibay kanilan endu makadadsang kanilan su bagungaten nilan a siksa.

⁹Endu amayka inenggan nami su manusya sa limu ebpun sa lekami, mawli na iyawa nami sa lekanin na edtebpekan silan (a manga kafir).

¹⁰Amayka linuwagan nami sekanin sa ulyan a kinasikut sa lekanin na ya nin menem edtalun: dala den sa laki su mapasang, endu sekanin na magalaw sa ukit a kamamasla.

¹¹Ya tabya na su midsabar endu minggalebek sa manga mapya, ka silan na kanilan su ampun endu balas a masla.

¹²Basi matagak nengka su kaped a ini-wahi sa leka, endu kasikutan su ginawa nengka (Muhammad) sa kapedtalu nilan sa namba ka nakatulun sa lekanin i ginadung (kakawasan) atawa aden bu malaikat a tagapeda nin, na yabu leka na kapedsampay, endu su a Allah kanu langun nu enggaga-isa na pedtuldu nin.

¹³Atawa su pedtalun nilan: inidtebu ni (Muhammad su Qur’an), edtalu ka: pambuwaten nilan i sapulu a surah pagidsan nin a embida-bida, endu tawag nu i magaga nu a salakaw sa Allah (barahala) amay ka nakuyug kanu sa benal kanu.

¹⁴Amayka di nilan magaga na tuntayi nu i saben- sabenal a initulun sa kataw nu Allah (su Qur’an), endu da kadenan a wagib a pedsimban ya tabiya na sekanin, na sekanu na sinumangkup kanu den.

¹⁵Entayn i pegkyug sa kauyag sa dunya endu kapalasanin na inggay nami su galebekan nilan, endu silan sya sa dunya na di silan madsalimbut.

¹⁶Silan a manga taw na da kanilan lu sa akhirat i mapya a makuwa nilan, ya tabiya na naraka a apuy, endu nagugul su manga palbuatan nilan, endu nabinasa i langun a penggalebeken nilan.

¹⁷Su taw a aden tindeg in ebpun kanu Kadenan nin (Qur’an), endu pembatyan nin a saksi sa lekanin, endu nawna pan su kitab nu Musa a bagunutan endu limu, entuba i manga taw a bangimbenal, endu entayn i sumupak lun kanu manga lumpukan kanu manga taw (Yahudi-Nasrani atawa kaped pan), su apuy i pasad kanilan (siksa) na da ka penduwa-duwa kanu Qur’an ka saben-sabenal a haqq ebpun sa Kadenan nengka, ugayd na ya madakel sa taw na di bangimbenal.

¹⁸Da nakasagad i kadupangin kanu taw a edtetebuan in su Allah sa kalbutan, silan antu a manga taw sa kapananggit kanilan kanu hadapan sa Allah na edtalun nu manga pedsaksi: namba su manga taw a napandalbut sa Kadenan nilan, saben-sabenal su mulka nu Allah na nanget kanu manga dhalimeen.

¹⁹Entu ba su manga taw a ipedsapal nilan su agama nu Allah, endu pagapasen nilan i aden madtila nu agama, endu silan na su akhirat menem na di nilan bangimbenalen.

²⁰Silan a manga taw na da den kanilan i makalipus sya sa lupa (sa siksa) endu da kanilan i salakaw sa Allah a makatuganul kanilan, takepen kanilan i siksa, da kanilan i makagaga silan sa kakineg, endu da kanilan i makailay silan.

²¹Entuba i manga taw a nalapis i ginawa nilan, endu natadingan nilan su inidtebu nilan (su barahala nilan).

²²Da ka-ebplisin na silan lu sa akhirat na silan i nanga lugi.

²³Su manga mu'min endu minggalebek sa manga mapya, endu linemumping kanu Kadenan nilan na silan i kigkuwan kanu surga, na silan na dala den kalyu nilan sa surga.

²⁴Ya upaman nu duwa ka lumpukan (balityala endu kafir) na mana buta/lakap endu bisu, endu su pakailay endu pakakineg, ngintu makapagidsan silan duwa sa upaman? Ngintu di nengka kagkalendem?

²⁵Endu sinugu nami si Nuh lu kanu manga kawm nin, ya nin pidtalu: saki na pedsampay aku sa lekanu sa mapayag.

²⁶Da kanu pedsimba sa salakaw sa Allah, ka saki na kagilekan aku sa lekanu kanu siksa nu gay a masakit (gay a kagkukum).

²⁷Na ya pidtalu nu kangaunutan u kafir kanu manga mu'min: da kailay nami sa leka a di kena manusya a pagidsan nami bun, endu dala nailay nami a minunut sa leka ya tabiya na su manga taw a mababa sa lekami a dala pandapatin, endu da mailay nami sa lekanu a kalbihan (makagkapiya) sa lekami, bagantapen nami na mangalbut kanu.

²⁸Tig nu Nuh: Hay manga taw ku! Saben-sabenal na aden den tindeg ku ebpun kanu Kadenan ku, endu inenggan aku nin sa limu (karasul) ebpun sa lekanin a dala nu mailay sa mapayag, na ngintu ipeges nami sa lekanu (i kasimba sa Allah sa isa nin bu) na sekanu na di nu gasuwatan?

²⁹Sekanu a manga kawm, di kena ako pegkwa sa lekanu sa tamuk (sukay) ya tabiya na lu sa Allah endu di kena aku pembugaw kanu manga mu'min, ka silan na mapaluli nilan bun i Kadenan nilan, ugayd na kailay ku i sekanu a manga taw na di kanu mataw.

³⁰Endu hay manga taw ku! Entayn i makatabang sa laki kanu siksa nu Allah amayka binugaw ku silan? Ngintu ka di kanu bagungangen?

³¹Di ku madtalu sa lekanu i sya sa laki su kamal nu Allah, endu di ku katawan i gayb, endu di ku madtalu i saki na datu aku atawa malaikat aku, endu di ku bun madtalu kanu manga taw a mangalubay a pedsudyan nu silan i di den enggan nu Allah silan sa mapya, ka su Allah i mataw kanu dalem nu ginawa nilan, ka saki i taw a kuyug sa manga dupang (amayka madtalu ku).

³²Pidtalu nilan: Nuh, inibpalawa kami nengka sa madakel na pambuwat kaden i namba ibanginggilek nengka sa lekami amayka benal ka.

³³Tig nu Nuh: ya makapambuwat lun sa lekanu su Allah amayka kahanda nin, na dala sa lekanu i maka-lipus kanu.

³⁴Di makambarapantag sa lekanu su indawan ku amayka mangindaw aku sa lekanu, amayka ya kyug nu Allah sa lekanu i ampunen kanu nin, ka sekanin i kadenan nu endu baguliyan nu.

³⁵Kena ka pedtalun nilan i inidtebu nu Nuh, edtalu ka: u inidtebu ku na laki den i kadusan ku, na saki na mawatan aku sa ipendusa nu (mawatan ako sa kadusan nu).

³⁶Kagina ini-wahi kanu Nuh i dala den mangimbenal kanu taw nengka ya tabiya na su nangawna bu, na dika den pelidu i ginawa nengka kanu penggalebeken nilan.

³⁷Endu umbal ka sa bagedan a kailay nami endu wahi nami (mailay nami endu parihalan nami) endu di aku nengka den embitiyalay makapantag kanu kafir ka silan na makageled silan.

³⁸Bagumbal sa awang su Nuh na uman i maka-sagad kanu Nuh na pinagungat nilan, pidtalu nu Nuh: u bagungaten kami nu na bagungaten nami bun sekanu sa mana bun kabpagungat nu sa lekami.

³⁹Ka di ebplis na katawan nu bun u entayn i mawma na siksa sa mapalusak lun, endu kadadsangan na siksa a matangen.

⁴⁰Taman sa guna makawma su siksa nami endu pedsebu su pugun (dapulan) pidtalu nami (kanu Nuh): ilulan nengka (ipageda nengka) i uman i edtagapeda na duwa timan (babay-mama) endu kaluma nengka, ya tabiya na napasad a makageled (i di ka mapageda) endu su manga mu'min a paydu.

⁴¹Tig nu Nuh: pageda kanu sa (sa awang) sa ngalan nu Allah i pabpagiseg endu mapabpelen, su Kadenan ku a mangampun a malimu.

⁴²Na ibalalaguy nu awang silan kanu bagel a mana palaw, endu tinawag nu Nuh su wata nin a (mama) a nakabpulu (minitas), Hay wata ku! Pageda ka sya sa lekami, da ka peluyud kanu manga kafir.

⁴³Ya nin pidtalu (wata nin): mampil aku sa palaw a mamarihala sa laki kanu ig, tig nu Nuh: da parihala saguna a gay kanu siksa nu Allah, ya tabiya su inikalimu nin, endu nabpageletan den silan a bagel, na nakamung kanu namakageled.

⁴⁴Na endu sinugu su lupa sa tumelen embuwal endu su langit sa tumelen mulan, endu sinumenep su ig, na napasad su nanggula, endu nakasendad su awang sa kapuluwan, endu pidtalu i mawatan den sa limu su manga kafir.

⁴⁵Nangeni su Nuh sa Kadenan nin, tig in: Kadenan ku, su wata ku kanu kaluma ku, endu benal i pasad nengka, endu seka i bangukum a mapya kanu langun nu bangukum.

⁴⁶Tig nu Allah, Nuh: di kena nengka wata, ka di kena mapya i galebekin, da ka bangeni sa di nengka katawan, ka saki (Allah) na bangindaw aku sa leka (ka endu di ka) makuyug sa manga taw a jahil (da sabut in).

⁴⁷Tig nu Nuh: Kadenan ku, lumindung aku sa leka sa makapangeni aku sa di ku katawan, endu u di aku nengka ampunen endu ikalimu na kuyug aku kanu manga taw a nangalugi.

⁴⁸Pidtalu kanu Nuh: tepad kanu sa sagyahatra (mapya endu malilintad) ebpun sa lekami endu barakat endu su tagapeda nengka, endu (aden kanu) manga taw i uyagen nami sa mapya, mawli na malupang silan nu siksa a masakit ebpun sa lekami. (sabap kanu kadupangan nilan).

⁴⁹Entu ba a manga tudtul a gayb, ipe-wahi nami sa leka (Muhammad) di nengka katawan endu su manga ummat nengka sa unan a dala pan makatulun su (Qur’an), na tigkel ka ka su mawli a mapya na kanu magilek sa Allah.

⁵⁰Endu sinugu nami si Hud lu kani Aad, pidtalu ni Hud: Hay manga taw ku! Simba nu su Allah, ka da Kadenan nu a salakaw sa Allah, ka sekanu na pedtetebu kanu sa simba.

⁵¹Hay manga taw ku! Di aku pegkwa sa lekanu sa sukay ya tabiya a sukay ku na lu kanu minaluy sa laki, na ngintu ka di kanu bagungangen?

⁵²Sekanu (manga taw) na pa-ampun kanu sa Kadenan nu, mawli na edtawbat kanu sa lekanin, ka paulanan kanu nin sa mapya, endu umanan kanu nin sa bagel, endu da kanu mumbal sa kaunutan nu a baradusa.

⁵³Tig nilan kani Hud: da napananggit nengka a tanda a mapayag, endu di nami tagaken i manga kadenan nami sa kadtalu nengka, endu di nami seka pangimbenalen.

⁵⁴Da madtalu nami ya tabya na pigkaydan ka (nabinasa ka) nu kaped a kadenan nami, tig nu Hud: pedsaksiyan ku sa Allah endu edsaksi kanu sa saki na lepas aku kanu sakutu nu.

⁵⁵Da salakaw sa Allah, na langunu endu su manga barahala nu na edtatabangay kanu den sa kagkaydan aku, mawli na di aku makakisu apiya paydu.

⁵⁶Saben-sabenal a saki na sinumalig aku sa Allah a Kadenan ku, endu Kadenan nu bun, dala nakabetad sya sa lupa a di kena sekanin a Allah i bagimatay lun sa endaw i kyug nin lun, su Kadenan ku na sya i kukuman nin sa lalan a matidtu.

⁵⁷Amayka di silan tumalima na inisampay ku bu su inisugu sa laki sa lekanu, endu sumambi su Kadenan ku sa manga taw a salakaw sa lekanu, endu apya paydu na di nu kagkaydan sekanin, ka su Kadenan ku kanu langun nu enggaga-isa na pedtuldunin.

⁵⁸Guna makawma su tiyuba nami na linepas nami su Hud endu su manga mu'min a salta sa lekanin, sabap kanu limu nami, endu linepas nami silan sya sa dunya kanu siksa sa mapasang.

⁵⁹Entu ba su Aad a sinangka kanilan su manga ayatan nu Kadenan nilan, endu sinupak nilan su manga sinugu, endu ya nilan inunutan na suguwan nu bameges a pedtegas.

⁶⁰Endu tinundugan silan sya sa dunya sa mulka (lipunget) endu lu sa gay a mawli, ka saben-sabenal si Aad na mig-kafir sa Kadenan nilan, endu mawatan sa limu si Aad a kawm nu (sakup nu) Hud.

⁶¹Sinugu nami si Salih lu kanu Thamud, pidtalu nin kanilan: simba nu su Allah ka dala Kadenan nu a salakaw sa Allah, sekanin i napambuwat sa lekanu ebpun sa lupa, endu pinapaguyag kanu nin sya sa lupa, na pa-ampun kanu endu edtawbat kanu sa lekanin, ka su Kadenan ku na masupeg a tumalima.

⁶²Pidtalu nilan: O Salih, kalilinyan nami a benal seka sa da nengka pan madtalu i pidtalu nengka, ngintu ka pedsapalan kami nengka sa kasimba nami kanu pedsimban nu kalukesan nami, endu penduwa-duwa kami sa enggatan nengka sa lekami.

⁶³Tig nu Salih: tuntayi nu i saki na aden tindeg ku a mapayag ebpun kanu Kadenan ku, endu inenggan aku nin sa limu, na entayn i edtabang sa laki kanu siksa nu Allah amay ka sungkangen aku, da makasingguman nu sa laki a di kena kalugiyan.

⁶⁴Hay sekanu a manga taw ku! Nya su unta nu Allah a tanda sa lekanu, na padtaday nu kuman sya sa lupa nu Allah, di nu magitung sa mawag, ka binasan kanu nu siksa a masupeg.

⁶⁵Na sinumbali nilan, tig nu Salih: paguyag kanu den mun kanu dalpa nu sa telu gay bu, ka entuba i pasad a dala kalbutan nin.

⁶⁶Guna makawma su tyuba nami, linepas si Salih endu su manga mu'min a salta sa lekanin sabap kanu limu nami, endu nalepas kanu kalusakan kanu entu ba a gay, ka su Kadenan nengka na sekanin i mabagel a mapulu.

⁶⁷Endu nasugat a kilat su manga kafir, endu nabaluy silan kanu manga walay nilan sa nag-aw sa dala magubal.

⁶⁸Sa mana bun dala nanggula nilan, saben-sabenal si Thamud na pig-kafiran nilan i Kadenan nilan, mawatan kanu Thamud su limu.

⁶⁹Nakawma su manga sinugu nami kani Ibrahim (a malaikat) sa nakagalaw kanilan, pidtalu nilan: sagyahatra kanu, tig nu Ibrahim: salam bun sa lekanu, da matana-tana na inisendad kanilan (initalgad) i sapu a pinagyaw.

⁷⁰Guna nin mailay i da sakataw kanilan a pegkan, na inungkirin silan, endu bangandam kanilan, ya nilan pidtalu na daka egkagilek ka sekami na sinugu kami san sa kawm ni Lut.

⁷¹Endu pedtindeg bun su kaluma nin na nakadtatawa sa kinakinegin sa embatan nin su Ishaq sa ya mawli na si Ya'kub.

⁷²Ya nin nadtalu: enduken embata aku na saki na matuwa aku den, endu su kaluma ku na saka-matuwa pan sa laki? Saben-sabenal a isa inan a makagayp (si Sarah na walu pulu, si Ibrahim na magatus endu duwa pulu lagun)

⁷³Ya kadtalu nu malaikat, enduken ka kagayp ka sa kahanda nu Allah? Limu nu Allah endu barakat nin sa lekanu a taw na walay, su Allah na pebpugin a papegkaslan.

⁷⁴Guna ma-awa kanu Ibrahim su andam nin (gilekin) endu nawma nu makagkapiya sa ginawa nin na inibpalawa kami nin kanu kawm nu Lut (nangingidsa pantag kanu taw nu Lut).

⁷⁵Si Ibrahim na matigkel a baratawbat lu sa Kadenan nin.

⁷⁶Tig nilan: O Ibrahim! Pasagadi ka inan a kapebpalawa (kabagidsa) nengka ka saben-sabenal a nawma su siksa nu Kadenan nengka, ka silan na makawma kanilan i siksa a di maalaw di makatulak.

⁷⁷Guna makawma kanu Lut su manga sinugu (a malaikat) na nalidu i ginawa nin kanilan (sa tudtul nu malaikat), endu nasimpitan na pagitung (si Lut) ka manga mapya i palasin (su malaikat), ya nin pidtalu (Lut): nya ba su gay a mapasang.

⁷⁸Endu nakawma su manga taw ni (Lut) sa bamagayas silan tanan, ka andang a penggalebek silan sa maledsik (mama sa mama, babay sa babay), tig nu Lut: manga taw ku, nan su manga wata a manga babay, pangaluma kanu, ka silan pan i suti sa lekanu, ikagilek nu su Allah, endu di aku nu mapagkaya kanu manga bisita ku, kena aden bun maungangen sa lekanu a manga mama?

⁷⁹Tig nilan: natawan nengka bun Lut i sekami na da kyug nami sa manga wata nengka, endu katawan nengka man i kahanda nami (kalilinyan nami na mama sa mama).

⁸⁰Tig nu Lut: u mana bu ka aden bagel ku sa lekanu na nabinasa kanu den atawa lu aku den lemumping sa Allah a kigkuwan sa bagel.

⁸¹Tig nu malaikat: O Lut! Sekami na sinugu kami nu Kadenan nengka sa di ka nilan masampay sa mawag, pa-awa ka sya su manga taw nengka sa magabi i kaganat, endu uman isa na di lumengi, ya tabiya (a di ka mapa-awa) su kaluma nengka, ka masugat a (tyuba) sa mana bun su makasugat kanilan a manga dupang, ka ya pasad kanilan na magan mapita (kawma na tyuba) di kena ba masiken den su mapita?

⁸²Guna makawma kanilan su siksa nami na kinelid nami su dalpa endu pinaulanan nami silan sa watu a apuy a maleges a midtundug-tundug.

⁸³Nakasulat i ngala na uman i gasugat nin ebpun sa Kadenan nengka, endu di kena pamun mawatan intu a nanggula kanu manga taw a baradusa.

⁸⁴Endu lu sa Madian na sinugu nami su suled nilan a si Shu’aib, pidtalu nin kanilan: simba nu su Allah ka da Kadenan nu a salakaw sa lekanin, endu di nu pegkulangi su asadan u timbangan, ka gailay ku sekanu sa mapya i gatamanan nu, endu kagilekan aku sa lekanu sa siksa nu gay a langkap.

⁸⁵Hay sekanu a manga taw! Talutup nu i kapagasadu anan du kadtimbang nu, endu di nu belapisa su manga taw kanu kanilan bun, endu da kanu penggula sya sa lupa sa maminasa kanu sa apiya ngin embalangan a makabinasa.

⁸⁶Ka su inisama nu Allah sa lekanu (su balas) na ya pan mapya amayka mu'min kanu, endu di ku bun sekanu matuganul.

⁸⁷Tig nilan kani Shu’aib: namba sambayang nengka anan a ipedsugu sa leka, ka endu nami matagak su pedsimban nu manga lukes nami, atawa ka endaw i kyug nami kanu manga tamuk nami? Seka Shu’aib i taw a matigkel a maungangen (nya ba a kadtalu na ibagungat nilan).

⁸⁸Tig nu Shu’aib: tuntayi nu i saki na aden tindeg ku a mapayag ebpun kanu Kadenan ku, endu inenggan aku nin sa rizki a mapya, endu di ku kyugan i sakalebu (makabida) aku sa lekanu kanu ipedsapal ku sa lekanu, da kahanda ku ya tabiya na kapagkapiya sa taman a magaga ku, endu da tutulu ya tabiya na kanu Allah a sekanin i pedsaligan ku endu sekanin i pedtawbatan ku.

⁸⁹Sekanu a manga kawm ku, na di nu penggula su lipunget ku sa laki i kapendupang nu, ka masugat kanu sa mana su nakasugat kanu kawm nu Nuh endu su kawm nu Hud endu su kawm nu Salih, endu di kena pamun mawatan sa lekanu su manga nanggula nu kawm nu Lut.

⁹⁰Endu pa-ampun kanu sa Kadenan nu, mawli na edtawbat kanu sa lekanin, ka su Kadenan ku na malimu a malanun.

⁹¹Ya nilan pidtalu: Oh Shu’aib! Di nami kasabutan i kadakelan sa pedtalun nengka, endu kailay nami i malubay ka (di ka makailay) endu di kena bu su kadakel engka na rajamen nami den seka, endu dala sa lekami i mapulu ka.

⁹²(Tig nu Shu’aib): Hay sekanu a kawm ku! Ya besen bara-alaga sa lekanu su kadakel ku sa kanu Allah, endu binaluy nu sa taligkudan i suguwan nin? Su Kadenan ku na katawanin i langun a penggalebeken nu.

⁹³Sekanu a kawm ku, enggalebek nu den edsabenal, ka saki na penggalebek aku, ka katawan nu bu su entayn i mauma nu siksa a makapalusak sa lekanin, endu entayn i malbut, endu pagangapa kanu ka bagangapa aku bun.

⁹⁴Endu guna makawma su siksa nami, na linepas nami su Shu’aib endu su manga mu'min sabap kanu limu nami, endu nasugat a kilat su langun na manga supak, na nabaluy silan kanu walay nilan a nag-aw sa dala magubal (i lawasin).

⁹⁵Timbang a dala bun nanggula nilan, (mana dala makagkaleben kanu dalpa, nakatangka su Madian sa limu mana su kinatangka nu Thamud.

⁹⁶Endu sinugu nami si Musa sa manga ayatan nami, endu tindeg a mapayag.

⁹⁷Lu kanu Fir’awn endu su kangasaligan nin, na ya nilan inunutan i suguwan nu Fir’awn, na da suguwan nu Fir’awn a nakatidtu.

⁹⁸Mangunanan kanu kawm in (su Fir’awn) sa gay a mawli, lu sa kaludep sa naraka, endu ngin den i kawag nin a kapangunanan.

⁹⁹Endu tinundugan silan sa dunya sa mulka, endu lu sagay a mawli na saka mawag pan i kawagan nin a mulka.

¹⁰⁰Entuba i manga tudtulan kanu dalpa, panudtulen nami sa leka (Muhammad) ka aden bun migkapiya na aden bun nabinasa.

¹⁰¹Di kena nami silan dinupang, ugayd na dinupang nilan i ginawa nilan, na dala makangguna kanilan su barahala nilan a pedsimban nilan a salakaw sa Allah sa apiya paidu, guna makawma kanilan su siksa nu Kadenan nengka, endu da nakadsingguman nin kanilan, ya tabiya na kinabinasa.

¹⁰²Endu mamba i kapembinasa nu Kadenan nengka, amayka binasan nin su manga dalpa a dupang i taw nin, saben-sabenal su kabinasa nin na masakit a mapasang.

¹⁰³Saben-sabenal a luba su tanda nu Allah (a kapegkagaga nin) sya kanu (manga taw) a nagilekan sa siksa sa gay a mawli, entuba su gay a malimud su manga taw, gay intu a pedsaksiyan (kanu langun u nakadalem sa langit endu lupa).

¹⁰⁴Endu di nami ipedtekaw pedtingguma, ka aden bun gay nin.

¹⁰⁵Su gay a kawma nin na da makadtalu apiya sakataw bu, ya tabiya na kahanda nu Allah, aden bun nabinasa endu migkapiya.

¹⁰⁶Su nangabinasa na lu sa apuy sa naraka, aden kanilan i langgak a kaginawa (makalanggak silan).

¹⁰⁷Da den kalyu nilan sa naraka taman a aden langit atawa lupa ya tabiya na kahanda nu Kadenan nengka, ka su Kadenan nengka na penggalebeken nin i kyug nin.

¹⁰⁸Endu su migkapiya na kanilan sa surga, sa gapiya i ginawa nilan, da kaliyu nilan taman a aden langit endu lupa, inenggay nu Allah intu a dala kadtaman nin.

¹⁰⁹Da ka penduwa-duwa (Muhammad) kanu pedsimban nu manga kafir ka mana bun kapedsimba nu manga kalukesan nilan a nawna, endu sekami na inggay nami i balas nilan sa dala kulang nin.

¹¹⁰Saben-sabenal a inenggay nami kanu Musa i Taurat, na mimbida-bida silan a manga taw nin, endu di kena bu napasad muna i kukuman (sa di pan silan tiyuban) ebpun sa Kadenan nengka, na natyuba den silan, endu silan na bagalang-alang kanu kitab (Qur’an) endu penduwa-duwa silan.

¹¹¹Uman isa kanilan na sampulna kanu Kadenan nengka i balas nilan kanu galebek nilan, ka sekanin a Allah na katawanin i penggalebeken nilan.

¹¹²Na dayung ka (padtatap ka) su inisugu sa leka endu su midtawbat a salta sa leka, endu da kanu mapasagad sa langun taman (di nu mapadsubla su manga galebekan) ka su Allah na katawanin i penggalebeken nu.

¹¹³Di nu pedsaligi su manga taw a kafir, ka malupang kanu na apuy, endu dala sa lekanu i salakaw sa Allah a saligan nu, mawli na di kanu kadtabangan.

¹¹⁴Endu itindeg nengka su sambayang sya kanu mapita-malulem endu su kaped sya kanu magabi ka su manga mapya na pakapunas kanu manga mawag, entuba na indawan a patadem kanu manga taw a pedtadem.

¹¹⁵Endu edsabar ka, ka su Allah na di nin dadagen su balas nu manga mapya a taw.

¹¹⁶U mana bu ka su manga taw a nangawna sa lekanu ka aden nasama kanilan, na semapal (pamun) kanu manga pakabinasa sya sa lupa, ya tabiya na paydu bu kanu linepas nami kanilan (i nasama) endu ya nilan bun dinayun (tinatap) su kasupak a kabinasan nilan bun, endu silan na manga taw a baradusa.

¹¹⁷Da sa Kadenan nengka i binasan nin i dalpa sa kadupangan, sa taw nin na pedsugu pamun sa makagkapiya.

¹¹⁸Endu u ya bu nagkahanda nu Kadenan i binaluy nin i langun na taw na Muslim na magaga nin, endu di bun mapinda i kambida-bida nilan.

¹¹⁹Ya tabiya na su inikalimu nu Kadenan nengka, endu entuba i binaluyan nin kanilan, endu napasad i kadtalu nu Kadenan nengka sa penun ku su naraka sa jin endu manusya sa langun.

¹²⁰Endu panudtulen nami sa leka i tudtulan kanu manga sinugu a makagkabagel sa atay nengka, endu nakawma sa leka sya sa dunya su bantang endu indawan endu tadem kanu manga taw a nangimbenal.

¹²¹Edtalu ka kanu di bangimbenal i enggalebek kanu den mun san sa kabetadan nu, ka penggalebek kami bun.

¹²²Endu pagangapa kanu den mun, ka bagangapa kami bun.

¹²³Kanu Allah i gayb kanu manga langit endu lupa endu lu bun makambalingan sa lekanin su pakalagyan nin langun, na simba nu sekanin, endu salig ka sa lekanin, endu dala sa Kadenan nengka i limpang kanu langun a penggalebeken nu.